சைக்கிளுக்கு தனி பாதை 20 நாளில் தயாராகும்

சென்னை : அண்ணா நகரில் சைக்கிள்களுக்கு என தனியாக பாதை உருவாக்கப்படுகிறது. இன்னும் 20 நாளில் இந்த திட்டம் அறிமுகம் செய்யப்படும் என்று மேயர் மா.சுப்பிரமணியன் தெரிவித்தார். ‘‘உலகெங்கும் உள்ள கட்டமைப்புகளை காட்சிப்படுத்தும் நகர்ப்புற மறு உருவாக்கத் திட்டங்கள்’’ பற்றிய ஒலி&ஒளி மூலம் விளக்கமளிக்கும் கூட்டம், சென்னை எழும்பூரில் நேற்று நடந்தது. இந்த நிகழ்ச்சியை, கோபன்ஹேகன் நகரை சேர்ந்த கெஹல் ஆர்கிடெக்ட்ஸ் நிறுவனம் நடத்தியது. இதன் பிரதிநிதிகள் ஹென்னிங் தாம்சன், ஜெப்ரிசம் ஆகியோர் கோபன்ஹேகன், நியூயார்க் ஆகிய நகரங்களில் போக்குவரத்துக்கு சைக்கிள் பயன்படுத்துவதையும், அதற்கான கட்டமைப்புகள் எப்படி உருவாக்கப்பட்டது என்பதையும் விளக்கினர்.இந்த விளக்க கூட்டத்தில் மேயர் மா.சுப்பிரமணியன் பேசியதாவது: ஐரோப்பிய நாடுகளில் உள்ள மக்கள் தங்களது போக்குவரத்திற்கு சைக்கிள்களை அதிக அளவில் பயன்படுத்தி வருகிறார்கள். கோபன்ஹேகன் நகரில் நடந்த மேயர்கள் மாநாட்டில் பங்கேற்க சென்றபோது காண முடிந்தது. சுற்றுச்சூழலை பாதுகாக்கும் வகையில், மக்களின் சுகாதாரத்தை மேம்படுத்தும் வகையில், போக்குவரத்திற்கு சைக்கிள் பயன்படுத்த வேண்டும் என்று அந்த மாநாட்டில் வலியுறுத்தப்பட்டது.சென்னையை பொறுத்தவரை சைக்கிள் ஓட்டுபவர்கள் அதிகம் இருக்கிறார்கள். இருப்பினும் சைக்கிளில் செல்பவர்கள் பாதுகாப்பாக செல்லும் சூழ்நிலை இல்லை. அண்ணாநகரில் அதிக அளவில் பள்ளிகள் இருப்பதாலும், அந்த பள்ளிகளுக்கு செல்லும் மாணவர்கள் சைக்கிள்களை அதிக அளவில் பயன்படுத்துகின்றனர் என்பது தெரியவந்தது. எனவே, அண்ணாநகரில் சோதனை அடிப்படையில் 8 கி.மீ. நீளத்துக்கு சைக்கிள்களுக்கு என்று தனி பாதை அமைக்கப்பட உள்ளது. இதற்கான பூர்வாங்க ஆய்வுகளை, சென்னை கனெக்ட் அமைப்பு தொடங்கியுள்ளது. இன்னும் 20 நாளில் சைக்கிள்களுக்கான தனிப்பாதை அறிமுகம் செய்யப்படும்.சென்னை முக்கிய சாலைகளில் பப்ளிக் பிளாசா அமைக்கலாம். இந்த பப்ளிக் பிளாசாவில் பொதுமக்கள் கூடி பொழுது போக்கலாம். மாசற்ற பகுதியாக இருந்த தி.நகர் தற்போது வணிக பகுதியாக மாறிவிட்டது. இங்கு மாசு அதிகளவில் இருக்கிறது. எனவே தி.நகர் பகுதி மறுசீரமைப்பு செய்ய வேண்டிய நிலையில் இருக்கிறது. இதுபோன்ற திட்டங்களை செயல்படுத்த பொதுமக்களின் ஒத்துழைப்பு அவசியம். இவ்வாறு மேயர் பேசினார்.

கொஞ்சம் மற்ற மாவட்டங்களையும் கவனிக்க சொல்லுங்கப்பா