பிச்சைக்காரர் பலி 18 ஆக உயர்ந்தது!

பெங்களூர் : பெங்களூர் அருகே உள்ள பிச்சை எடுப்போர் மறுவாழ்வு மையத்தில் வாந்தி பேதியால் பாதிக்கப்பட்ட மேலும் 6 பேர் நேற்று இறந்தனர். இதன் மூலம், இந்த மையத்தில் இறந்தவர்கள் எண்ணிக்கை 18 ஆக உயர்ந்துள்ளது. கர்நாடகாவில் பெங்களூர் அருகே உள்ளது காமாட்சிபாளையா. இங்கு பிச்சை எடுப்போர் மறுவாழ்வு மையம் உள்ளது. சமூக நலத்துறையின் கீழ் இயங்கும் இந்த மையத்தில் 922 பேர் தங்கி உள்ளனர்.

பெங்களூர் நகரில் பிச்சை எடுப்பவர்கள் அழைத்து வரப்பட்டு தங்குமிடமும், உணவும் அளிக்கப்படுகிறது. தேவைப்பட்டவர்கள் தொழில் பயிற்சி அளிக்கப்பட்டு வேலைக்கு சேர்க்கப்படுகிறார்கள். 60 முதல் 80 வயதானவர்கள் எந்த தொழிலும் செய்ய முடியாததால் இங்கே தங்கி உள்ளனர். இந்த மையத்தில் சில தினங்களுக்கு முன்பு பலருக்கு திடீரென வாந்தி பேதி ஏற்பட்டுள்ளது. பாதிக்கப்பட்டவர்களில் 12 பேர், கடந்த 4 நாளில் அடுத்தடுத்து இறந்தனர். மேலும் 20 பேர் இந்திரா நகரில் உள்ள தொற்று நோய் தடுப்பு மருத்துவமனையில் சிகிச்சை பெற்று வந்தனர். இவர்களில் 6 பேர் நேற்று இறந்தனர். இந்த சம்பவத்துக்கு எதிர்க்கட்சிகள் கண்டனம் தெரிவித்துள்ளன.

மாநில காங்கிரஸ் கமிட்டித் தலைவர் தேஷ்பாண்டே கூறுகையில், ‘‘பிச்சை எடுப்போர் மறுவாழ்வு மையத்தில் நடந்துள்ள உயிர் இழப்புகளை சாதாரணமாக கருத முடியாது. தவறை மூடிமறைக்க சமூக நலத்துறை முயல்கிறது. எனவேதான் பிரேதப் பரிசோதனை கூட செய்யாமல் இறந்தவர்களின் சடலங்களை எரித்துள்ளனர். இதற்கு காவல் துறையும் உடந்தையாக இருந்துள்ளது. இதில் சம்பந்தப்பட்டவர்கள் மீது கடும் நடவடிக்கை எடுக்க வேண்டும்’’ என்றார்.இந்த சம்பவம் பற்றி விசாரித்து 3 நாட்களில் அறிக்கை அளிக்கும்படி அதிகாரிகளுக்கு சமூக நலத்துறை அமைச்சர் சுதாகர் உத்தரவிட்டுள்ளார். அவர் மேலும் கூறுகையில், ‘‘பெங்களூர் மையத்தில் 922 பேர் பராமரிக்கப்படுகின்றனர். அவர்களில் 725 பேர் ஆண்கள். 197 பேர் பெண்கள். இவர்களில் 402 பேர் முதியவர்கள். 45 பேர் மாற்றுத் திறனாளிகள். 131 பேர் மனரீதியான பாதிப்புக்கு உள்ளானவர்கள். இவர்களை பராமரிப்பது என்பது எளிதல்ல. மிகவும் நலிந்த நிலையில் உள்ளவர்கள்தான்  மையத்துக்கு அழைத்து வரப்படுகின்றனர். இவர்களை எவ்வளவுதான் சிறப்பாக கவனித்தாலும் உடல¢ நலக்குறைவால் இறப்பது தொடர்கிறது’’ என்றார்.

மூலம்: தினகரன்