கிளிநொச்சி கைப்பற்றிய போது படையினர் பின்வாங்கும் நிலையில் இருந்தனர்! - சரத்பொன்சேக

கிளிநொச்சியை கைப்பற்றிய போது படையினர் பலத்த இழப்புக்களை சந்தித்து, ஓர் அங்கூலம் கூட முன்னாள் எடுத்து வைக்க முடியாத நிலையில் இருந்ததாக முன்னாள் இராணுவத்தளபதி சரத் பொன்சேக கூறியுள்ளார்.

இது தொடர்பில் நேற்று கொழும்பு செய்தியாளர்களிடம் அவர் தெரிவிக்கையில் 'போர் உச்சகட்டத்தில் இருந்த போது, தப்பியோடுவோரின் எண்ணிக்கை அதிகரித்திருந்தது. கிளிநொச்சியை கைப்பற்றிய போது நாம் கடுமையான இழப்புக்களை சந்தித்திருந்தோம்.

அப்போது இராணுவத்தை பலப்படுத்திக்கொள்வதற்காக படையினர் தப்பியொபொடும் விவகாரத்துக்கு முற்றுப்புள்ளி வைக்க வேண்டியிருந்தது.

இல்லையேல் நாம் ஓமந்தைக்கு பின்வாங்கும் நிலை ஏற்பட்டிருக்கும். ஓர் அங்குலம் கூட எம்மால் முன்னேற முடியாது போயிருக்கும். இது பற்றி பாதுகாப்பு அமைச்சர், மற்றும் பாதுகாப்பு செலாளருடன் ஆலோசித்தே முடிவு எடுக்கப்பட்டது. அதன் பின்னரே தப்பியோடியிய இராணுவ அதிகாரிகளும் படையினரும் இராணுவ நீதிமன்றங்களில் நிறுத்தப்பட்டனர்.

எனது பதவிக்காலத்தில் இராணுவ நீதிமன்றத்தில் நிறுத்தப்பட்ட அதிகாரிகள், படையினரில் பெரும்பாலனவர்கள் தப்பியோடி பிடிபட்டவர்கள் தான்' என கூறினார்.

பொன்சேகவின் பதவிக்காலத்தில் 4786 இராணுவ அதிகாரிகளை இராணுவ நீதிமன்றத்தில் நிறுத்தியதாகவும், இவர்களில் கிழக்கில் புலிகளுக்கு எதிரான கிழக்கு போரை முன்னின்று நடத்திய மேஜர் ஜெனரல் பராக்கிரம பன்னிபிட்டியவும் அடங்குவார் எனவும் அரசு தரப்பினால் குற்றம் சுமத்தப்பட்டதை தொடர்ந்தே சரத் பொன்சேக இக்கருத்துக்களை வெளியிட்டுள்ளார்.