மாயமானவர் புதரில் பிணமாக கண்டெடுப்பு

கும்மிடிப்பூண்டி : ஒரு வாரத்திற்கு முன் மாயமானவர் ரயில்வே லைன் ஓரம்
பிணமாக கண்டெடுக்கப்பட்டார். அலட்சியமாக செயல்பட்ட போலீசாரை கண்டித்து
மீனவ கிராம மக்கள் போலீஸ் நிலையத்தை முற்றுகையிட்டு ஆர்ப்பாட்டம்
செய்தனர். கும்மிடிப்பூண்டி அடுத்த ஆரம்பாக்கம் அருகே உள்ள
பெத்தானியகுப்பம் மீனவ கிராமத்தை சேர்ந்த ராஜி மகன் சுந்தரம்(28).
மீஞ்சூர் அருகே உள்ள வல்லூர் அனல் மின் நிலையத்தில் வெங்டிங் வேலை
செய்தார். ஒப்பந்ததாரர் ராம்குமார்(36) என்பவரிடம் ஒப்பந்த அடிப்படையில்
வேலை பார்த்தார்.கடந்த இரண்டு மாதங்களாக சம்பள பாக்கி இருந்ததால் பலமுறை
ராம்குமாரிடம் சம்பளம் கேட்டு வாக்குவாதம் செய்துள்ளார். இதனால் ஒரு வார
காலம் வேலைக்கு செல்லாமல் சுந்தரம் வீட்டில் இருந்தார்.கடந்த 13ம் தேதி
சுந்தரத்தின் வீட்டிற்கு வந்த ராம்குமாரின் உதவியாளரான சபாஸ்டின்(35),
சம்பளம் தருவதாகக் கூறி சுந்தரத்தை அழைத்துச் சென்றார். அதன்பின் சுந்தரம்
வீடு திரும்பவில்லை.இது குறித்து ஆரம்பாக்கம் போலீஸ் நிலையத்தில்
சுந்தரத்தின் மனைவி காயத்ரி புகார் கொடுத்தார்.
அந்த புகாரில் எண்ணூரை
சேர்ந்த ஒப்பந்ததாரர் ராம்குமார், அவருடைய உதவியாளர்கள் ராம்பாபு,
சபாஸ்டின் ஆகிய மூன்று பேர் மீது சந்தேகம் இருப்பதாக
தெரிவித்திருந்தார்.அதன் அடிப்படையில் சபாஸ்டினை அழைத்து விசாரித்த
போலீசார் இரண்டு நாள் கழித்து அவர் குற்றமற்றவர் என்று கூறி
விடுவித்தனர்.இந்நிலையில் நேற்று முன்தினம் மீஞ்சூர் மற்றும் அத்திப்பட்டு
ரயில் நிலையம் இடையே ஒரு புதரில் சுந்தரத்தின் உடல் பல வெட்டுக்
காயங்களுடன் கண்டெடுக்கப்பட்டது.ரயில்வே போலீசார் உடலை கைப்பற்றி சென்னை
அரசு பொது மருத்துவமனையில் வைத்தனர்.தகவல் அறிந்த சுந்தரத்தின்
குடும்பத்தார் மற்றும் பெத்தானியகுப்பம் மீனவ கிராம மக்கள் ஒன்று திரண்டு
ஆரம்பாக்கம் போலீஸ் நிலையத்தை முற்றுகையிட்டனர்.சம்பந்தப்பட்ட நபரை
போலீசார் பிடித்து வந்து விசாரணை என்ற பெயரில் அலட்சியமாக செயல்பட்ட
போக்கை கண்டித்ததுடன், அவர்களை உடனடியாக கைது செய்ய வேண்டும் என்ற
கோரிக்கையை முன்வைத்தனர். 300க்கும் மேற்பட்ட மீனவ கிராம மக்கள் போலீஸ்
நிலையத்தை முற்றுகையிட்டதையடுத்து 100க்கும் மேற்பட்ட போலீசார்
ஆரம்பாக்கம் போலீஸ் நிலையத்தில் குவிக்கப்பட்டனர்.திருவள்ளூர்
ஏ.டி.எஸ்.பி., பாலு, பொன்னேரி டி.எஸ்.பி., ரங்கராஜன், ஆர்.டி.ஓ., குமார்,
தாசில்தார் முனியசாமி ஆகியோர் மக்களிடம் பேச்சுவார்த்தை
நடத்தினர்.அதன்பின் தனிப்படை அமைத்து நேற்று மதியம் சம்பந்தப்பட்ட மூன்று
பேரை போலீசார் கைது செய்தனர். சென்னை அரசு பொது மருத்துவமனையில் பிரேத
பரிசோதனை செய்து விசாரணை நடத்த இருப்பதாக போலீசார் தெரிவித்தனர்.