என் அண்ணன்.....

என் அண்ணன்.....

என் கண்ணின் கனவுகளில்
என் அண்ணன் முகம் வேண்டும்
மறுபடி நான் புதிதாய் பிறக்கவேண்டும்
என் அண்ணன் என்னாளும் எனைவிட்டு
நீங்கா வரம் வேண்டும்

என் அண்ணன் உயிரென்று
எனை மட்டும் நினைக்கவேண்டும்
என் அண்ணன் கைப்பிடித்து
இவ்வுலகை பார்க்கவேண்டும்

பள்ளி செல்ல அடம்பிடிக்கும் எனை
அண்ணன் அழைத்து செல்ல வரவேண்டும்
செல்லமாய் கோபித்து சண்டையிட வேண்டும்
அண்ணனின் தைரியத்தில் அடித்துவிட்டு
அண்ணன் பின் சென்று ஒளிய வேண்டும்

அண்ணன் இருக்கின்றான் என்ற
கர்வம் எனக்கு வேண்டும்
தோழிகளிடம் எனக்காக எதுவும்
செய்யும் அண்ணன் என
பெருமையுடன் சொல்லவேண்டும்

என்னை கொண்டு வந்து விட
அண்ணன் கூட வரவேண்டும்
அண்ணனை கண்ணென்றும்
என்னை இமையென்றும்
எல்லோரும் சொல்லவேண்டும்

பார்க்கிற விழியாவும்
நமக்கொரு அண்ணன் இப்படி
இல்லையென பொறாமை படவேண்டும்
எந்தன் தோல்விகளில் சாய்ந்துகொள்ள
என் அண்ணன் தோள் வேண்டும்
சுகமாய் அழ வேண்டும்

அண்ணனுக்கு தெரியாமல்
அண்ணனின் காதல் கடிதங்கள்
படிக்கின்ற சுகம் வேண்டும்
அம்மாவிடம் அண்ணனை மாட்டிவிட்டு
அசடு வழிகின்ற அண்ணனை
ரசித்து த்ருஷ்டி கழிக்கணும்

அழகான அண்ணியொன்றை
அண்ணனுக்காய் தேட வேண்டும்
என்னை தன் மகளாக நினைக்கின்ற
அண்ணி அண்ணனுக்கு அமையவேண்டும்

அத்தை என்று சொல்ல அழகான
குழந்தை இரண்டு அண்ணிக்கு
பிறக்கவேண்டும்

அடுத்தவர் மீது குறை சொல்லி
அழுகின்ற என்னை அண்ணன்
தன் மடிமீது சாய்த்து
ஆறுதல் சொல்ல வேண்டும்

சந்தேக புயலொன்று
அடிக்கின்ற நிலையொன்று
எங்களுக்குள் நிகழாத
வரமொன்று வேண்டும்

பறக்கின்ற சிறகொன்று
எனக்கொன்று இருந்ததானால்
அண்ணன் மனம் செல்லும்
வழியாவும் செல்லவேண்டும்

பிரிக்கின்ற உறவொன்று
இடையே வந்ததானால்
அதை எதிர்க்கின்ற
துணிவு எனக்கு வேண்டும்

எனை தாரை வார்க்கும் நிலை
என் அண்ணனுக்கு
நிகழா நிலை வேண்டும்
என் அண்ணன் ஊன்றுகோலாய்
நானே மாறவேண்டும்

என் அண்ணன் விழி மூடுமுன்
எந்தன் உயிர் பிரியவேண்டும்
இனியொரு பிறப்பு
எனக்கொன்று இருந்ததானால்
என் கண்ணின் கனவுகள்
நிஜமாகும் வரம் வேண்டும்…

அண்ணன் உயிரோடு இருந்தபோது எழுதிய கவிதை இது.....

உங்கள் வரிகள் அனைத்தயும் என் உயிரோடு இருக்கும் அண்ணனுக்கு சமப்பிக்கிறேன் அக்கா உங்கள் உத்தரவுடன்
அனுதாப வாழ்த்துக்கள் அக்கா உரிமையுடன் தம்பி அப்புகுட்டி.

அருமை இந்த கவிதை .உங்கள் உறவை சொன்ன நிலை உண்மை .
அண்ணன் மீது பாசம் .இது வேஷம் அல்ல உண்மையின் சுவாசம்.
பாராட்ட போதவில்லை தோழியே .

kalaimoon70 wrote:அருமை இந்த கவிதை .உங்கள் உறவை சொன்ன நிலை உண்மை .
அண்ணன் மீது பாசம் .இது வேஷம் அல்ல உண்மையின் சுவாசம்.
பாராட்ட போதவில்லை தோழியே .

நெகிழவைக்கும் வரிகள் அனைத்தும் அர்ப்புதமாக உள்ளது அக்கா