மின் இணைப்பு பெற்று நில அபகரிப்பு முயற்சி தகவல் பெறும் உரிமைச் சட்டத்தில் அம்பலம்

சென்னை: அடுத்தவர் நிலத்தில் குடிசை போட்டு, போலி ஆவணங்கள் மூலம் மின்
இணைப்பு பெற்று, நிலத்தை அபகரிக்கும் முயற்சி, தகவல் பெறும் உரிமைச்
சட்டத்தால் அம்பலமாகியுள்ளது. வளசரவாக்கம் கைகான் குப்பம் வ.உ.சி.,
தெருவில் கஜேந்திரன் என்பவர், தனக்கு சொந்தமான இடத்தில் வசித்து வந்தார்.
இவரது மகன் ஜெய்சங்கர்(22). கஜேந்திரன், அவரது மனைவி ஆகியோர் இறந்து விட,
திருவள்ளூரில் உள்ள தன் உறவினர் வீட்டிற்கு ஜெய்சங்கர் சென்று விட்டார்.
அங்கேயே வசித்து வந்தவர், சில ஆண்டுகளுக்குப் பிறகு, தன் சொந்த இடத்தைப்
பார்வையிட வந்தபோது, அதிர்ச்சி காத்திருந்தது. அந்த இடத்தில் வேறொரு நபர்
குடிசை போட்டு மின் இணைப்பும் பெற்று, வசித்து வந்துள்ளார். இவர்கள் முன்
வசித்தபோது மின் இணைப்பு கிடையாது. இதுகுறித்து செய்வதறியாது திகைத்த
ஜெய்சங்கர், கே.கே.நகர் பகுதியில் உள்ள மின் வாரிய அலுவலகத்திற்கு தகவல்
பெறும் உரிமைச் சட்டத்தின்படி, மேற்படி இடத்திற்கு மின் இணைப்பு கொடுத்த
விவரத்தைக் கேட்டார். மின் வாரியம் அளித்த பதிலில், போலியான ஆவணங்களைக்
காட்டி, மின் இணைப்பு பெற்றது தெரிந்தது. தன் சொத்திற்கு சம்பந்தமில்லாத
நபருக்கு, மின் இணைப்பு வழங்கியது குறித்து, சம்பந்தப்பட்ட மின்வாரிய
உதவிப் பொறியாளரிடம் அவர் விளக்கம் கேட்டார். இதையடுத்து மின் வாரிய
அதிகாரிகள் சம்பந்தப்பட்ட இடத்தை நேரில் வந்து ஆய்வு செய்தனர். அப்போது,
போலியான ஆவணங்களை சமர்ப்பித்து, மின் இணைப்பு பெற்றது உறுதியானது.
இதையடுத்து சம்பந்தப்பட்ட மின் இணைப்பை துண்டிக்க மின்வாரிய அதிகாரிகளிடம்
ஜெய்சங்கர் மனு கொடுத்தார். இதுகுறித்து மின் வாரிய அதிகாரிகள்
கூறும்போது, ""மின் இணைப்பு கேட்டு மனு செய்யும் போது, நேரில் வந்து ஆய்வு
செய்து தான் மின் இணைப்பு வழங்குகிறோம். சென்னை மற்றும் புறநகர்ப்
பகுதிகளில் நில மோசடிகள் அதிகரித்து வருகின்றன. நில உரிமையாளர்கள் தான்
விழிப்போடு இருக்க வேண்டும்,'' என்றனர்.