இலங்கையில் தமிழர்களுக்கு வீடுகள், மருத்துவமனை கட்டித்தரப்படும் - நிருபமா ராவ்

லங்கையில் போரினால் பாதித்த பகுதிகளில் நடைபெற்று வரும் மறுவாழ்வு பணிகளை பார்வையிட மூத்த இந்திய அதிகாரி ஒருவர் இலங்கைக்கு அனுப்பி வைக்கப்படுவார் என்று இந்திய வெளியுறவு துறை செயலாளர் நிருபமாராவ் தெரிவித்துள்ளார்.

இது பற்றிய தகவல் தெரியவருவதாவது:-
இலங்கை தமிழர் நலன் குறித்து தமிழக முதல் அமைச்சர் கருணாநிதி கடந்த மாதம் 17 ம் தேதி பிரதம மந்திரி மன்மோகனுக்கு கடிதம் எழுதியிருந்தார்.

அதில் இலங்கயைில் போரினால் பாதிக்கப்பட்டு முகாம்களில் தங்க வைக்கப்பட்டுள்ள தமிழ் மக்களின் நலன் தொடர்பாகவும்,

அங்கு நிலவும் சூழ்நிலையை நேரில் தெரிந்து வருவதற்காகவும்,சிறப்பு பிரதிநிதி ஒருவரை இந்திய அரசு அனுப்ப வேண்டும் என்றும் அந்த கடிதத்தில் தெரிவித்திருந்தார்.

இந்த கடிதத்திற்கு பதில் அளித்து பிரதமர் மன்மோகன் சிங் எழுதிய கடிதத்தில் " இலங்கைக்கு இந்திய வெளிவிவகாரத்துறையின் மூத்த அதிகாரி ஒருவர் சென்று
வடக்கு மற்றும் கிழக்கு மாகாணங்களில் மேற்கொள்ளப்பட்டு வரும் புனர்வாழ்வு பணிகளையும் நேரில் பார்வையிட்டு திரும்புவார் " என்று தெரிவித்திருந்தார்.

இந்த நிலையில் இந்திய வெளியுறவுத்துறை செயலாளர் நிருபமாராவ், சென்னையில் கருணாநிதியை சந்தித்து பேசினார். பின்னர் ஊடகவியலாளர்களுக்கு அளித்த பேட்டியில்,

'இலங்கையில் வடக்கு மற்றும் கிழக்கு பகுதிகளில் போரினால் பாதிக்கப்பட்டு இடம் பெயர்ந்த மக்களின் மறுவாழ்வு பணிகள் தொடர்பாக விவாதித்தோம்.

தமிழ் மக்கள் அவர்களின் சொந்த் இடங்களுக்கு திரும்புவது தொடர்பாகவும்,அவர்களது வாழ்வாதாரம் பற்றியும் விவாதித்தோம்.

கடந்த 30 ஆண்டுகளாக இலங்கையில் பல்வேறு முரண்பாடான நிகழ்வுகள் நடைபெற்று வருகின்றன.

அங்கு தற்போது நிலவும் சூழல் பற்றியும், தமிழக அரசுடன் மத்திய அரசு இணைந்து அவர்களுக்கு எவ்வாறு உதவுவது என்பது தொடர்பாகவும் இந்த சந்திப்பின் போது தமிழக முதல் அமைச்சரிடம் பேசினேன்.

தமிழ் மக்களுக்கு வீடுகள் கட்டித்தருவது,மருத்துவமனைகள் அமைப்பது,அவர்களை மீண்டும் விவசாயத்தில் ஈடுபடுத்துவது பற்றியும் பேசினோம்.

தமிழகம் சார்பில் அவர்களுக்கு இரண்டரை லட்சம் நிவாரணப்பொருட்கள் அடங்கிய பைகள் விநியோகிக்கப்பட்டுள்ளன. இது தவிர,

இந்திய அரசு சார்பிலும்50 ஆயிரம் வீடுகள் கட்டித்தரபபடவுள்ளது. அதன் தொடக்கமாக முதல் கட்டமாக ஆயிரம் வீடுகள் கட்டித்தரப்படும்.

இலங்கையில் வடக்கில் யாழ்ப்பாணத்தில், தெற்கு பகுதியில் அம்பன் தோடாவில் 2 புதிய துணை தூதரகங்கள் அமைக்கப்படும்.

இது இலங்கை தமிழர்களின் தேவைகளை அறிந்து கொள்ள உதவிகரமாக இருக்கும். மேலும், இலங்கை தமிழர்களுக்கும்,

தமிழகத்தின் தென்பகுதியில் உள்ள மக்களுக்கும் இருந்து வரும் வரலாற்று ரீதியான நீண்டகால உறவு நீடித்திருக்கவும் வழி வகுக்கும்.

இலங்கையில் போர் பாதித்த பகுதிகளையும், அங்கு நடைபெற்று வரும் மறுவாழ்வு பணிகளையும் பார்வையிடுவதற்கும்,

அங்குள்ள தமிழர்களுக்கு தேவைப்படும் உதவிகள் என்ன என்பதை பார்த்து அறிந்து வருவதற்காகவும இந்திய வெளியுறவுத்துறையின் மூத்த அதிகாரி ஒருவர் அடுத்த மாத தொடக்கத்தில் இலங்கைக்கு அனுப்பப்படுகிறார்.

இலங்கையில் போர் பாதித்த பகுதிகளில் புனர்வாழ்வு நடவடிக்கை மேற்கொள்ளவும்,அங்கு இயற்கை நிலை திரும்பவும் தேவைப்படும் நடவடிக்கைகளை எடுக்க இந்திய அரசு உறுதியாக உள்ளது.

சமீபத்தில் இலங்கை அதிபர் ராஜபக்சே இந்தியா வந்திருந்தார். அவரது பயணம் பயனுள்ளதாக இருந்தது" இவ்வாறு அவர் கூறியதாக தகவல்கள் தெரிவிக்கின்றன.

நன்றி
தமிழ் பெஸ்ட்