தாராபுரத்தில் பெண் எரித்துக் கொலை

தாராபுரம் : தாராபுரம் - காங்கயம் மெயின் ரோட்டில், காட்டுப்பகுதியில்
35 வயது மதிக்கத்தக்க பெண் உடல், அடையாளம் தெரியாத வகையில் எரிந்த
நிலையில் கிடந்தது.
தாராபுரம் - காங்கயம் மெயின் ரோட்டில் சிறுகிணறு ஊராட்சி
நொச்சிபாளையம் வேப்பங்காடு பகுதியில், நேற்று காலை 9.30 மணிக்கு ஆடு
மேய்க்கச் சென்றவர், வேலி ஓரத்தில் பெண் உடல் எரிந்த நிலையில் கிடப்பதை
பார்த்து அதிர்ச்சி அடைந்தார். இதுகுறித்து ஊதியூர் போலீசுக்கு தகவல்
கொடுத்தார். காங்கயம் இன்ஸ்பெக்டர் தங்கபாண்டியன், எஸ்.ஐ.,
கோவர்த்தனாம்பிகை ஆகியோர் சம்பவ இடத்துக்குச் சென்று விசாரித்தனர்.
எரிக்கப்பட்ட பெண்ணின் வயது 35 முதல் 40 வரை இருக்கும்; கண்ணாடி
அணிந்துள்ளார். பெண்ணின் வயிறு, கழுத்து, முகம் ஆகியவை தீயில் கருகி
அடையாளம் தெரியாத நிலையில் இருந்தது. வேறு பகுதியில் பெண்ணை கொலை செய்து,
வாகனத்தில் கொண்டு வந்து வேலி ஓரத்தில் வைத்து தீ வைத்துள்ளனர். அந்த
இடத்தில் கொலை செய்ததற்கான அறிகுறி எதுவும் தென்பட வில்லை. வாகனம்
சென்றதற்கான அடையாளமாக, மண்ணில் டயர் தடம் பதிந்திருந்தது. அப்பெண்
எதற்காக கொலை செய்யப்பட்டார்; சொத்துக்காகவா அல்லது கற்பழித்து கொலை
செய்யப்பட்டாரா என போலீசார் விசாரிக்கின்றனர்.
சோதனை சாவடி அவசியம் தாராபுரம்-மதுரை, தாராபுரம்-காங்கயம்,
தாராபுரம்-பல்லடம், தாராபுரம்-பொள்ளாச்சி ஆகிய மெயின் ரோடுகளில் கடந்த இரு
மாதங்களில் ஐந்துக்கு மேற்பட்ட ஆண், பெண் உடல்கள், கொலை செய்யப்பட்ட
நிலையில் கைப்பற்றப்பட்டுள்ளன.
இரவு நேரங்களில் செல்லும் கார், வேன், லாரி ஆகியவற்றை சோதனை
செய்தால் மட்டுமே தாராபுரம் பகுதியில் கொலை செய்யப்பட்டோரின் உடல்கள்
கிடப்பதை தவிர்க்க முடியும், தாராபுரம் பகுதியில் சோதனை சாவடி அமைத்து
ஒவ்வொரு வாகனத்தையும் சோதனை செய்ய, எஸ்.பி., நடவடிக்கை எடுக்க வேண்டும்.