மேற்கு மாவட்டங்களில் காச நோய் பாதிப்பு அதிகம்: அரசு செயலர்

சென்னை:

தமிழகத்தில் ஆண்டுக்கு ஒரு லட்சம் பேர் காச நோயால்
பாதிக்கப்படுவதாகவும், மேற்கு மாவட்டங்களில் தான் அதிகம் பேர்
பாதிக்கப்படுவதாகவும் சுகாதாரத் துறைச் செயலர் சுப்புராஜ் தெரிவித்தார்.
காச நோயைத் தடுக்கும் திட்டத்தை 22 மாவட்டங்களில் செயல்படுத்த, இரண்டு
தன்னார்வ தொண்டு நிறுவனங்கள் முன்வந்துள்ளன. இத்திட்டத்தின் துவக்க விழா
சென்னையில் நேற்று நடந்தது. இதில், சுகாதாரத் துறைச் செயலர் சுப்புராஜ்
பேசியதாவது: தமிழகத்தில் காச நோயால் ஆண்டுக்கு ஒரு லட்சம் பேர்
பாதிக்கப்படுகின்றனர். இந்நோயைத் தடுக்க, சுகாதாரத் துறை தீவிர நடவடிக்கை
எடுத்து வருகிறது. தற்போது துவக்கப்பட்டுள்ள இத்திட்டம், ஒவ்வொரு
நோயாளிக்கும் 6,000 ரூபாய் செலவில், "நோயாளியைத் தேடி மருத்துவம்' என்ற
தலைப்பிலான திட்டமாகும். இதில், 16 ஆயிரம் பணியாளர்கள்
ஈடுபடுத்தப்பட்டுள்ளனர். இந்நோய் அதிகரிக்க காரணம், நோய்க்கான மாத்திரையை
தொடர்ந்து ஆறு மாதங்கள் சாப்பிட வேண்டும். அப்போது தான் நோய் குணமாகும்.
ஆனால், 11 சதவீதம் பேர் இடையிலேயே மாத்திரையை நிறுத்தி விடுகின்றனர்.
இதனால் தான், இறப்பு எண்ணிக்கை அதிகரிக்கிறது. தமிழகத்தில் மேற்கு
மாவட்டங்களில் தான் 24 சதவீதம் பாதிப்பு உள்ளது. கோவை, ஈரோடு, திருப்பூர்,
சேலம், நாமக்கல், கரூர் மாவட்டங்களில் அதிகளவு காச நோய் பரவுகிறது.
இந்நோயால் பாதிக்கப்பட்ட நான்கில் ஒரு பங்கு பேருக்கு எச்.ஐ.வி., பாதிப்பு
ஏற்படுகிறது.
"சூப்பர் பக்' எனப்படும் மருந்துக்கு கட்டுப்படாத கிருமி
பற்றிய சர்ச்சை எழுந்துள்ளது. இது போன்ற கிருமி, 55 நாடுகளில் உள்ளது
கண்டுபிடிக்கப் பட்டுள்ளது. எனவே, தமிழகத்தில் தான் இது உருவானது என்று
உறுதியாகச் சொல்ல முடியாது. எந்த நாட்டில் உருவானது என்று கண்டுபிடிப்பது
கடினம். எனினும், இது தொடர்பான ஆராய்ச்சிகள் நடந்து வருகின்றன. இதனால்,
தமிழகத்தில் மருத்துவச் சுற்றுலா பாதிக்காது. இவ்வாறு சுப்புராஜ் பேசினார்.