இலங்கைக்கு செல்கிறார் இந்திய அதிகாரி: செயலர் நிருபமா தகவல்

by நவீன் Thu Aug 19, 2010 12:45 pm

சென்னை : ""இலங்கைத் தமிழர்கள் மறுவாழ்வுப் பணிகள் குறித்து ஆராய,
அடுத்த மாத துவக்கத்தில் இந்திய வெளியுறவுத் துறை மூத்த அதிகாரி ஒருவர்
இலங்கைக்கு செல்ல உள்ளார்,'' என வெளியுறவுச் செயலர் நிருபமா ராவ்
தெரிவித்தார். வெளியுறவுச் செயலர் நிருபமா ராவ், முதல்வர் கருணாநிதியை
நேற்று மாலை 4.45 மணிக்கு அவரது கோபாலபுரம் இல்லத்தில் சந்தித்தார். ஒரு
மணி நேரம் வரை இச்சந்திப்பு நீடித்தது.
சந்திப்பிற்கு பின், நிருபமா ராவ் நிருபர்களிடம் கூறியதாவது:
இலங்கை வடக்கு மற்றும் கிழக்கு பகுதிகளின் முகாம்களில் வாழும் இலங்கைத்
தமிழர்களை, அவர்களின் சொந்த இடங்களில் குடியமர்த்த நடவடிக்கைகள்
மேற்கொள்ளப்பட்டு வருகின்றன. அவர்களுக்கு, மத்திய அரசு சார்பில் 50 ஆயிரம்
வீடுகள் கட்டித் தரப்பட உள்ளது. முதற்கட்டமாக 1,000 வீடுகள் விரைவில்
கட்டப்படும்.
வடக்கு மற்றும் கிழக்கு பகுதிகளில் விவசாயம், மருத்துவமனைகள்,
கல்வி நிறுவனங்கள் உள்ளிட்ட உள்கட்டமைப்பு வசதிகளை ஏற்படுத்தவும்
நடவடிக்கைகள் எடுக்கப்படும். இரண்டரை லட்சம் இலங்கைத் தமிழர்கள்
குடும்பங்களுக்கு, தமிழக அரசு அளித்த நிவாரணப் பொருட்களை மத்திய அரசு,
இலங்கை அரசிடம் தந்துவிட்டது.
இந்த ஆண்டு இறுதிக்குள் யாழ்ப்பாணம் மற்றும் தென் இலங்கையில்
இந்திய தூதரகங்கள் திறக்கப்பட உள்ளன. இவற்றின் மூலம், இலங்கையின் வடக்கு
பகுதிக்கும், தமிழகத்தின் தென் பகுதிக்கும் இடையேயான உறவு மேம்படும். இரு
மாதங்களுக்கு முன் இந்தியா வந்த இலங்கை அதிபர் ராஜபக்ஷேவிடம், இலங்கைத்
தமிழர்களின் மறுவாழ்வுப் பணிகளை துரிதப்படுத்தும்படி வலியுறுத்தி உள்ளோம்.
இலங்கையில் போரில் பாதிக்கப்பட்ட வடக்கு மற்றும் கிழக்கு
பகுதிகளில் நடைபெற்று வரும் மறுவாழ்வுப் பணிகளை நேரில் கண்டறியவும்,
அப்பணிகளில் ஏற்பட்டுள்ள முன்னேற்றங்கள் குறித்து ஆராயவும், அடுத்த மாத
துவக்கத்தில் இந்திய வெளியுறவுத் துறை மூத்த அதிகாரி ஒருவர் இலங்கைக்குச்
செல்ல உள்ளார். இத்தகவல்களை முதல்வர் கருணாநிதியிடம் எடுத்துரைத்தேன்.
இவ்வாறு நிருபமா ராவ் கூறினார்.