ஆஸ்பத்திரி, மருந்தகங்களில் பணியாளர்கள் பற்றாக்குறை; பொதுமக்கள் கடும் அவதி

திருநெல்வேலி: நெல்லை மாநகராட்சி ஆஸ்பத்திரிகள், மருந்தகங்களில் போதுமான
பணியாளர்கள் இல்லாததாதல் பணிகள் பெரிதும் பாதிக்கப்பட்டுள்ளதால்
பொதுமக்கள் அவதிப்பட்டு வருகின்றனர். நெல்லை மாநகராட்சியில் பேட்டை,
மனகாவலம்பிள்ளை ஆஸ்பத்திரிகளும், நெல்லை டவுன், பேட்டை, செல்விநகர்,
எம்.விபுரம், கொக்கிரகுளம், பெருமாள்புரம் (பகுதி நேரம்) ஆகிய இடங்களில்
மருந்தகங்களும் செயல்பட்டு வருகிறது. நெல்லை மாநகராட்சி பகுதிக்கு 10
மருத்துவ அலுவலர் பணியிடங்களும், 11 மருந்தாளுனர் பணியிடங்களும், 14
துப்புரவு ஆய்வாளர் பணியிடங்களும் அனுமதிக்கப்பட்டுள்ளது. ஆனால் தற்போது 3
மருத்துவ அலுவலர்கள், 3 மருந்தாளுனர்கள், 7 துப்புரவு ஆய்வாளர்கள் மட்டுமே
பணியாற்றி வருகின்றனர். இதனால் மாநகராட்சி ஆஸ்பத்திரிகள், மருந்தகங்களில்
உரிய பணிகள் நடக்காத சூழ்நிலையில் பொதுமக்கள் பெரிதும் பாதிக்கப்பட்டு
வருகின்றனர். பேட்டை மற்றும் பழைய பேட்டை பகுதிகளில் சிறப்பான முறையில்
இயங்கி வந்த சித்தா ஆஸ்பத்திரிகளும் உரிய முறையில் செயல்படவில்லை. ஆங்கில
மருத்துவ முறை மருத்துவர்கள் இரண்டு நகர் நல மையங்களுக்கு ஒருவர் என்ற
அடிப்படையில் பணிபுரிவதால் பொதுமக்களுக்கு முழுமையான மருத்துவ சேவையை
அளிக்க முடியாத சூழ்நிலை உள்ளது. போதிய துப்புரவு ஆய்வாளர்கள் இல்லாத
நிலையில் துப்புரவு பணிகளும் தேக்கம் அடைந்துள்ளது. இந்நிலையில் பிற
மாநகராட்சி, நகராட்சிகளில் பணிபுரியும் மருத்துவ அலுவலர்கள், துப்புரவு
ஆய்வாளர்களை நெல்லை மாநகராட்சிக்கு மாறுதல் செய்ய ஆணை பிறப்பிக்க அரசு
கருத்துரு அனுப்புவது என்று முடிவு செய்யப்பட்டுள்ளது. இக்காலி
பணியிடங்களை முழுமையாக நிரப்பினால் மட்டுமே பொதுமக்களுக்கு முழுமையான
மருத்துவ சேவையை வழங்க முடியும் என்ற சூழ்நிலை ஏற்பட்டுள்ளதால் விரைவில்
இதுதொடர்பாக உரிய நடவடிக்கைகளை அரசு மேற்கொள்ள வேண்டும் என்று பொதுமக்கள்
விரும்புகின்றனர்.