கருப்பு கொடி அகற்றி தேசிய கொடி ஏற்றினாள்

கயா : பீகாரில் சுதந்திர தினத்தில் பள்ளிக்குள் புகுந்து மாவோயிஸ்ட்டுகள் ஏற்றிய கருப்பு கொடியை கிழித்தெறிந்து தேசிய கொடியை ஏற்றினாள் பள்ளி மாணவி.பீகாரில் மாவோயிஸ்ட் அட்டகாசம் நீடித்து வருகிறது. கடந்த ஞாயிற்றுக்கிழமை துமாரியா நகரில் உள்ள பள்ளியில் சுதந்திர தின கொண்டாட்டம் ஏற்பாடு செய்யப்பட்டிருந்தது. தலைமை ஆசிரியை தேசிய கொடி ஏற்ற இருந்தார். மாணவ, மாணவிகள் சீருடையில் தேச பக்தியுடன் காத்திருந்தனர். அப்போது திடீரென மோட்டார் பைக்குகளில் மாவோயிஸ்ட்டுகள் கும்பல் புகுந்தது. பைக்கில் இருந்து இறங்கிய மாவோயிஸ்ட் தீவிரவாதிகள் கொடிக் கம்பத்தை நோக்கி சென்றனர். அங்கே ஏற்றுவதற்காக கயிற்றில் மலர்களுடன் சுற்றி வைக்கப்பட்டிருந்த தேசியக் கொடியை தரையில் எறிந்தனர். அதற்கு பதிலாக கருப்பு கொடியை வைத்து உயரத்தில் ஏற்றினர்.சுதந்திர தினத்தில் கருப்பு கொடியை ஏற்றுவதைக் கண்டு கொதித்துப் போன மாணவி ஒருவர் கொடிக் கம்பத்தை நோக்கி ஓடினாள். கண்ணிமைக்கும் நேரத்தில் கருப்பு கொடியை கீழிறக்கி கிழித்தெறிந்தாள். தரையில் வீசப்பட்டிருந்த தேசியக் கொடியை கயிற்றில் கட்டி சரசரவென கம்பத்தின் உச்சிக்கு ஏற்றினாள். விரைப்புடன் ஒரு சல்யூட் அடித்தாள். பட்டொளி வீசிப் பறந்தது தேசியக் கொடி. மாணவிக்கு ஆதரவாக மாணவர்கள் அனைவரும் அவளை நோக்கி ஓடிச் சென்று கை குலுக்கி வாழ்த்து தெரிவித்தனர். ஆசிரியர்களும் அந்த மாணவியை பாராட்டினர். இதை எதிர்பார்க்காத மாவோயிஸ்ட்டுகள் அதிர்ந்தனர். உடனே அந்த இடத்தை விட்டு கிளம்பினர். திரும்பிச் செல்லும்போது எச்சரிக்கும் விதமாக வானத்தை நோக்கி சரமாரியாக சுட்டபடி சென்று மறைந்தனர்.சுதந்திர தின கொண்டாட்டத்தில் அத்துமீறிய மாவோக்களுக்கு எதிர்ப்பு தெரிவித்து பள்ளி மாணவர்கள் ஊர்வலம் நடத்தினர். அதற்கு ஆதரவு அளிக்கும் விதத்தில் அந்த பகுதியில் வியாபாரிகள் கடைகளை அடைத்தனர். இந்த சம்பவங்களை கேள்விப்பட்டு மாவட்ட கல்வி அதிகாரி பிரஜேஷ் ஓஜா, பள்ளிக்கு விரைந்து வந்தார். மாணவர்களின் துணிச்சல், தேச பக்தியை பாராட்டினார்.

அந்த மாணவிக்கு ஒரு சல்யூட்