இறுதிப் போட்டியில் நுழைந்தது இந்தியா

நியூசிலாந்தை 105 ரன்கள் வித்தியாசத்தில் வீழ்த்தி இறுதிப் போட்டியில் நுழைந்தது இந்தியா

தம்புல்லா நியூசிலாந்துடன் நேற்று நடந்த முக்கியப் போட்டியில் அபாரமாக பந்து வீசிய இந்தியா, அந்த அணியை 105 ரன்கள் வித்தியாசத்தில் வீழ்த்தி இறுதிப் போட்டிக்குள் நுழைந்தது.

தம்புல்லாவில் நடந்த இந்தப் போட்டியில் இந்தியாவின் பேட்டிங் மோசமாக இருந்தது. வீரேந்திர ஷேவாக் மட்டுமே சிறப்பாக ஆடினார். 93 பந்துகளைச் சந்தித்த அவர் 110 ரன்களைக் குவித்தார். இவரது சிறப்பான ஆட்டத்தால் இந்தியா 200 ரன்களைத் தாண்ட முடிந்தது.

டோணி தன் பங்குக்கு 38 ரன்களைச் சேர்த்துக் கொடுத்தார். மற்றவர்கள் மிகவும் சொற்ப ரன்களில் வீழ்ந்தனர்.

இறுதியில் இந்தியா 46.3 ஓவர்களில் அனைத்து விக்கெட்களையும் இழந்து 223 ரன்களுக்கு ஆட்டமிழந்தது.

இதையடுத்து களம்இறங்கிய நியூசிலாந்தின் முதுகெலும்பை முறித்தார் பிரவீன் குமார். அபாரமாக பந்து வீசிய அவர் குப்தில், ராஸ் டெய்லர், ஸ்டைரிஸ் ஆகியோரை வெளியேற்றி ஆட்டத்தை இந்தியாவின் கட்டுக்குள் கொண்டு வந்தார். மறுபக்கம் முனாப் படேலும் அபாரமாக பந்து வீசி தன் பங்குக்கு 3 பேரைச் சாய்த்தார். ஆசிஷ் நெஹ்ரா 2 விக்கெட்களை வீழ்த்த இந்தியாவின் வெற்றி உறுதியானது.

மில்ஸ்மட்டுமே சற்று தாக்குப் பிடித்து ஆடி 52 ரன்களைத் தொட்டார். இவர் மட்டுமே அந்த அணியில் நல்ல ஸ்கோரை எடுத்தவர்.

இறுதியில் 30.1 ஓவர்களில் அனைத்து விக்கெட்களையும் இழந்த நியூசிலாந்து 118 ரன்களில் ஆட்டமிழந்து தோல்வியுற்றது.

இந்த ஸ்கோர்தான் இந்தியாவுக்கு எதிராக நியூசிலாந்து எடுத்த குறைந்தபட்ச ஸ்கோராகும்.

நேற்றைய போட்டியில் 1000மாவது பவுண்டரிகளை அடித்தார் ஷேவாக். இதன் மூலம் டெஸ்ட் மற்றும் ஒரு நாள் போட்டிகளில் 1000 அல்லது அதற்கு மேற்பட்ட பவுண்டரிகளை அடித்த நான்காவது வீரர் என்ற பெருமையை அவர் பெற்றார். இதற்கு முன்பு டெண்டுல்கர், பான்டிங், பிரையன் லாரா ஆகியோர் இந்தப் பெருமையை வைத்துள்ளனர்.

மேலும், நியூசிலாந்துக்கு எதிராக அதிக சதங்ளைப் போட்ட இந்திய வீரராக டெண்டுல்கர் மட்டுமே இருந்து வந்தார். அவரது சத எண்ணிக்கை 5 ஆகும். தற்போது நியூசிலாந்துக்கு எதிராக 6வது சதத்தைப் போட்டு முறியடித்துள்ளார் ஷேவாக்.

இறுதிப் போட்டியில் இலங்கையை சந்திக்கிறது இந்தியா.

நன்றி தட்ஸ்தமிழ்

நன்றி

இறுதி போட்டியில் சாதிக்கும.......