வி.ஏ.ஓ., பதவிக்கு விண்ணப்பம்: கடைசி நாளில் கூட்டமோ கூட்டம்!

சென்னை: வி.ஏ.ஓ., தேர்வுக்கு விண்ணப்பம் செய்வதற்கு கடைசி நாளான நேற்று,
பூர்த்தி செய்த விண்ணப்பங்களை சமர்ப்பிக்கவும், புதிதாக விண்ணப்பங்களை
வாங்கவும் கூட்டம் அலைமோதியது. கடைசி நேரமான மாலை 5.45 மணிக்கு உச்சகட்ட
பரபரப்பு ஏற்பட்டது. அந்த நேரத்தி லும், பலர் ஓடிவந்து புதிதாக
விண்ணப்பங்களை வாங்கி, அவசரம், அவசரமாக பூர்த்தி செய்து
கொடுத்தனர்.போட்டித்தேர்வு மூலம் 2,653 வி.ஏ.ஓ.,க்களை தேர்வு செய்வதற்கான
அறிவிப்பு, கடந்த மாதம் 21ம் தேதி வெளியானது. 13 லட்சம் விண்ணப்பங்கள்
அச்சிடப்பட்டு, டி.என்.பி.எஸ்.சி., அலுவலகம் மற்றும் மாநிலம் முழுவதும்
உள்ள தபால் அலுவலகங்களில் வினியோகிக்கப்பட்டன. இத்தேர்வுக்கு பத்தாம்
வகுப்பு தகுதியாக நிர்ணயிக்கப்பட்டதாலும், 40 வயது வரை விண்ணப்பிக்க
வாய்ப்பு இருந்ததாலும் ஏராளமானோர் விண்ணப்பித்தனர். இருபது வயது முதல் 40
வயது, 45 வரை உள்ளவர்கள் கூட விண்ணப்பித்தனர்.நேற்று கடைசி நாள் என்பதால்,
ஏற்கனவே விண்ணப்பங்களை வாங்கி பூர்த்தி செய்து சமர்ப்பிக்காதவர்கள்
எல்லாம் நேற்று, தபால் அலுவலகங்களுக்கும், சென்னை மற்றும் சுற்றுப்புற
பகுதிகளைச் சேர்ந்தவர்கள் டி.என்.பி.எஸ்.சி., அலுவலகத்திற்கும்
படையெடுத்தனர்.
டி.என்.பி.எஸ்.சி., அலுவலகத்தில் நேற்று காலையில்
இருந்தே கூட்டம் அலைமோதியது. மாலை 4 மணிக்கு பிறகு கூட்டம் மேலும்
அதிகரித்தது. பூர்த்தி செய்த விண்ணப்பங்களை வாங்கும் பணியில் ஏராளமான
தற்காலிக ஊழியர்கள் ஈடுபட்டனர். அதேபோல், மாலை 5 மணிக்குப் பிறகும்
ஏராளமானோர் புதிதாக விண்ணப்பங்களை வாங்கி அவசரம், அவசரமாக அங்கேயே
பூர்த்தி செய்து கொடுத்தனர். மாலை 5.45 மணியுடன் விண்ணப்பிக்க நேரம்
முடிவதாக அறிவிக்கப்பட்டிருந்ததால், 5.30 மணிக்கு அலுவலக ஊழியர்கள்,
விண்ணப்பம் பூர்த்தி செய்து கொண்டிருந்தவர்களை உஷார்படுத்தினர்.
"எல்லாரும் கையெழுத்தை போட்டுவிட்டு, மற்ற விவரங்களை பூர்த்தி செய்யுங்க'
என திரும்பத், திரும்ப கூறினர். இந்த சந்தர்ப்பத்தை பயன்படுத்தி,
விண்ணப்பங்களை பூர்த்தி செய்யும் பணியை சிலர் மின்னல் வேகத்தில் செய்து
கொடுத்தனர். ஒரு விண்ணப்பத்திற்கு 20 ரூபாய் வீதம் வசூலித்தனர்.
