வெளிநாட்டு பைலட்களுக்கு மட்டும் சலுகை காட்டுவது சரியா? பரிசீலிக்க உத்தரவு

சென்னை:
தனியார் விமானங்களில் வெளிநாட்டு பைலட்கள் நியமனத்தில் குறைந்தபட்ச
அனுபவம், மருத்துவப் பரிசோதனை தளர்வு குறித்த ஆட்சேபனைகளை சிவில் விமானப்
போக்குவரத்து இயக்குனர் ஜெனரலிடம் தெரிவிக்கலாம் என்றும், அதை பரிசீலிக்க
வேண்டும் என்றும் சென்னை ஐகோர்ட் உத்தரவிட்டுள்ளது. இந்திய பைலட்கள் நலச்
சங்கம் சார்பில் தாக்கல் செய்யப்பட்ட மனு: சிவில் விமானப் போக்குவரத்துத்
துறை வெளியிட்ட உத்தரவின்படி, வெளிநாட்டு பைலட்களை தனியார் விமான
நிறுவனங்கள் நியமிக்கும் போது, அவர்களுக்கு 2,000 மணி நேரம் விமானத்தை
இயக்கிய அனுபவம் இருக்க வேண்டும் என்றும், குறிப்பிட்ட ரக விமானத்தை
இயக்குவதில் குறைந்தது 100 மணி நேரம் அனுபவம் இருக்க வேண்டும் என்றும்
கூறப்பட்டுள்ளது. குறிப்பிட்ட ரக விமானத்தை இயக்குவதில் 100 மணி நேரம்
அனுபவம் இருந்தால் போதுமானது என்ற நிபந்தனை சரியல்ல. இந்த 100 மணி நேர
அனுபவத்தை பெற, ஒரு மாத காலம் போதும்; இது மிகவும் குறைவாகும். ஆனால்,
இந்திய பைலட்களுக்கு குறைந்தபட்சம் 5,000 மணி நேரம் அனுபவம் இருக்க
வேண்டும். குறிப்பிட்ட ரக விமானங்களில், 1,000 மணி நேரம் அனுபவம் இருக்க
வேண்டும். வெளிநாட்டு பைலட்களுக்கு விதிக்கப்பட்டுள்ள அனுபவ நிபந்தனையானது
மிகவும் குறைவானது. இந்திய பைலட்களுக்கும், வெளிநாட்டு பைலட்களுக்கும்
இடையே பாரபட்சம் காட்டப்படுகிறது. இவர்களுக்கு இடையே ஒரே தரத்தை பின்பற்ற
வேண்டும். இந்திய பைலட்கள் 55, 57, 59, 60 வயதை எட்டும் போது, அவர்களுக்கு
கூடுதலாக மருத்துவப் பரிசோதனை நடத்தப்பட வேண்டும். இத்தகைய சோதனைகளுக்கு
வெளிநாட்டு பைலட்கள் உட்பட தேவையில்லை. வெளிநாட்டு பைலட்களுக்கு
குறைந்தபட்ச அனுபவத்தை விதித்தும், இந்திய, வெளிநாட்டு பைலட்களுக்கு இடையே
வெவ்வேறு மருத்துவப் பரிசோதனைகளை பின்பற்றுவது குறித்தும்,
பிறப்பிக்கப்பட்ட உத்தரவை ரத்து செய்ய வேண்டும். இந்த பாரபட்சமான
நிபந்தனைகளை உடனடியாக நிறுத்த உத்தரவிட வேண்டும். இந்திய பைலட்களுக்கு
இணையாக குறிப்பிட்ட ரக விமானங்களில் குறைந்தபட்ச அனுபவம் இல்லாத
வெளிநாட்டு பைலட்களை, தனியார் விமான நிறுவனங்களில் நியமிக்க தடை விதிக்க
வேண்டும். இவ்வாறு மனுவில் கூறப்பட்டுள்ளது. மனுவை தலைமை நீதிபதி இக்பால்,
நீதிபதி சிவஞானம் அடங்கிய "முதல் பெஞ்ச்' விசாரித்தது. மனுதாரர் சார்பில்
சீனியர் வக்கீல் வி.பிரகாஷ், வக்கீல் ரமாபிரியா, மத்திய அரசு சார்பில்
கூடுதல் சொலிசிட்டர் ஜெனரல் ரவீந்திரன் ஆஜராகினர். "முதல் பெஞ்ச்'
பிறப்பித்த உத்தரவு: பைலட்கள் நியமனம் தொடர்பான நகல் விதிமுறைகள், சிவில்
விமானப் போக்குவரத்து இயக்குனர் ஜெனரலின் வெப்சைட்டில்
வெளியிடப்பட்டுள்ளது என்றும் அதுகுறித்து கருத்துக்கள்
வரவேற்கப்பட்டுள்ளது என்றும் மத்திய அரசு தரப்பில் தெரிவிக்கப்பட்டது.
எனவே, ஆட்சேபனைகளை சம்பந்தப்பட்ட ஆணையத்தின் முன், மனுதாரர்கள் தாக்கல்
செய்யலாம். இந்த ஆட்சேபனைகளை மத்திய விமானப் போக்குவரத்து அமைச்சகம்,
சிவில் விமானப் போக்குவரத்து இயக்குனர் ஜெனரல் பரிசீலித்து, நான்கு
மாதங்களில் இறுதி செய்ய வேண்டும். இவ்வாறு "முதல் பெஞ்ச்'
உத்தரவிட்டுள்ளது.