மண்புழு (Earthworm)

**சிவா** · **சிவா** Sun 22 Aug 2010 - 4:59

மண்ணில் அடங்கியிருக்கும் உயிர்ச் சத்துக்களின் மிச்சங்களையும் பாக்டீரியாக்களையும் தின்றே மண்புழுக்கள் உயிர் வாழ்கின்றன. மண்புழுக்கள் தங்கள் தோல் மூலமாக சுவாசிக்கின்றன. அதனால் வாயுப் பரிமாற்றம் சுலபமாக நடப்பதற்காக, அவற்றின் தோல் மெல்லியதாக இருக்க வேண்டிய அவசியமிருக்கிறது. ஆனால் இதன் மூலம் மற்றொரு பிரச்சினையிருக்கிறது. வறண்ட மண்ணில் கிடந்து காற்றைச் சுவாசித்தால், உடம்பில் உள்ள நீரை இழந்து மண்புழு இறந்துவிடும். எனவே ஈரமான மண்ணில் மட்டும்தான் மண்புழுக்களால் உயிர் வாழ முடியும்.

மண்ணைத் துளைப்பதற்கான பிரத்தியேக உறுப்பு எதுவும் மண்புழுவிற்கு இல்லை. ஆயினும் அதனால் ஓரளவு கடினமான மண்ணைக்கூட சுலபமாக துளைத்துச் செல்ல முடியும்.

உடல் தசைகளைத் தொடர்ச்சியாக விரித்துச் சுருக்குவதன் மூலம் அவை மண்ணைத் துளைத்து உள்ளே செல்கின்றன. தசைகள் சுருங்கி விரிவதனால் கிடைக்கும் சக்தியைக் கொண்டு மண்புழு தன் தலையை மண்ணில் புகுத்தி முன்னே செல்கிறது.

மண்ணைத் துளைத்துச் செல்வதற்கிடையில் மண்புழு கொஞ்சம் மண்ணைத் தின்கிறது. மண்ணில் அடங்கியிருக்கும் உயிர்ச் சத்துக்களை ஈர்த்துக் கொண்ட பிறகு மீந்த மண்ணை அது வெளியேற்றுகிறது. இப்படி வெளியேற்றுகிற மண் மிகவும் வளம் நிறைந்ததாயிருக்கும். வருடம் தோறும் ஏக்கர் ஒன்றிற்கு ஏழு முதல் பதினாறு டன் மண்வரை மண்புழு இப்படி வெளியேற்றுகிறது.