மகளிர் குழுக்களிடம் பல லட்சம் மோசடி

திருவொற்றியூர் : வங்கி கடன் வாங்கித் தருவதாக மகளிர் குழுக்களை சேர்ந்த 1,000க்கும் மேற்பட்ட பெண்களிடம் பல லட்ச ரூபாய் மோசடி செய்த 2 வாலிபர்களிடம் போலீசார் தீவிர விசாரணை நடத்துகின்றனர். எண்ணூர் அன்னை சிவகாமி நகரை சேர்ந்தவர்கள் பஞ்சவர்ணம், மும்தாஜ், புஷ்பா. மகளிர் சுய உதவிக் குழு தலைவிகள். இவர்கள் பல்வேறு தொண்டு நிறுவனம் மூலம், மகளிர் குழுக்களுக்கு வங்கி கடன் வாங்கி தருவார்கள்.கடந்த ஜூன் மாதம், திருவொற்றியூர் குமரன் நகரை சேர்ந்த தனசேகர் (27), ராஜா (26) என்ற வாலிபர்கள் பஞ்சவர்ணம், மும்தாஜ், புஷ்பாவை சந்தித்தனர். ‘ஏழை பெண்கள் சேவை மையம் நடத்தி வருகிறோம். பல மகளிர் குழுக்களுக்கு கடன் வாங்கித் தந்துள்ளோம். எங்கள் அலுவலகம் தங்கசாலையில் பாரதி மகளிர் கல்லூரி எதிரே உள்ளது. ஸி1,200 முன்பணம் கட்டினால், 3 மாதத்தில் ஸி50,000 லோன் வாங்கித் தருகிறோம்‘‘ என்றனர்.அதை நம்பி, 1,000க்கும் மேற்பட்ட பெண்கள் முன்பணம் கொடுத்தனர். பின்னர், அந்த வாலிபர்கள் எண்ணூருக்கு வருவதை நிறுத்திக் கொண்டனர். பஞ்சவர்ணம், மும்தாஜ், புஷ்பா ஆகியோர் போன் செய்து கேட்ட போது, சரியான பதிலை சொல்லவில்லை. இதனால், சந்தேகமடைந்த அவர்கள் தங்கசாலையில் ஏழை பெண்கள் சேவை மைய அலுவலகத்தை பார்க்க கடந்த வாரம் சென்றனர். அங்கு அப்படி எந்தவொரு அலுவலகமும் இல்லாமல் இருந்தது. இதனால், தாங்கள் ஏமாற்றப்பட்டதை அறிந்த பெண்கள், மோசடி வாலிபர்களை வலையில் சிக்க வைக்க முடிவு செய்தனர்.அதன்படி, மேலும் 100 பெண்கள் கடனுக்காக முன்பணம் தர தயாராக இருப்பதாக தனசேகருக்கு போன் செய்தனர். பணத்தை வாங்கிச் செல்ல தனசேகரும், ராஜாவும் அன்னை சிவகாமி நகருக்கு நேற்று வந்தனர். அப்போது, 300க்கும் மேற்பட்ட பெண்கள் அவர்களை சுற்றி வளைத்தனர். தாங்கள் மாட்டிக் கொண்டதும், தனசேகரும், ராஜாவும் உண்மையை ஒப்புக் கொண்டனர். ‘‘தங்கசாலை வைசாலி தெருவில் வசிக்கும் சரளா என்பவர்தான் சேவை மையம் நடத்தி வருகிறார். நாங்கள் வசூலிக்கும் பணத்தை அவரிடம் கொடுத்து விடுவோம். எங்களுக்கு மாத சம்பளம் தருவார். மற்றபடி எங்களுக்கு எதுவும் தெரியாது’’ என்றனர்.இரு வாலிபர்களையும் பிடித்த பெண்கள், எண்ணூர் காவல் நிலையத்தில் ஒப்படைத்தனர். இன்ஸ்பெக்டர் கேசவன் விசாரணை நடத்தி வருகிறார். இவர்கள் தங்கசாலை முதல் மீஞ்சூர் வரை பல மகளிர் குழுக்களைச் சேர்ந்த ஏராளமான பெண்களிடம் பண மோசடி செய்திருக்கலாம் என கூறப்படுகிறது. இவர்களுக்கு சரளா என்பவர்தான் உண்மையில் தலைவியா அல்லது பணத்தை வாங்கி ஏமாற்றி நாடகமாடுகிறார்களா என போலீசார் தீவிரமாக விசாரிக்கின்றனர்.