இதற்கிடையே,
சென்னை மற்றும் புறநகர்களில் இருந்து தபால் அலுவலக வேன்களில் மூட்டை,
மூட்டையாக பூர்த்தி செய்யப்பட்ட விண்ணப்பங்கள் வந்து இறங்கின. அவை
அனைத்தும், வளாகத்தில் உள்ள பல்வேறு அறைகளில் வைக்கப்பட்டுள்ளன. இது
குறித்து, அலுவலக பணியாளர்கள் கூறும்போது, "இதுவரை 8 லட்சம் விண்ணப்பங்கள்
வந்துள்ளன. எனினும், இன்னும் பார்சல் பிரிக்காத விண்ணப்ப மூட்டைகள்
ஏராளமாக உள்ளன. மேலும், பல்வேறு மாவட்டங்களில் உள்ள தபால் அலுவலகங்களில்
இருந்தும் விண்ணப்பங்கள் வரும். அனைத்து மூட்டைகளையும் பிரித்து
விண்ணப்பங்களில் முத்திரையிட்டு, எண்ணிக்கை செய்தால் தான் பெறப்பட்ட மொத்த
விண்ணப்பங்களின் எண்ணிக்கை தெரியவரும். எப்படியும், 10 லட்சத்திற்கும்
அதிகமாக விண்ணப்பங்கள் பெறப்பட்டிருக்கும் என நினைக்கிறோம்' என்றனர்.
விண்ணப்பங்களை சரிபார்த்து முடித்தபின், தேர்வு நடைபெறும் தேதி
அறிவிக்கப்படலாம் என கூறப்படுகிறது. டிசம்பர் இறுதியிலோ அல்லது ஜனவரி
முதல் வாரத்திலோ தேர்வு நடைபெறலாம் என தெரிகிறது. 2,653 பணியிடங்களுக்கு,
10 லட்சத்திற்கும் அதிகமானவர்கள் விண்ணப்பம் செய்திருப்பது, பெரும்
பரபரப்பை ஏற்படுத்தியுள்ளது.10 கோடி ரூபாய் வருமானம்: பதிமூன்று லட்சம்
விண்ணப்பங்களை அச்சடித்ததில், 12 லட்சத்திற்கும் அதிகமான விண்ணப்பங்கள்
விற்பனையாகி இருக்கும் என கூறப்படுகிறது. விண்ணப்பத்தின் விலை 30 ரூபாய்;
தேர்வுக் கட்டணம் 75 ரூபாய். இதில், எஸ்.சி.,-எஸ்.டி., பிரிவினருக்கு
தேர்வுக் கட்டணம் கிடையாது. குறைந்தபட்சம் 10 லட்சம் பேர் கட்டணம்
செலுத்தியிருந்தாலும், விண்ணப்பங்களை வாங்கிய வகையில் 3 கோடி ரூபாயும்,
தேர்வுக் கட்டணமாக 7 கோடியே 50 லட்சம் ரூபாயும் என மொத்தம் 10 கோடியே 50
லட்சம் ரூபாய் டி.என்.பி.எஸ்.சி.,க்கு வருமானம் கிடைத்திருக்கும்.
தற்காலிக ஊழியர்கள் 100 பேர் நியமனம்: டி.என்.பி.எஸ்.சி., அலுவலகத்தில்
தற்காலிக ஊழியர்கள் 100 பேர் நியமனம் செய்யப்பட்டுள்ளனர். விண்ணப்பங்களை
பிரிப்பது, அடுக்குவது, விவரங்களை பூர்த்தி செய்வது என பல்வேறு
வேலைகளையும் இவர்கள் செய்கின்றனர். சம்பளமாக ஒரு நாளைக்கு 200 ரூபாய்
வழங்கப்படுகிறது. வேலையில்லாத பிளஸ் 2 மற்றும் பட்டதாரிகள் தற்காலிக
ஊழியர்களாக வேலை பார்த்து வருகின்றனர்.