தமிழக பகுதியில் கழிவுகளை கொட்டி கேரளா பகுதியினர் அத்துமீறல்

தேவாரம்: தேவாரம் பெரியதேவி கண்மாயில், கேரளாவிலிருந்து மருத்துவக்
கழிவுகளை கொண்டு வந்து சிலர் கொட்டிச் சென்றுள்ளனர். தமிழக பகுதியை
குப்பைக் கிடங்காக மாற்றும் இம்முயற்சியை தடுக்க சம்பந்தப்பட்ட அதிகாரிகள்
நடவடிக்கை எடுக்க வேண்டும். தேவாரம் - உத்தமபாளையம் ரோட்டில் பெரியதேவி
கண்மாய் மேற்கு கரைப் பகுதி உள்ளது. இந்த கரையில் வைகுண்டப் பெருமாள்
கோவில் எதிரில், இரவு நேரத்தில் வாகனத்தில் வந்தவர்கள் கழிவுகளை கொட்டிச்
சென்றுள்ளனர். சிறிது நேரத்தில், கழிவுகள் கொட்டப்பட்ட பகுதியில்
துர்நாற்றம் வீசியது. அப்பகுதியில் உள்ள செங்கல் சூளை பணியாளர்கள் சென்று
பார்த்தனர். மருத்துவமனைகளில் அறுவை சிகிச்சைக்குப் பின் மீதமாகும் பஞ்சு,
முடி, உடல் பாகங்களின் பகுதி ஆகியன கிடந்துள்ளன. பேரூராட்சி கவுன்சிலர்
பீர் முகமது கூறியதாவது; பெரியதேவி கண்மாயை கழிவை கொட்டி வைக்கும்
பகுதியாக பயன்படுத்துகின்றனர். கயிறு தொழிற்சாலைகள் தென்னை நார்
கழிவுகளையும், கறிக்கோழி கடைக்காரர்கள் கோழிக் கழிவுகளையும் கொண்டு வந்து
கொட்டுகின்றனர். இந்த விவரம் தெரிந்து கேரளா பகுதியிலிருந்து மருத்துவக்
கழிவுகளையும் கொண்டு வந்து கொட்டியுள்ளனர். கறிக்கோழி கழிவுகளை
திண்பதற்காக, இப்பகுதியில் சுற்றித் திரியும் நாய்கள் மருத்துவக் கழிவுகளை
தின்று விடக்கூடாது என்பதற்காக, கரைப் பகுதியிலிருந்த மண்ணை போட்டு
மூடப்பட்டுள்ளது. இவ்வாறு பீர் முகமது கூறினார். கேரளாவிலிருந்து பல்வேறு
தமிழக செக் போஸ்ட்களை கடந்து தான் மருத்துவக் கழிவுகளை ஏற்றிக் கொண்டு
வாகனம் வந்துள்ளது. போலீஸ் ரோந்து வாகனம் உள்ளிட்ட யாரும் கண்டு
கொள்ளாததால், தமிழக பகுதியை குப்பைக் கிடங்காக கேரளாவை சேர்ந்தவர்கள்
பயன்படுத்துவது தொடர்கிறது. இனியாவது சம்பந்தப்பட்ட அதிகாரிகள்
விழித்துக்கொண்டு, தமிழக பகுதியை குப்பைக் கிடங்காக மாற்றும் கேரளா
பகுதியினரின் அத்துமீறலை தடுக்க நடவடிக்கை எடுக்க வேண்டும்.