கடலுக்கு வீணாக செல்லும் தண்ணீரை தடுக்க வேண்டும்

தூத்துக்குடி : ஸ்ரீவைகுண்டம் அணை மற்றும் பாசன கால்வாய்களை சீரமைத்து
கடலுக்கு வீணாக செல்லும் தண்ணீரை தடுக்க வேண்டும் என்று கலெக்டரிடம்
சமத்துவ மக்கள் கட்சி சார்பில் வலியுறுத்தப்பட்டன.தூத்துக்குடி மாவட்ட
சமத்துவ மக்கள் கட்சி மாவட்ட செயலாளர் சுந்தர் தலைமையில் இளைஞரணி செயலாளர்
வில்சன், மாவட்ட துணைச் செயலாளர்கள் ராஜேஷ், மலர்விழி, மாவட்ட நிர்வாகிகள்
பிரபாகரன், குமார், சந்திரா, அற்புதராஜ், ஸ்ரீவைகுண்டம் விஜயபாண்டியன்,
காளியப்பன், கண்டிவேல், ஞானமுத்துஜெயராஜ் மற்றும் கட்சி நிர்வாகிகள்
பொதுமக்கள் கலெக்டர் ஆபிசிற்கு திரண்டு வந்தனர். மாவட்ட செயலாளர் சுந்தர்,
டி.ஆர்.ஓ துரை. ரவிச்சந்திரனிடம் கொடுத்துள்ள மனுவில் கூறியிருப்பதாவது;
ஸ்ரீவைகுண்டத்தில் உள்ள தாமிரபரணி அணை மற்றும் மருதூர் அணை ஆகியவற்றின்
மொத்த கொள்ளளவு 8 அடியாக இருந்தது. பல ஆண்டுகளாக அணைகள் பராமரிப்பு
இல்லாமல், தூர்வாரப்படாமல் மணல் மேடாகி தற்போது வெறும் 2 அடி மட்டுமே ஆழம்
உள்ளது. இதனால் போதிய தண்ணீரை தேக்கி வைக்க முடியாத நிலை ஏற்பட்டுள்ளது.
இதனால் மழைக்காலத்தில் தண்ணீரை தேக்க முடியாத காரணத்தால் மழைநீர் வீணாக
யாருக்கும் பயன்படாமல் கடலில் போய் கலக்கிறது.

நீர்ப்பாசன கீழக்கால், மேலக்கால், வடகால், தென்கால் பகுதியில் உள்ள
46 ஆயிரம் ஏக்கர் விவசாய நிலங்கள் இதனால் பாசன வசதி பெற முடியாமல் வானம்
பார்த்த பூமியாக உருவாகி வருகிறது. இதுபோன்ற சூழ்நிலை காரணமாக விவசாயம்
செய்ய முடியாத நிலை ஏற்பட்டு விட்டதால் மக்கள் ஊரை காலி செய்து பிழைப்பு
தேடி வேறு இடங்களுக்கு குடிபெயர்ந்து வரும் பரிதாப நிலை
ஏற்பட்டிருக்கிறது.விவசாய நிலங்கள் குடியிருப்பு மனைகளாக மாறிக்
கொண்டிருக்கிறது. இம் மாவட்டத்தில் உள்ள பேய்க்குளம், ஆறுமுகமங்கலம்குளம்,
கொற்கைகுளம், மஞ்சள்நீர்காயல்குளம், குலையன்கரிசல்குளம்,
அத்திமரப்பட்டிகுளம், வேல்குளம், ஆத்தூர்குளம், வரண்டியவேல்குளம்,
சிவகளைகுளம், பெருங்குளம், கடம்பாகுளம் உள்ளிட்ட 53 குளங்கள்
அமலைச்செடிகளாலும், காட்டுதாமரை செடிகளாலும் மணல் தூர்ந்து குப்பைமேடாக
உள்ளது. இதனால் கோடை காலத்தில் நீரை தேக்கி வைக்க முடியாமல் குளம்
இருந்தும் பயன் இல்லாத நிலையில் இருக்கிறது. இதனால் விவசாயிகளை
காத்திடவும், நிலத்தடி நீரை சேமித்திடவும் அணைகள், குளங்களை உடனடியாக
தூர்வார வேண்டும். இந்திய நாட்டின் முதுகெலும்பான விவசாயத்தை காத்திட இம்
மாவட்டத்தில் நீர் ஆதாரத்தை பெருக்கிட இந்த பணிகளை உடனடியாக செய்ய
வேண்டும். இவ்வாறு அந்த மனுவில் கூறப்பட்டுள்ளது.