தமிழ் ஆட்சி மொழி விவகாரம்: மத்திய அரசு பதில்

மத்திய அரசில் தமிழை ஆட்சி மொழியாக்குவதற்கும் இது சாத்தியமானது தானா
என்பது குறித்தும் ஆராய அமைக்கப்பட்ட குழு, தனது அறிக்கையை மத்திய அரசிடம்
ஒப்படைத்துவிட்டது. இதுகுறித்து மேற்கொண்டு முடிவு எடுப்பது குறித்து
உள்துறை அமைச்சகம் பரிசீலித்து வருகிறது. இதுகுறித்து தர்மபுரி
எம்.பி.,யான தாமரைசெல்வன் நேற்று லோக்சபாவில் கேள்வி எழுப்பியிருந்தார்.
தமிழை ஆட்சி மொழியாக்க வேண்டுமென பிரதமருக்கு தமிழக முதல்வர் கடிதம்
எழுதியுள்ள நிலையில், இதுகுறித்து தற்போதைய நிலைமை என்ன என்று
கேட்டிருந்தார்.
இதற்கு மத்திய உள்துறை இணையமைச்சர் அஜய் மக்கான் அளித்துள்ள
பதிலில் கூறியிருப்பதாவது: கோவையில் நடைபெற்ற மாநாட்டில் தமிழை ஆட்சி
மொழியாக்குவது குறித்து தீர்மானம் நிறைவேற்றப்பட்டு மத்திய அரசுக்கு
கோரிக்கை வைக்கப்பட்டது. அதற்கு முன், கடந்த மே மாதம் 13ம் தேதியன்று
பிரதமர் மன்மோகன் சிங்கிற்கு தமிழக முதல்வர் கருணாநிதி கடிதம்
எழுதியிருந்தார்.
அதில், தமிழக மக்களின் உணர்வுகளை மதித்து தமிழை மத்தியில் ஆட்சி
மொழியாக்குவதற்கு உண்டான அனைத்து நடவடிக்கைகளையும் விரைந்து எடுத்திட
வேண்டுமென கூறப்பட்டிருந்தது. இதையடுத்து டாக்டர் சீதாகாந்த் மகோபாத்ரா
தலைமையில் ஒரு குழு அமைக்கப்பட்டது. அதன்படி, இந்திய அரசியல் அமைப்புச்
சட்டத்தின் எட்டாவது அட்டவணையில் உள்ள தமிழ் உள்ளிட்ட அனைத்து மாநில
மொழிகளையும் ஆட்சி மொழியாக மாற்றுவதற்குரிய சாதக பாதகங்களை ஆராய்ந்து
அறிக்கை அளிக்கும்படி கேட்டுக் கொள்ளப்பட்டது. அந்த குழுவும் தனது பணியை
செய்து முடித்து அறிக்கையை சமர்பித்துவிட்டது. உள்துறை அமைச்சகத்தின்
பரிசீலனையில் அந்த அறிக்கை உள்ளது. இவ்வாறு அஜய் மக்கான் கூறினார்.
மத்திய அரசு அளித்துள்ள இந்த பதிலில், தற்போது பரிசீலனையில்
உள்ளதாக மட்டுமே கூறியுள்ளதே தவிர, காலக்கெடு எதுவும்
நிர்ணயிக்கப்படவில்லை.