அரசு மருத்துவமனையில் அழுகும் மூதாட்டி உடல்

காஞ்சிபுரம்
: காஞ்சிபுரம் அரசு மருத்துவமனையில், ரயில்வே போலீசாரின் மெத்தனப்
போக்கால், ரயில் மோதி இறந்த மூதாட்டி உடல் அழுகி துர்நாற்றம் வீசுகிறது.
காஞ்சிபுரம்
மற்றும் சுற்றுப் பகுதியில் விபத்தில் சிக்குபவர்களின் உடல்கள்,
மருத்துவப் பரிசோதனைக்காக, காஞ்சிபுரம் அரசு தலைமை மருத்துவமனைக்கு கொண்டு
செல்லப்படுவது வழக்கம்.கடந்த 15 நாட்களுக்கு முன், காஞ்சிபுரம் -
அரக்கோணம் சாலையில் உள்ள கரியன் கேட் பகுதியில், தண்டவாளத்தை கடக்க முயன்ற
60 வயது மூதாட்டி மீது மின்சார ரயில் மோதியதில், அவர் அதே இடத்தில்
பலியானார். இரண்டு துண்டான மூதாட்டியின் உடலை ரயில்வே போலீசார்
கோணிப்பையில் கட்டி பரிசோதனைக்காக காஞ்சிபுரம் அரசு மருத்துவமனைக்கு
கொண்டு சென்றனர். அதன்பின் ரயில்வே போலீசார் மருத்துவமனைக்கு
செல்லவில்லை.அரசு மருத்துவமனை பிணவறையில் மூதாட்டியில் உடல் கோணிப்பையில்
கட்டி வைக்கப்பட்டுள்ளது. பிணவறை குளிர்சாதன வசதி செய்யப்பட்டிருந்தாலும்
அதிக நாட்களாகிவிட்டதால் மூதாட்டியின் உடல் அழுகத் துவங்கியது. கடந்த
இரண்டு நாட்களாக அப்பகுதியில் துர்நாற்றம் வீசத் துவங்கியுள்ளது.இது
குறித்து மருத்துவமனை ஊழியர்கள் ரயில்வே போலீசாருக்கு தகவல்
தெரிவித்துள்ளனர். ஆனால் அவர்கள் வரவில்லை.எனவே மருத்துவமனை ஊழியர்கள்
மூதாட்டி உடலை அப்புறப்படுத்த முடியாமல் தவித்து வருகின்றனர்.ரயில்வே
போலீசாரை கேட்டபோது," மூதாட்டி அடையாளம் தெரியாததால் அவரைத் தேடி யாரேனும்
வருகின்றனரா என பார்ப்பதற்காக மூதாட்டி உடலை மருத்துவமனையில்
வைத்துள்ளோம். 23ம் தேதி மூதாட்டி உடலை முறைப்படி அடக்கம் செய்ய நடவடிக்கை
எடுக்க உள்ளோம்' என்றனர்.