தண்டவாள போல்ட் கழன்றது தப்பியது காவேரி எக்ஸ்பிரஸ்

by நவீன் Thu Aug 19, 2010 1:02 pm

பட்டரவாக்கம் : அம்பத்தூர்-பட்டரவாக்கம் அருகே தண்டவாள இணைப்பு போல்ட்
கழன்றது கண்டுபிடிக்கப்பட்டதால், காவேரி எக்ஸ்பிரஸ் ரயில் விபத்தில்
இருந்து தப்பியது.சென்னை சென்ட்ரலில் இருந்து, மைசூர் செல்லும் காவேரி
எக்ஸ்பிரஸ் நேற்று முன்தினம் இரவு புறப்பட்டுச் சென்றது. இரவு 10.05
மணியளவில் பட்டரவாக்கம் நோக்கி வந்தது.அப்போது பட்டரவாக்கம் ரயில் நிலையம்
அருகே, ரயில் தண்டவாளத்தின் இணைப்பு போல்ட்கள் கழன்று கிடந்தன. இதைப்
பார்த்த ரயில்வே ஊழியர், அம்பத்தூர் ரயில்நிலைய அதிகாரிகளுக்கு தகவல்
கொடுத்தார்.இத்தகவல் ரயில்வே கன்ட்ரோல் அறைக்கும் தெரிவிக்கப்பட்டது.
உடனடியாக, பட்டரவாக்கத்தில் காவேரி எக்ஸ்பிரஸ் ரயில் நிறுத்தப்பட்டது.
ரயில்வே ஊழியர்கள் விரைந்து வந்து, தண்டவாளத்தின் இணைப்பு போல்ட்களை
பொருத்தும் பணியில் ஈடுபட்டனர். அதுவரை அந்த வழியாக செல்ல வேண்டிய மற்ற
எக்ஸ்பிரஸ் ரயில்கள், சரக்கு ரயில்கள் ஆங்காங்கே நிறுத்தி
வைக்கப்பட்டன.போல்ட் மாட்டிய பின்னர், அரை மணி நேரம் காலதாமதத்துடன்
காவேரி எக்ஸ்பிரஸ் ரயில் மைசூருக்கு புறப்பட்டுச் சென்றது. இதன் காரணமாக,
காவேரி எக்ஸ்பிரஸ் ரயில் விபத்தில் இருந்து தப்பியது. மேலும், எக்ஸ்பிரஸ்
ரயில் பாதையில், சிறிது நேரம் ரயில் போக்குவரத்து பாதிக்கப்பட்டது.