புறநகரில் தொடரும் வழிப்பறி கும்பலால் போலீசாருக்கு தலைவலி

மதுரை: மதுரை புறநகரில் அடுத்தடுத்து வசூல் பணத்தை மட்டுமே குறிவைத்து
கொள்ளையடிக்கும் வழிப்பறி கும்பலால் போலீசாருக்கு தலைவலி ஏற்பட்டுள்ளது.
இதுவரை யாரும் கைது செய்யப்படாததால், வழிப்பறி சம்பவம் தொடரும் அபாயம்
உள்ளது. இதனால் வசூல் பணத்தை ஓரிடத்தில் இருந்து, மற்றொரு இடத்திற்கு
வர்த்தகர்கள் எடுத்துச் செல்வதில் சிக்கல் ஏற்பட்டுள்ளது.புறநகரில் வீடு
புகுந்து திருட்டு, நகைத் திருட்டு, கத்தியைக் காட்டி பணம் கேட்டல் போன்ற
குற்றச்சம்பவங்களே அதிகம் நடந்தன. சமீபகாலமாக, வசூல் பணத்தை குறிவைத்து
வழிப்பறி செய்வதை டூவீலர் கும்பல் வழக்கமாக கொண்டுள்ளது.மதுரை
குயவர்பாளையத்தைச் சேர்ந்தவர் தங்கராஜ். இரும்பு கடை வியாபாரியான இவர்,
ஆக., 9 ல் ராமநாதபுரம் பகுதியில் வசூலித்த 3.50 லட்சம் ரூபாயுடன் விரகனூர்
ரிங் ரோட்டில் இறங்கினார். சில அடி தூரத்தில் டூவீலரில் வந்த இருவர், இவரை
வழிமறித்து, பணத்தை வழிப்பறி செய்து தப்பினர். திருமங்கலம் கற்பகநகரைச்
சேர்ந்தவர் அய்யாத்துரை. மகளிர் சுயஉதவிக்குழுக்களுக்கு கடன்
வழங்குவதற்காக, இவர் 2.44 லட்சம் ரூபாய் கொண்டு வந்தபோது, மிளகாய் பொடியை
தூவியும், கத்தியால் வெட்டியும் வழிப்பறி செய்தனர். ஆக.,15ல் வாடிப்பட்டி
அய்யங் கோட்டை டாஸ்மாக் விற்பனையாளர் கணேஷ்குமாரிடம், வசூல் தொகை 1.2
லட்சம் ரூபாயை, டூவீலரில் வந்த இருவர் வழிப்பறி செய்தனர். இதேபோல்,
வாடிப்பட்டி பெட்ரோல் பங்க்கில், பெட்ரோல் நிரப்புவது போல், கேஷியரிடம்
பணம் கொள்ளையடிக்கப்பட்டது."வசூல்' வழிப்பறி தவிர, வீடுகளில் தொடர்
திருட்டும் நடக்கிறது. ஆக.,13ல் வாடிப்பட்டி போடி நாயக்கன்பட்டியில்,
சுரேஷ் என்பவர் வீட்டில் 29 பவுன் நகை மற்றும் 60 ஆயிரம் ரூபாய்
திருடப்பட்டது. ஆக.,15 கூடல்நகரில் குமார் என்பவர் வீட்டில் 16 பவுன் நகை
திருடப்பட்டது. இப்பகுதிகளில் தொடர் திருட்டு நடப்பதால், பொதுமக்கள்
உடைமைகளுக்கு பாதுகாப்பற்ற நிலை உள்ளது. வசூல் தொகையை ஓரிடத்திலிருந்து
மற்றொரு இடத்திற்கு கொண்டு செல்வதில் வர்த்தகர்களுக்கு சிக்கல்
ஏற்பட்டுள்ளது.மேற்கூறிய பகுதிகளில் குற்றவாளிகள் இதுவரை கைது
செய்யப்படவில்லை. ஒரு வழக்கை போலீஸ் தீவிரமாக விசாரித்துக் கொண்டிருக்கும்
நிலையில், மற்றொரு குற்றச்சம்பவம் அடுத்தடுத்து நடப்பதால், பழைய வழக்குகள்
கிடப்பில் போடப்படுகின்றன. இதனால் நிலுவை வழக்குகளில் எண்ணிக்கையும்
அதிகரிக்கிறது.
மாவட்ட எஸ்.பி., மனோகர் கூறியதாவது : ;வாடிப்பட்டியில் நடந்த வழிப்பறி
சம்பவங்களில் "க்ளூ' கிடைத்துள்ளது. விரகனூர் ரிங் ரோட்டில் நடந்த
வழிப்பறியில் தொடர்புடைய இருவரிடம் விசாரணை நடத்தி வருகிறோம். இவர்களுக்கு
வாடிப்பட்டி சம்பவத்தில் தொடர்பு உடையதா என்ற கோணத்திலும் விசாரணை
நடத்துகிறோம். விரைவில் மேற்கூறிய வழக்குகளில் குற்றவாளிகள் கைது
செய்யப்படுவர்.வாடிப்பட்டி பகுதியில் குற்றச்சம்பவங்கள் தொடர்ந்து நடப்பதை
தடுக்க, முக்கிய சந்திப்புகள் ஒவ்வொன்றிலும் எஸ்.ஐ., தலைமையில் இரு
போலீசார், வாகன சோதனையில் ஈடுபட்டுள்ளனர். இரு நாட்களில்
சந்தேகத்திற்கிடமான ஆறு பேர் பிடிபட்டுள்ளனர் என்றார்.

வேலைய சரியா பாருங்கப்பா தலை வலி வந்தாலும். கொள்ளையர்களை பிடிச்சா தானா தலைவலி போக போகறது இதுக்கு போய்

நிச்சயம் போலிசாருக்கு தலைவலியாகத்தான் இருக்கும். தூங்கிக் கொண்டிருப்பவர்களுக்கு இப்படியெல்லாம் வேலை செய்யச் சொல்லி உத்தரவுகள் வந்தால் தலைவலிதானே வரும்!