சொத்தை அடைவதற்காக தந்தையுடன் சேர்ந்து 6 பேரை கொன்ற 17 வயது சிறுவன்: சிறுவர் சீர்திருத்த பள்ளியில் அடைப்பு

சேலம்,

சேலம் தாசநாயக்கன் பட்டியைச் சேர்ந்த முன்னாள் போலீஸ் இன்ஸ் பெக்டர் குப்புராஜ் உள்பட 6 பேர் படுகொலை செய்யப்பட்டனர்.

இந்த
கொலைகளை செய்ததாக குப்புராஜின் மகன் சிவகுரு சென்னை ஐகோர்ட்டில் சரண்
அடைந்தார். அவரை மல்லூர் போலீசார் சேலம் அழைத்துச் சென்று விசாரித்தனர்.
பின்னர் சேலம் ஜெயிலில் அடைக்கப்பட்டார்.

இந்த
கொலையில் சிவகுருவின் மகன் கோகுல் நாத்துக்கும் தொடர்பு இருப்பது
தெரியவந்தது. 17 வயது சிறுவனான அவன் சொத்துக்காக தந்தையுடன் சேர்ந்து
படுகொலையில் ஈடுபட்டது போலீஸ் விசாரணையில் தெரிய வந்தது. இதையடுத்து
கோகுல்நாத் கைது செய்யப்பட்டான்.

கோகுல்நாத் போலீசாரிடம் பரபரப்பு வாக்குமூலம் அளித்து உள்ளான். அதில் கூறி இருப்பதாவது:-

எனது
தந்தை சிறுநீரக கோளாறால் பாதிக்கப்பட்டார். இதற்காக ரூ.15 லட்சம் செலவாகி
விட்டதாக கூறி எங்களுக்கு சொத்தில் பங்கு தர தாத்தா குப்புராஜ் மறுத்து
விட்டார்.

எனது
தந்தை சொத்து பிரச்சினைக்காக கடுமையாக போராடி வந்தார். கோர்ட்டுக்கும்
போலீஸ் நிலையத்துக்கும் அலைந்து கொண்டிருப்பதை பார்த்து கொண்டு சும்மா
இருக்க முடியவில்லை. உடல்நிலை பாதித்த நிலையில் அவர் எங்களுக்காக
அலைந்தார்.

மேலும்
என் தந்தை என்னிடம் இவர்கள் சொத்தை நமக்கு பிரித்து தர மாட்டார்கள். எனவே
இவர்கள் அனைவரையும் கொன்று விட்டால் யாரும் இருக்கமாட்டார்கள். நீ தான்
சொத்துக்கு முழு வாரிசு ஆகிவிடலாம் என்று கூறினார். அதன்படி நானும்
தந்தையும் சேர்ந்து 6 பேரையும் கொலை செய்தோம்.

இவ்வாறு வாக்கு மூலத்தில் கூறியுள்ளான்.

பின்னர்
கோகுல்நாத் சேலம் கோர்ட்டில் ஆஜர் படுத்தப்பட்டார். கோகுல் நாத்தை சேலம்
அஸ்தம்பட்டி அருகில் உள்ள சிறுவர் சீர் திருத்த பள்ளியில் அடைக்க
மாஜிஸ்திரேட் உத்தர விட்டார்.

இந்த
கொலை வழக்கில் தர்மபுரி ஆயுதப்படையில் டிரைவராக பணியாற்றி வரும்
போலீஸ்காரர் ரஜினிகார்த்தி (வயது 35) என்பவரும் கைது செய்யப் பட்டுள்ளார்.
இவர் சிவகுரு வின் மருமகன் ஆவார்.

6பேர்
கொலைக்கு இவர் சதிதிட்டம் தீட்டி கொடுத்ததாக தெரிகிறது. இதையடுத்து இவரை
தனிப்படை போலீசார் நேற்று கைது செய்தனர். பின்னர் இவரும் சேலம் கோர்ட்டில்
ஆஜர்படுத்தப்பட்டு சேலம் மத்திய சிறையில் அடைக்கப்பட்டார்.

6 பேர் கொலை வழக்கு சி.பி.சி.ஐ.டி. போலீஸ் விசாரணைக்கு உத்தர விடப்பட்டது.

இதையடுத்து
சேலம் தனிப்படை போலீசார்இந்த வழக்கு ஆவணங்களை சேலம் சி.பி.சி.ஐ.டி.
போலீசாரிடம் நேற்று ஒப்படைத்தனர். இதை பெற்றுக்கொண்ட சி.பி.சி.ஐ.டி. துணை
கண்காணிப்பாளர் ராஜராஜன், இன்ஸ்பெக்டர் பாலு மற்றும் போலீசார் நேற்று
பிற்பகலில் தங்களது விசாரணையை தொடங்கினர்.

தாசநாய்க்கன்பட்டியில் குப்புராஜின் வீட்டிற்கு சென்று தங்களது முதற்கட்ட விசாரணையை தொடங்கினர். பின்னர் அவர்கள் இந்த பகுதியில் வசித்து வரும் சிலரை அழைத்து விசாரித்தனர்.

இன்று 2-வது நாளாக விசாரணை நடத்தினர்.