ஓப்பன் யுனிவர்சிட்டி பட்டங்கள் செல்லாது! அரசு அறிவிப்பு

சென்னை:
தமிழகத்தில் இனி பள்ளிப் படிப்பை முடிக்காமல் நேரடியாக திறந்தநிலை பல்கலை
கழகங்களில் தேர்வெழுதி பெறும் பட்டங்கள் அரசுப் பணிக்கு செல்லாது என
தமிழக அரசு அரசாணை வெளியிடப்பட்டுள்ளது.


தமிழகத்தில் பள்ளிப் படிப்பு அதாவது பத்தாம் வகுப்பு, பிளஸ் டூ
படிக்காமலேயே திறந்தநிலை பல்கலைக்கழகங்கள் மூலம் பட்டங்கள் பெறும் முறை
உள்ளது. எட்டாம் வகுப்பு வரை படித்தவர்கள் கூட திறந்த நிலை
பல்கலைக்கழகங்களில் படித்து எம்.ஏ. வரை பட்டம் பெறலாம். பத்தாம் வகுப்பு
வரை தேர்ச்சி பெறாதவர்கள் கூட அரசுப் பணிக்கான தேர்வெழுதி தேர்ச்சி பெற்று
விடுகின்றனர். பணியில் சேர்ந்ததும் திறந்த நிலை பல்கலைக்கழகங்கள் மூலம்
பட்டம் பெற்று பதவி உயர்வுக்கு முயற்சிக்கின்றனர்.

இந்த
நிலையை எதிர்த்து, சென்னை உயர் நீதிமன்றத்தில் கடந்த இரண்டு ஆண்டுகளுக்கு
முன்பு வழக்கு தொடரப்பட்டது. வழக்கை விசாரித்த உயர்நீதிமன்றம், "பள்ளிப்
படிப்பை முடிக்காமல் திறந்தநிலை பல்கலைக்கழகங்களில் படித்தவர்களை அரசுப்
பணிக்கு எடுக்கக் கூடாது' எனக் கூறியது. இந்தப் பிரச்னை உச்ச
நீதிமன்றத்துக்கு கொண்டு செல்லப்பட்டது. வழக்கை விசாரித்த நீதிமன்றம்,
சென்னை உயர் நீதிமன்றத்தின் உத்தரவை உறுதிப்படுத்தியது தமிழக அரசின் நிலை
என்ன? உச்ச நீதிமன்றத்தின் தீர்ப்பையடுத்து தமிழகத்தில் உள்ள அரசுத்
துறைகளில் பெரும் பரபரப்பு ஏற்பட்டது. ஆனால், தமிழக அரசு இந்தப்
பிரச்னையில் எந்தக் கருத்தையும் தெரிவிக்காமல் இருந்தது.

இந்தச்
சூழலில், அண்மையில் செய்தியாளர்களைச் சந்தித்த உயர்கல்வித் துறை அமைச்சர்
க.பொன்முடி, "திறந்தநிலை பல்கலைக்கழகங்களில் பெறும் பட்டம் அறிவை
வளர்ப்பதற்கு மட்டும்தான்' எனத் தெரிவித்திருந்தார். இந்நிலையில்,
தமிழ்நாடு அரசுப் பணியாளர் தேர்வாணையத்தின் குழுக் கூட்டம் கடந்த ஆண்டு
நடைபெற்றது. பல்கலைக்கழகங்கள் வழங்கும் பட்டங்கள் எந்தெந்தப்
பட்டங்களுக்கு இணையானது என்பதை முடிவு செய்யவதற்காகக் கூடியது

இந்தக்
கூட்டத்தில்,இளங்கலைப் பட்டங்களைப் படிக்காமல், திறந்தநிலை
பல்கலைக்கழங்கள் மூலம் நேரடியாக எம்.ஏ. போன்ற முதுகலைப் பட்டங்களைப்
படித்தால் அதை அரசுப் பணிகளுக்கு ஏற்றுக் கொள்ளக் கூடாது என முடிவு
செய்யப்பட்டது. இந்தக் முடிவை தமிழக அரசுக்கு தமிழ்நாடு அரசுப் பணியாளர்
தேர்வாணையம் அனுப்பி வைத்தது. இதை தீவிரமாக ஆராய்ந்த அரசு, பணியாளர்
தேர்வாணையத்தின் கருத்தை ஏற்பதாக அறிவித்துள்ளது. இதற்கான அரசு உத்தரவை
பணியாளர் மற்றும் நிர்வாக சீர்திருத்தத் துறைச் செயலாளர்
கே.என்.வெங்கடரமணன் பிறப்பித்துள்ளார்.