இடிந்த சுரங்கத்தின் உள்ளே 33 பேர்கள் 17 நாட்கள் !

இடிந்துப்போன சுரங்கத்தில் 17 நாட்கள் உயிருடன் இருக்கும் 33 தொழிலாளர்கள் - வெளியே கொண்டு வர இன்னும் நாலு மாதங்கள் ஆகும் !

தெற்கு அமெரிக்காவில் இருக்கும் சிலி என்ற நாடு சுமார் 2700 மைல் நீளமும் 109 மைல் அகலமும் கொண்டது. இங்கு நிறைய உலோக சுரங்கங்களும் முக்கியமாக செப்பு சுரங்கங்களும் உள்ளன. இப்படிப் பட்ட ஒரு சுரங்கத்தில் ஆகஸ்ட் 5ம் தேதி முக்கிய வழியின் கூறை இடிந்து விழுந்து தொழிலாளர்கள் வெளியே வராமல் மூடிவிட்டது.

உள்ளே இருந்த 33 சுரங்க தொழிலாளர்கள் 4 மைல் நீளமுள்ள ஒரு சுரங்க பாதையில் மாட்டிக்கொண்டார்கள். கடந்த 17 நாட்களாக பல இடங்களில் துளை போட்டு தேடி வந்த சுரங்க அதிகாரிகளுக்கு ஞாயிற்று கிழமை வரை ஒன்றும் தடயம் கிடைக்கவில்லை. உள்ளே இருந்தவர்கள் உயிருடன் இருப்பார்கள் என்ற நம்பிக்கை கொஞ்சம் கொஞ்சமாக குறைந்துக் கொண்டே வந்தது. சுரங்க தொழிலாளர்களின் குடும்பத்தினர் கவலையுடனும், ஆவலுடனும் சுரங்கத்தை சுற்றி சுற்றி வந்தார்கள்.

ஞாயிற்றுக்கிழமை மாலை சிலியின் ஜனாதிபதி திரு செபாஸ்டியன் ப்னெரா, 33 தொழிலாளர்களும் உள்ளே உயிருடன் இருக்கிறார்கள் என்ற செய்தியை மக்களின் ஆரவாரத்திற்கிடையே வெளியிட்டார்.

சுமார் 2250 அடியின் கீழே அவர்கள் 33 பேரும் ஒரு அறை போன்ற இடத்தில் கூடி இருப்பதை ஒரு சிறிய துளையின் மூலம் கண்டு பிடித்தார்கள். கீழே இருப்பவர்களிடம் இருந்து ஒரு கடிதம் பெற்றார்கள். அதில் " நாங்கள் 33 பேரும் நலமாக இருக்கிறோம்" என்று எழுதி கையெழுத்து போட்டிருந்தார்கள்.

"இன்று சிலி நாட்டு மக்கள் அனைவரும் ஸந்தோஷத்தினால் அழுதுக் கொண்டிருக்கிருக்கிறார்கள்" என்றார் ஜனாதிபதி திரு செபாஸ்டியன் ப்னெரா.

நம்பிக்கை இழந்து சுற்றிக்கொண்டு இருந்தவர்கள் அனைவரும் ஞாயிற்றுக் கிழமை இரவு திறந்த வெளியில் விழா கொண்டாடினார்கள்.

17 நாட்கள் வழி மூடிய ஒரு சுரங்கத்தின் உள்ளே உயிருடன் பிழைத்திருப்பது ஒரு ஆச்சரியமான விஷயம்.

ஆனாலும் அவர்கள் எல்லாரும் ஒவ்வொருவராக வெளியே வர தனியாக 27 அங்குலம் விட்டம் கொண்ட வேறு ஒரு பெரிய துளை போடவேண்டும் என்றும், அதற்கு இன்னும் ஏறக்குறைய 4 மாதங்கள் ஆகும் என்றும் சுரங்க அதிகாரிகள் சொல்லுகிறார்கள். அனேகமாக கிருஸ்துமஸ் சமயத்தில் அவர்கள் மேலே இருப்பார்கள் என்றும் சொல்லுகிறார்கள்.

சிறிய வீடியோ கேமராக்களை விட்டு உள்ளே இருப்பவர்களின் போட்டோ எடுக்கப்பட்டது. இப்போது உணவும் காற்றும் உள்ளே அனுப்ப படுகின்றன். உயிருக்கு ஆபத்து ஏதும் இல்லை என்றாலும் அவர்கள் வெளியே வரும்வரை அவர்களின் மனநிலையை பாதுகாப்பது ஒரு பெரிய சவாலாக இருக்கும் என்றும் சொல்கிறார்கள்.

உள்ளே இருக்கும் மாரியோ கோம்ஸ் என்ற 63 வயது தொழிலாளி தன் மனைவிக்கு எழுதிய கடிதத்தில் சொல்கிறார் "எவ்வளவு மாதங்கள் ஆனாலும் நாங்கள் பத்திரமாக வெளிவருவோம். கடவுள் மகத்தானவர். பொறுமையும் நம்பிக்கையும் எங்கள் அனைவரையும் உயிருடன் வெளியே கொண்டு வந்து சேர்க்கும்".

நாமும் அப்படியே பிரார்த்தனை செய்வோம் ! தெய்வ நம்பிக்கை எப்போதும் நம்பினவர்களை கை விடாது !!

நாமும் பிரார்த்தனை செய்வோம்....