துப்பாக்கி சுடும் போட்டியில் சென்னை தலைமையிட அணி சாம்பியன் மூன்று பதக்கம் வென்றார் ஜாங்கிட்

தூத்துக்குடி: தூத்துக்குடி, வல்லநாட்டில் நடந்த போலீசாருக்கான மாநில
துப்பாக்கி சுடும் போட்டியில், சென்னை தலைமையிட அணி சாம்பியன் பட்டம்
வென்றது. சென்னை புறநகர் போலீஸ் கமிஷனர் ஜாங்கிட், மூன்று வெள்ளிப்
பதக்கங்களை வென்றார். இங்குள்ள போலீஸ் துப்பாக்கிச் சுடும் தளத்தில்,
போலீசாருக்கு மாநில அளவிலான துப்பாக்கி சுடும் போட்டிகள் கடந்த 18ம் தேதி
துவங்கி நேற்று வரை நடந்தன. தென்மண்டலம், மத்திய மண்டலம், மேற்கு மண்டலம்,
வடக்கு மண்டலம், சென்னை மாநகர், சென்னை புறநகர், ஆயுதப்படை, சென்னை
தலைமையிடம் ஆகிய எட்டு அணிகளைச் சேர்ந்த ஆண், பெண் என இரு பிரிவுகளிலும்
உயரதிகாரிகள் முதல், போலீசார் வரை கலந்து கொண்டனர். ரைபிள், பிஸ்டல்,
கார்பைன் ரக துப்பாக்கிகளில் பல்வேறு நிலைகளில் போட்டிகள் நடத்தப்பட்டன.
தலைமையிட அணி சாம்பியன்: இம்மூன்று பிரிவு போட்டிகளிலும் 2,400க்கு 1,685
புள்ளிகள் பெற்று சென்னை தலைமையிட அணி (கமாண்டோ படை) ஒட்டு மொத்த
சாம்பியன் பட்டம் வென்றது. ஆயுதப்படை அணி 1,673 புள்ளிகளுடன்
இரண்டாமிடத்தையும், தென் மண்டல அணி 1,585 புள்ளிகளுடன் மூன்றாமிடத்தையும்
பெற்றன. மூன்று பதக்கம் வென்றார் ஜாங்கிட்: கார்பைன் துப்பாக்கி மூலம் 25
கஜம் பதுங்கி சுடுதலில், ஆயுதப்படை எஸ்.ஐ., நாகராஜன் முதலிடம் பிடித்து
தங்கப் பதக்கமும், சென்னை புறநகர் போலீஸ் கமிஷனர் ஜாங்கிட் இரண்டாமிடம்
பிடித்து வெள்ளிப் பதக்கமும் வென்றனர். இதே பிரிவில் 50 கஜம் முட்டுப்
போட்டு சுடுதலில் ஆயுதப்படை எஸ்.ஐ., நாகராஜன் தங்கப் பதக்கமும், ஜாங்கிட்
வெள்ளிப் பதக்கமும் வென்றனர். கார்பைன் பிரிவில் சிறந்த சுடுவீரர்களில்
ஆயுதப்படை எஸ்.ஐ., நாகராஜன் தங்கமும், ஜாங்கிட் வெள்ளிப் பதக்கமும்
வென்றனர். பரிசளிப்பு விழாவில், ஐ.ஜி., தமிழ்செல்வன் (செயலாக்கம்),
ஜாங்கிட் ஆகியோர், வெற்றி பெற்ற அணிகளுக்கு கேடயம், வீரர்களுக்கு பரிசு
வழங்கினர். மத்திய தொழில் பாதுகாப்பு படை டி.ஐ.ஜி., ஜெயந்த் முரளி, நெல்லை
டி.ஐ.ஜி., சண்முக ராஜேஸ்வரன், நெல்லை மாநகர போலீஸ் கமிஷனர் அபய்குமார்
சிங், தூத்துக்குடி எஸ்.பி., கபில்குமார் சரட்கர், அதிகாரிகள் கலந்து
கொண்டனர். இப்போட்டியில் வெற்றி பெற்றவர்கள், அகில இந்திய துப்பாக்கி
சுடும் போட்டியில் தமிழகத்தின் சார்பில் பங்கேற்கவுள்ளனர்.