பஸ்களில் தானியங்கி கதவு பொருத்தக் கோரி வழக்கு; பதிலளிக்க அரசுக்கு நோட்டீஸ்

சென்னை:
போக்குவரத்துக் கழகங்களின் பஸ்கள் அனைத்திலும் தானியங்கி கதவுகளை
பொருத்தக் கோரி, சென்னை ஐகோர்ட்டில் மனு தாக்கல் செய்யப்பட்டுள்ளது.
இதற்கு நான்கு வாரங்களில் பதிலளிக்கும்படி அரசுக்கும், போக்குவரத்துக்
கழகங்களுக்கும் நோட்டீஸ் அனுப்ப உத்தரவிடப்பட்டுள்ளது. நேதாஜி
போக்குவரத்து தொழிலாளர்கள் பாதுகாப்பு தொழிற்சங்கத்தின் தலைவர் அன்புராஜ்
தாக்கல் செய்த மனு: பல்வேறு பரிந்துரைகள் அடங்கிய மனுவை, கோவையில் உள்ள
தமிழ்நாடு போக்குவரத்துக் கழக நிர்வாக இயக்குனருக்கு அளித்தேன். சென்னை,
கோவை, திருச்சி, மதுரை போன்ற பெரிய நகரங்களில் அலுவலகம் செல்பவர்கள்,
கல்லூரி மற்றும் பள்ளி செல்லும் மாணவர்கள், ஓடும் பஸ்சில் ஏறி,
இறங்குகின்றனர். பஸ்சில் ஏறிய பின், படிக்கட்டில் நின்று விடுகின்றனர்.
ஓட்டுனர், நடத்துனர் அறிவுறுத்தினாலும் அவர்கள் கேட்பதில்லை. அறிவுரையை
இளைஞர்கள் பொருட்படுத்துவதில்லை. படிக்கட்டு பயணத்தில் நிறைய விபத்துகள்
ஏற்படுகின்றன. படிக்கட்டில் தொங்கிக் கொண்டு பயணம் செய்வதை தவிர்ப்பதற்காக
பஸ்சில் ஏறும், இறங்கும் வழிகளில் கண்டிப்பாக கதவுகள் பொருத்தப்பட
வேண்டும். பள்ளி, கல்லூரி மாணவர்களுக்கு இது மிகவும் பயனுள்ளதாக அமையும்.
தானியங்கி கதவுகளை பொருத்துவதன் மூலம், ஓடும் பஸ்சில் ஏறி, இறங்க
முடியாது. பொது மக்கள், நடத்துனர்களின் உயிருக்கு பாதுகாப்பாக அமையும்.
உக்கடத்தில் இருந்து கோம்பைகாட்டுபுதூருக்கு பஸ் சென்று கொண்டிருந்த போது,
பயணிகளுக்கு டிக்கெட் கொடுத்துக் கொண்டிருந்தார் வேலுசாரி என்கிற
நடத்துனர். ஒரு பயணி நிலை தடுமாறி நடத்துனரை பிடிக்க முயலும் போது, அவர்
தடுமாறி பஸ்சின் வெளியே விழுந்தார். அவருக்கு பலத்த காயம் ஏற்பட்டது.
இரண்டு லட்சத்துக்கும் மேல் மருத்துவச் செலவு ஏற்பட்டது. கதவுகள்
பொருத்தப்பட்டிருந்தால், இப்படி ஒரு விபத்தை தடுத்திருக்கலாம். மாணவர்கள்,
பயணிகள், நடத்துனர்களின் பாதுகாப்பான பயணத்துக்கும், பயணிகள் கூட்டத்தை
தவிர்க்கவும், பஸ்களில் தானியங்கி கதவுகள் பொருத்த வேண்டியது அவசியமானது.
எனவே, அனைத்து போக்குவரத்துக் கழகங்களின் பஸ்களிலும் கதவுகள் அல்லது
தானியங்கி கதவுகளை பொருத்தக் கோரி அளித்த மனுவை பரிசீலிக்க உத்தரவிட
வேண்டும். இவ்வாறு மனுவில் கூறப்பட்டுள்ளது. மனுவை தலைமை நீதிபதி இக்பால்,
நீதிபதி சிவஞானம் அடங்கிய "முதல் பெஞ்ச்' விசாரித்தது. மனுதாரர் சார்பில்
வக்கீல் ஜார்ஜ் வில்லியம்ஸ் ஆஜரானார். மனுவுக்கு நான்கு வாரங்களில்
பதிலளிக்கும்படி, போக்குவரத்துச் செயலர், கமிஷனர் மற்றும் போக்குவரத்துக்
கழகங்களின் நிர்வாக இயக்குனர்களுக்கு நோட்டீஸ் அனுப்ப, "முதல் பெஞ்ச்'
உத்தரவிட்டது.