தமிழர்கள் தடுத்தால் பழைய பிள்ளையானாவேன் - சிவனேச துரை சந்திரகாந்தன் எச்சரிக்கை

மட்டக்களப்பில் தமிழர்களின் காணிகள் என சர்ச்சைக்குள்ளான பிரதேசங்களில், அமைக்கப்படவுள்ள முஸ்லீம் மக்களுக்கான மாதிரிக்கிராமத்தை தடுக்க நினைத்தால் பழைய பிள்ளையானை பார்க்க வேண்டி வருமென கிழக்கு மாகாண முதலமைச்சர் சிவனேசதுரை சந்திரகாந்தன் எச்சரித்துள்ளார்.
கடந்த 18 ம் திகதி அவருடைய பிறந்த நாளையொட்டி மட்டக்களப்பு ஆரையம்பதியில் உள்ள ஆரையம்பதி சமூக அபிவிருத்தி சங்கத்தின் ஏற்பாட்டில் வாழ்த்து விழா நடைபெற்றது.

அப்போது, அந்த விழாவின் ஏற்பாட்டு குழுவினாரால் முதலமைச்சருக்கு கோரிக்கை அடங்கிய மகஜர் கொடுக்கப்பட்டது.

அதில், ஆரையம்பதிக்கு மேற்கே உள்ள காங்கேயானடைக்கும், மாவிலங்கத்துறைக்கும் இடையில் உள்ள தமிழர்களின் காணிகளில் முஸ்லீம்களுக்கான ஒரு மாதிரி கிராமம் அமைக்கப்பட ஏற்பாடாகி வருவதாகவும், இதை உடனடியாக தடுத்து நிறுத்தி தமிழர்களின் காணியை அவர்களிடம் ஒப்படைக்க வேண்டுமென குறிப்பிடப்பட்டிருந்ததாக தெரிவிக்கப்படுகிறது.

அந்த மகஜரை வாசித்த முடித்த பின்பு முதலமைச்சர், விழா நடைபெற்ற மேடை மேல் ஏறி நின்ற படி '“முஸ்லிம் மக்களுக்கான மாதிரிக் கிராமம் அமைக்கப்படுவதை யாராலும் தடுக்க முடியாது. இதையும் மீறி தடுக்கும் முயற்சியில் யாராவது தமிழர்கள் ஈடுபட்டால் அதை எதிர்கொள்வதற்கு நான் ஒரு முதலமைச்சராக இன்றி பழைய பிள்ளையானாக மாற வேண்டி வரும்” என உரத்த குரலில் எச்சரிக்கை பாணியில் கூறியதாகவும், இதனால் அங்கிருந்த கிராமத்து மக்கள் அதிர்ச்சி அடைந்ததாகவும் தெரிவிக்கப்படுகிறது.

முதலமைச்சரின் இந்த எச்சரிக்கையினால் அங்குள்ள தமிழர்களுக்கும், குறித்த அந்த அமைப்பும் குழப்பமடைந்துள்ளதுடன், அதிருப்தியும் அடைந்துள்ளதாக தெரிவிக்கப்படுகிறது.