தமிழகத்தில் அடுத்த 2 நாட்களுக்கு; இடியுடன் கூடிய மழை பெய்யும்

சென்னை: "தமிழகம் மற்றும் புதுச்சேரியில் அடுத்த இரண்டு நாட்களுக்கு
இடியுடன் கூடிய மழை பெய்யக் கூடும்' என்று சென்னை வானிலை ஆய்வு மையம்
தெரிவித்துள்ளது. தமிழகத்தில் கடந்த ஒரு மாதத்திற்கு மேலாக பகலில் வெயில்
சுட்டெரித்தது. ஆயினும் மாலை நேரத்தில் வெப்ப சலனம் காரணமாக, ஆங்காங்கே
லேசான மழை பெய்து வருகிறது. தென்மேற்கு மத்திய வங்கக் கடல் பகுதியில்
காற்று சுழற்சி ஏற்பட்டது. இதன் காரணமாக, நேற்று முன்தினம் இரவு முதல்
நேற்று காலை வரை மழை கொட்டியது. குறிப்பாக சென்னை மற்றும் புறநகர்
பகுதியில் பரவலாக மழை பெய்தது. இதனால், சாலையோரங்கள் மற்றும் தாழ்வான
இடங்களில் மழைநீர் தேங்கியது. முக்கிய சாலைகளில் போக்குவரத்து கடுமையாக
பாதிக்கப்பட்டது. அதிகபட்சமாக, நுங்கம்பாக்கத்தில் 8, செம்பரம்பாக்கத்தில்
7, மீனம்பாக்கத்தில் 5 செ.மீ., மழை பதிவாகியது. தமிழகத்தில் கடந்த 24 மணி
நேரத்தில் ஸ்ரீபெரும்புதூர், பூந்தமல்லி, கொரட்டூர் 6 செ.மீ., அண்ணா
பல்கலைக்கழகம், டி.ஜி.பி., அலுவலகம், உத்திரமேரூர், பொன்னேரி, பூண்டி 5
செ.மீ., சென்னை விமான நிலையம், திருவள்ளூர், செங்குன்றம் 4 செ.மீ,
கேளம்பாக்கம், திருத்தணி, தாமரைப்பாக்கம், நடுவட்டம் 3 செ.மீ,
காஞ்சிபுரம், தாம்பரம், ராசிபுரம், சின்னகல்லார், அரியலூர் 2 செ.மீ., மழை
பதிவாகியது. இது குறித்து சென்னை வானிலை ஆய்வு மைய அதிகாரி ஒருவர் கூறும்
போது, "தென்மேற்கு வங்கக் கடலில் உருவான குறைந்த காற்றழுத்த தாழ்வு நிலை,
தெலுங்கானா - தெற்கு தமிழகம் மற்றும் ஆந்திரா - தமிழக கடலோரப் பகுதியில்
நிலை கொண்டுள்ளது. இதன் காரணமாக, தமிழகம் மற்றும் புதுச்சேரியில் அடுத்த
இரண்டு நாட்களுக்கு இடியுடன் கூடிய மழை பெய்யக் கூடும். சென்னை நகரில்
பொதுவாக வானம் மேகமூட்டமாக காணப்படும். நகரில் ஒரு சில இடங்களில் இடி,
மின்னலுடன் மழை பெய்யலாம்' என்றார்.