சென்னையில் செப்., 8, 9ம் தேதி தகவல் தொழில் நுட்ப மாநாடு

சென்னை: தமிழக அரசின் தகவல் தொழில் நுட்பம், தமிழக தொழில் துறை
கூட்டமைப்பு (சி.ஐ.ஐ.,) இணைந்து சென்னையில், "கனெக்ட்-2010' எனும் தகவல்
தொடர்பு தொழில் நுட்பம் தொடர்பான மாநாட்டை நடத்துகிறது.
இது குறித்து
மாநாட்டின் தலைவர் மகாலிங்கம் கூறியதாவது: தமிழகத்தில் ஐ.டி., தொழில்
நுட்பம் கடந்த ஐந்தாண்டுகளில் நல்ல வளர்ச்சியை கண்டுள்ளது. 85க்கும்
மேற்பட்ட ஐ.டி., நிறுவனங்கள் தமிழகத்தில் உள்ளன. சி.ஐ.ஐ., தமிழக அரசின்
தகவல் தொழில் நுட்பம் மற்றும் 200க்கும் மேற்பட்ட நிறுவனங்கள் பங்கேற்கும்
10வது மாநாடு சென்னை வர்த்தக மையத்தில் வரும் செப்., 8, 9ம் தேதிகளில்
நடத்துகிறது. சர்வதேச பங்கேற்பாளராக தைவான் சர்வதேச மன்றம் பங்கேற்கிறது.
மத்திய அமைச்சர் ராசா, மத்திய அரசின் தகவல் தொழில் நுட்ப செயலர்
சந்திரசேகர், துணை முதல்வர் ஸ்டாலின், ஐ.டி., அமைச்சர் பூங்கோதை, கனிமொழி
எம்.பி., மற்றும் எல்காட், இன்போசிஸ், டாடா, காக்னிசன்ட், டி.வி.எஸ்.,
உள்ளிட்ட 200க்கும் மேற்பட்ட நிறுவனப் பிரதிநிதிகள் பங்கேற்கின்றனர்.
இவ்வாறு மகாலிங்கம் தெரிவித்தார். தமிழக ஐ.டி., துறை முதன்மை செயலர்
டேவிதார் கூறியதாவது: முதன்முறையாக ஐ.டி., துறை மட்டுமின்றி, தகவல் தொழில்
நுட்பம் தேவைப்படும் துறைகள் அனைத்தும் இந்த மாநாட்டில் பங்கேற்கின்றன.
ஆட்டோமொபைல்ஸ், மருத்துவம் மற்றும் சுகாதாரம், பொழுதுபோக்கு, பாதுகாப்பு
போன்ற துறைகளும் கலந்து கொள்கின்றன. இந்த மாநாடு மற்றும் கருத்தரங்கில்
ஐ.டி., துறையோடு தமிழக தொழில் துறையும் பங்கேற்கிறது. இந்த மாநாட்டில்
வாழ்நாள் சாதனையாளர் விருது, சிறந்த தொழில் முனைவோர் விருது, புதிய தொழில்
முனைவோருக்கான விருது ஆகியன வழங்கப்படுகின்றன. தமிழகத்தில் உள்ள ஐ.டி.,
துறையின் வளர்ச்சியை இந்த மாநாடு அனைவருக்கும் கொண்டு செல்லும். இவ்வாறு
டேவிதார் தெரிவித்தார்.