திருப்பதி மலையில் கரடிகள் அட்டகாசம்

திருப்பதி : திருப்பதி மலையில் கரடிகளின் அட்டகாசம் அதிகமாகி இருக்கிறது. அடுத்தடுத்து ஒரு சில மணி நேரங்களில் சுற்றுலா விடுதி அருகேயும், கோயிலுக்குள்ளும் புகுந்து கரடிகள் சூறையாடியதால் பக்தர்கள் பீதி அடைந்துள்ளனர். திருப்பதி மலையில் கடந்த சில நாட்களாக சிறுத்தை, கரடிகளின் நடமாட்டம் அதிகரித்துள்ளது. சமீபத்தில் மலைப் பாதையில் நடந்த சென்ற 2 சிறுமிகளை சிறுத்தை தாக்கியது.இதையடுத்து, வனத் துறையினர் வைத்த கூண்டில் ஒரு சிறுத்தை சிக்கியது. பிரச்னை தீர்ந்தது என நினைத்த வனத்துறையினருக்கு, அங்கு மேலும் பல சிறுத்தைகளின் நடமாட்டம் இருப்பது தெரிய வந்தது. அதை நிருபிப்பது போல் மலைப்பாதையில் சில நாட்களுக்கு முன்பு ஒரு சிறுத்தை மட்டுமின்றி, கரடியும் நடந்து சென்றது.நேற்று முன்தினம் இரவு 9.30 மணியளவில் திருமலையில் உள்ள ஸ்ரீவாரிபாதாலு என்ற பகுதியில் பெரிய கரடி ஒன்று சுற்றியது. இதை கண்ட பக்தர்கள் அலறியடித்து ஓடி, அங்குள்ள தேவஸ்தானத்துக்கு சொந்தமான விஜயமால்யா விடுதியில் தஞ்சம் புகுந்தனர். ஆனால், அந்த கரடி விடுதி இருக்கும் இடத்துக்கே வந்து, அங்குள்ள குப்பைத் தொட்டிகளை கிளறி அதில் இருந்த உணவுப் பொருட்களை சாவகாசமாக தின்றது.இது குறித்து வனத் துறை அதிகாரிகளுக்கு விடுதி நிர்வாகிகள் தகவல் தெரிவித்தனர். வன அதிகாரிகள் வருவதற்குள் கரடி வனப்பகுதிக்குள் சென்று விட்டது. இந்த பீதி அடங்கும் முன்பாக, திருப்பதி மலை டோல்கேட் அருகே உள்ள பாட்ட கெங்கம்மா கோயிலுக்குள் நேற்று அதிகாலை 3.30 மணியளவில் மற்றொரு கரடி புகுந்தது. அங்கு பூஜைக்கு வைக்கப்பட்டு இருந்த பொருட்களையும், பக்தர்களுக்கு வழங்க தயாரித்து வைத்திருந்த பிரசாதத்தையும் சூறையாடியது. ஒன்றரை மணி நேரம் அட்டகாசத்துக்குப் பிறகு வனப்பகுதிக்குள் கரடி சென்றது. இந்த சம்பவங்களால் பக்தர்கள் இடையே பீதி அதிகமாகி உள்ளது.

க.....க.....கரடியா..................
அத ஒன்னும் பண்ணாதிங்க. பாவம்