பலஸ்தீனத்துடன் மீண்டும் நேரடி அமைதிப் பேச்சை

masthan · masthan Thu Aug 19, 2010 1:25 pm

பலஸ்தீனத்துடன் மீண்டும் நேரடி அமைதிப் பேச்சை நடத்த தயாராகவுள்ளோம். ஆனால் பேச்சுவார்த்தைக்கு முன்னதாக எவ்வித முன்நிபந்தனையையும் ஏற்க மாட்டோம் என்று பலஸ்தீனத்தை ஆக்கிரமித்துள்ள இஸ்ரேல் தெரிவித்துள்ளது.

கிரீஸ் நாட்டுக்கு சென்ற இஸ்ரேல் பிரதமர் பெஞ்சமின் நெதன்யாகு, செய்தியாளர்களிடம் பேசுகையில் பலஸ்தீனத்துடன் நிரந்தரமான தீர்வை எட்டவே விரும்புகிறோம். இதைக் கருத்தில் கொண்டு அந்நாட்டுடன் நேரடியான அமைதிப்பேச்சை தொடங்கவும் தயாராகவுள்ளோம். அப்படி பேச்சுவார்த்தை தொடங்கும் பட்சத்தில் அதில் பலஸ்தீன் தனது கருத்துகளை வெளிப்படுத்தி விவாதிக்கலாம் என்று கூறினார்.

நேரடிப் பேச்சுக்கு பல முறை விருப்பம் தெரிவித்தும் அதையெல்லாம் பலஸ்தீனம் பொருட்படுத்தவில்லை. அந்த வாய்ப்பை பயன்படுத்திக் கொள்ளவில்லை. எங்களது அழைப்புக்கு மறுப்பு தெரிவித்து விலைமதிப்பற்ற நேரத்தை வீணடித்துவிட்டது என்று இஸ்ரேல் அதிகாரி ஒருவர் தெரிவித்தார். ஆக்கிரமிக்கப்பட்ட பலஸ்தீனத்துக்கும் ஆக்கிரமித்த இஸ்ரேலுக்கும் இடையேயான அமைதிப்பேச்சு கடந்த 2008-ல் தடைபட்டது.

இதைத்தொடர்ந்து இரு நாடுகளுக்கு இடையே பிரச்னை நீடித்து வருவதால் அமைதிப் பேச்சை மீண்டும் தொடங்க முடியாத நிலை உள்ளது. இரு நாடுகளுக்கு இடையே மீண்டும் நேரடிப் பேச்சை தொடங்குவதற்கான முயற்சியை அமெரிக்கா சமீபத்தில் மேற்கொண்டது. ஆனால் நேரடிப் பேச்சுக்கு பலஸ்தீனம் சம்மதிக்கவில்லை என்பது குறிப்பிடத்தக்கது.