தண்ணீர் பிடிப்பதில் முன்விரோதம் நேற்றும் ஒருவர் கொலை

திருநெல்வேலி: பொது குழாயில் தண்ணீர் பிடிப்பதில் ஏற்பட்ட தகராறில்
ஏற்பட்ட முன்விரோதத்தில் நேற்று ஒருவர் கொலை செய்யப்பட்டார். ஏற்கனவே
ஐந்து பேர் கொலை செய்யப்பட்டுள்ளது குறிப்பிடத்தக்கது. திருநெல்வேலி
மாவட்டம் அம்பாசமுத்திம் அருகே உள்ள மூலச்சி கிராமத்தை சேர்ந்தவர்
பெருமாள்பாண்டியன்(38). பாட்டாளி மக்கள் கட்சியின் அம்பை ஒன்றிய செயலராக
இருந்தார். இவரது உறவினர் சித்திரபுத்திரன். இருவரது குடும்பத்தினரும் ஊர்
பொது குடிநீர் பைப்பில் தண்ணீர் பிடிக்கும் போது 2007ல் தகராறு ஏற்பட்டது.
இதில் ஆத்திரமுற்ற பெருமாள்பாண்டியன், சித்திரபுத்திரனின் உறவினர்
சுப்பிரமணியன் என்பவரை 2007 ஜூலையில் வெட்டிக் கொலை செய்தார். இந்த
வழக்கில் பெருமாள்பாண்டியன் ஆதரவாளர்கள் 2008 பிப்ரவரி 26ல் சாத்தான்குளம்
கோர்ட்டில் ஆஜராகி கையெழுத்துபோட்டு வந்தனர். அவர்களை பின்தொடர்ந்து சென்ற
சித்திரபுத்திரன் தரப்பினர் பெருமாள்பாண்டியன் ஆதரவாளர்களை கொலை செய்ய
முயற்சித்தனர். ஆனால் பெருமாள்பாண்டியன் தரப்பினர் எதிர்தாக்குதல்
நடத்தியதில் சித்திரபுத்திரன் ஆதரவாளர்கள் பெருமாள், பாபநாசம் ஆகியோர்
கொலை செய்யப்பட்டனர். கோவை மாவட்டம் பல்லடத்தில் இருந்த
பெருமாள்பாண்டியனின் ஆதரவாளர் சின்னதம்பி என்பவரும், மூலச்சியில் டீ கடை
நடத்தி வந்த சுப்பையா என்பவரும் அடுத்தடுத்து,கொலை செய்யப்பட்டனர். ஐந்து
கொலைகளை தொடர்ந்து நேற்று ஆறாவதாக பெருமாள்பாண்டியன் கொலை செய்யப்பட்டார்.
அம்பாசமுத்திரம் கோர்ட்டில் நேற்று ஒரு வழக்கில் கையெழுத்து போட்டுவிட்டு
மோட்டார் சைக்கிளில் சென்றுகொண்டிருந்த பெருமாள்பாண்டியனை,
சித்திரபுத்திரன் ஆதரவாளர்கள் காரில் பின்தொடர்ந்து வந்து வழிமறித்தனர்.
உயிருக்கு தப்பி ஓடியவரை பிடித்து கல்லிடைகுறிச்சி, கோட்டைத் தெருவில்
பட்டப்பகலில் 12 மணிக்கு பொதுமக்கள் பார்க்கும்போது கழுத்தை அறுத்து கொலை
செய்து தலையை ரோட்டில் வீசிச் சென்றனர். தகவல் அறிந்ததும் போலீசார் அந்த
காரை துரத்தினர். இருப்பினும் அந்த கும்பல் காரை விட்டுவிட்டு
தலைமறைவாகியது. போலீசார் காரை கைப்பற்றினர். கொலை செய்யப்பட்ட
பெருமாள்பாண்டியனின் ஆதரவாளர்கள் கொலையாளிகளை உடனடியாக கைது செய்ய
வலியுறுத்தி நேற்று கல்லிடைகுறிச்சியில் போலீஸ் ஸ்டேஷன் முன் மறியலில்
ஈடுபட்டனர். சித்திரபுத்திரனை(75) போலீசார் பிடித்து விசாரிக்கின்றனர்.