பார் அழகி மீது ஆசிட் வீசிய நடிகர் கைது

மும்பை : திருமணம் செய்யாமல் சேர்ந்து வாழ மறுத்த பீர் பார் அழகி மீது
ஆசிட் வீசிய நடிகர் கைது செய்யப்பட்டார். இந்தி, போஜ்புரியில் சில
திரைப்படங்களில் சிறிய வேடங்களில் நடித்தவர் பிரதாப் குப்தா. இவர் 5
ஆண்டுகளுக்கு முன்பு பீர் பாரில் வேலை பார்த்தார். அப்போது, அதே பாரில்
வேலை செய்த ஷாலின் கானும் இவரும் காதலித்தனர். திருமணம் செய்து கொள்ளாமல்
(லிவ்&இன்&ரிலேஷன்) சேர்ந்து வாழ்ந்தனர். பிறகு, பார் வேலையை
குப்தா விட்ட பிறகு இருவருக்கும் தொடர்பு அறுந்தது. 2 மாதங்களுக்கு முன்பு
ஷாலின் கானை எதிர்பாராத விதமாக சந்தித்தார் குப்தா. அவர் பின்னால் சுற்றத்
தொடங்கினார். மீண்டும் தன்னுடன் வந்து பழைய வாழ்க்கையை தொடரும்படி
வலியுறுத்தினார். ஆனால், தனக்கு ஒரு மகள் இருப்பதாக கூறி மறுத்து விட்டார்
ஷாலின்.

இதனால் ஆத்திரம் அடைந்த குப்தா, நேற்று முன்தினம் இரவு
ஷாலின் தனது வீட்டுக்கு சென்று கொண்டிருந்த போது அவருடைய முகத்தில் ஆசிட்
வீசினார். அலறித் துடித்த ஷாலினை சிலர் மருத்துவமனையில் சேர்ந்தனர். இது
தொடர்பாக வழக்கு பதிவு செய்த சமதா நகர் போலீசார், குப்தாவை கைது செய்தனர்.
ஆசிட் வீச்சால் ஷாலின் கானின் இடது கண் மோசமாக பாதிக்கப்பட்டு பார்வையை
இழக்கும் நிலை ஏற்பட்டுள்ளது.

குப்தாவுக்கு திருமணமாகி 2
குழந்தைகள் உள்ளன. காமோஷ், க்வாப் மற்றும் ஏ கைசா சன்சார் (போஜ்புரி) ஆகிய
படங்களில் சிறிய வேடங்களில் தலை காட்டியுள்ள குப்தா, ஷாலின் மீது ஆசிட்
வீசியதற்காக வருந்தவில்லை. அவர் கூறுகையில்,‘ ‘‘நான் அவளை தீவிரமாக
காதலிக்கிறேன். ஆனால், எனது பேச்சை கேட்கவில்லை. என்னை மதிக்காத அவள்,
அதற்கான விலையை கொடுத்தே ஆக வேண்டும்‘’’ என்றார்.