உறவு கொண்டாலும் பலாத்காரம்தான்

நவீன் · நவீன் Fri Aug 20, 2010 10:25 pm

புதுடெல்லி : மைனர் பெண் ஒப்புதலுடன் உறவு கொண்டாலும் அது பலாத்காரமாகத்தான் கருதப்படும் என்று கூறி, வாலிபருக்கு 5 ஆண்டு சிறைத்தண்டனையை மாவட்ட நீதிமன்றம் விதித்துள்ளது. டெல்லியைச் சேர்ந்தவர் விமலா. (பெயர் மாற்றப்பட்டுள்ளது) பள்ளி மாணவியான விமலாவுக்கும், காஜியாபாத்தைச் சேர்ந்த கார் டிரைவர் ஸ்ரீகாந்த்துக்கும் பழக்கம். 10.12.2009 அன்று விமலாவிடம் ஆசை வார்த்தைகளை கூறி, பள்ளியிலிருந்து காரில் அழைத்துச் சென்றார். காஜியாபாத்துக்கு ஒரு வீட்டுக்கு அழைத்துச் சென்று, விமலாவை தங்க வைத்தார்.இதனிடையே, மகள் வீடு திரும்பாததால், போலீசில் தந்தை புகார் அளித்தார். போலீசார் தீவிர தேடுதல் வேட்டை நடத்தி, விமலாவை மீட்டனர். விசாரணையில், வீட்டில் 6 நாட்கள் அடைத்து வைத்து, ஆசை வார்த்தைகளை கூறி விமலாவுடன் ஸ்ரீகாந்த் உடலுறவு கொண்டது தெரியவந்தது. கடத்தல், பாலியல் பலாத்காரம் ஆகிய பிரிவுகளில் வழக்கு பதிந்து ஸ்ரீகாந்த்தை போலீசார் கைது செய்தனர்.இது தொடர்பான வழக்கு மாவட்ட செசன்ஸ் நீதிமன்றத்தில் நடந்து வந்தது. அப்போது, ஸ்ரீகாந்த் தரப்பு வக்கீல் வாதிடுகையில், “விமலாவை ஸ்ரீகாந்த் கடத்தவும் இல்லை. பலாத்காரம் செய்யவும் இல்லை. விமலாவின் ஒப்புதலுடன் காஜியாபாத்துக்கு அழைத்துச் சென்றார். அவரது ஒப்புதலோடுதான் உறவும் கொண்டார். அதனால் ஸ்ரீகாந்த்தை விடுவிக்க வேண்டும்“ என்று வலியுறுத்தினார். இரு தரப்பு வாதத்தையும் கேட்ட பின், நீதிபதி எஸ்.பி.கார்க் அளித்த தீர்ப்பு வருமாறு:பள்ளியிலிருந்து விருப்பத்தின்பேரில்தான் ஸ்ரீகாந்த்துடன் விமலா சென்றுள்ளார்.வழக்கின் ஆவண ங்களில், விமலாவை கட்டாயப்படுத்தி கடத்திச் சென்று பலாத்காரம் செய்ததாக எதுவும் இல்லை. ஆனாலும், விமலா பலாத்காரம் செய்யப்பட்ட தினத்தன்று அவருக்கு 16 வயது கூட ஆகவில்லை என்பதை சந்தேகத்துக்கிடமின்றி போலீஸ் தரப்பு நிரூபித்துள்ளது. உடன் சென்றது,உறவு கொண்டது எல்லாமே பெண்ணின் ஒப்புதலோடு நடந்தாலும், அந்தச் செயல்களை சட்டம் ஒருபோதும் அனுமதிக்காது. விமலாவைக் காணாமல் அவரை பெற்றவர்களும், குடும்பத்தினரும் பதறியதை நீதிமன்றம் கருத்தில் கொள்கிறது. மைனர் பெண்ணின் ஒப்புதலோடு உறவு கொண்டாலும் அது பலாத்காரமாகத்தான் கணக்கில் கொள்ளப்படும். விமலாவின் அப்பாவித்தனத்தையும், முதிர்ச்சியற்ற தன்மையையும் தனக்கு சாதகமாக்கி கொண்ட ஸ்ரீகாந்த்துக்கு 5 ஆண்டு சிறைத்தண்டனையும், ரூ.2 ஆயிரம் அபராதமும் விதிக்கப்படுகிறது.இவ்வாறு நீதிபதி கார்க் தீர்ப்பளித்தார்.