விண்ணைத் தாண்டி வருவோமா?

காற்றினி லூதிடுஞ் சங்கொலி கேட்டிட கண்விழித்தேன்
போர்பறை யொன்று புறத்தே முழங்கிடக் கேட்டெழுந்தேன்
நாற்றிசை எங்குந் நடந்து கலைந்திடும் காற்றசைவும்
சீற்றமெடுத் ததன் சிந்தனை கெட்டிடச் சென்றதியோ

வேர்வை துளித்து விழிகள் கலங்கிட வீதிவந்தேன்
நீர்த்துளி தூங்குந் நிலமெழு புல்லுங் கண்ணீர்பனிக்க
வார்த்த இரும்புறு வாளெடுத் தாடிடும் வஞ்சகர்கள்
சேர்த்துப் பலர்தலை சீவுதல் போலொரு காட்சிகண்டேன்

வானம் சிவந்த வரிகள் நிறைந்திட்ட கீழ்த்திசையோ
மானமி ழந்திடு ஈழமகள் முகம் போற்சிவக்க
ஊனம ழித்தவள் ஆவிவி டுத்திடச் சிந்தியதாய்
மேகம ழித்திட மீறிச்சி வந்தனன் செங்கதிரோன்

கூக்குர லோசையுங் கூத்திடும் பேய்களின் ஆர்ப்பரிப்பும்
தீக்கொளும் வீடுகள் தீயிடு மோசைகள் போற்பரந்தே
தாக்கிய ழிக்கையில் ஈனம ரணப்பே ரோலங்களாய்
கேட்கும் நினைவுகள் கேட்டன வோஅன்றிக் காற்றலையோ

வீட்டினெ திரொரு வேலியின் பின்புறம் பாக்குமரம்
நாட்டி வளர்ந்திடச் செய்தவன் பிள்ளையோ பார்த்தவனோ
வேட்டி மடித்தவன் வீரமுடன் அதிலேறியொரு
பாட்டி சுவைத்திடப் பாக்குப் பறிக்க விரும்பினனோ

பார்த்திட அங்கவன் பாதிமர மேறிப் பற்றியதும்
வேர்த்திடக் கைகள் வழுக்க விரைந்து சறுக்கியதும்
சேர்த்து மனத்திடம் தீரங்கொண்டே பற்றி ஏறுவதும்
கோர்த்த கரம்விடக் கோலம் பழதென ஆகிநின்றான்

பாவிஈழ அன்னை பெற்றவ னோதமிழ் பேசுபவன்
தாவிச்சாண் ஏறமு ழஞ்சறுக் கிநிலம் வீழுகின்றான்
காவியு டுத்தவர் ஏறிமி தித்திட நோகநின்றும்
மேவி விழிகட்டி நீதிமகள் கண்ணை மூடுகின்றாள்

நீதிசொல் லக்கண்ணை மூடிய அன்னை விழிதிறந்து
ஆதித் தமிழனைக் கூறுக ளாக்கிடும் போர்நிறுத்தி
மீதி மனித வளமொடு ஈழம் தலைநிறுத்தி
சேதி சுதந்திர வாழ்வெனப் பாட விடுவதெப்போ

தூரந டக்குது மோசஅழி வொன்று தீயுதினம்
பார்உரு ளும் சுடு பீரங்கி தானும் படையுமின்றி
போரிடும் ஒசை, பெருங்குண்டு வானக் கழுகுமின்றி
வீரிடும் ஓசைமறைத் தொரு சண்டை நடக்குதங்கே

சாணை பிடித்தகூர் வாளெழுந்தே சத்த மின்றிவெட்ட
ஆணையிட் டங்கே அழிவு தொடருது ஆர்வமின்றி
போனதை விட்டுப் புறந்தள்ளி விண்ணில் உலவலின்றி
வானமிருந்து நாம் கீழிறங்கி வழி செய்திடுவோம்

நீதிமுன் சாதிவெறி பிடித்தே தலை துண்டுசெய்யும்
போதி மரத்தின்கீழ் வாழ்ந்திடு ரத்த வெறியினரைத்
தாவிப் பிடித்தது தண்டனை கொள்ளவும் செய்குவமோ
மீதி யிருக்கும் நிலந்தனைக் காத்திடல் தேவையன்றோ

இந்த கவிதைய படிச்சா என் சொந்தமெல்லாம் சந்தோஷ படும் அவங்க பேரு சொல்றேன் பெரியப்பா சந்திரகாசு படையாச்சி நாயுடுமாமா சித்தப்பா பெரிய அண்ணாச்சி தாத்தா கோவிந்தசாமி தேவர் இவங்கெல்லாம் இதை பார்த்த சந்தோஷ படுவாங்க அப்பு

D
அருமை

மிக அருமையாக இருக்கிறது அண்ணா ,

மீதியிருக்கும் நிலத்தை மட்டுமல்ல, இழந்த நம் ஈழப் பகுதிகளையும் மீட்டெடுக்கத்தான் போகிறோம்.

நண்றி அண்ணா! சிறந்த கவிதை!

அருமை கவிதை தந்த அண்ணனுக்கு பரிசு இதோ...

நீண்ட நேரமாக ஈகரைக்கு வரமுடியாமல் போய்விட்டது. பாராட்டிய தங்கள் அனைவ்ருக்கும் நன்றிகள்.
மகிழ்வென்றால் மனம் மலருமே. ஒரு பூவாக இதோ

மல்லிகை தூவினேன் மணிமாலை தூக்கினேன்
மலர்களை இறைத்து வைத்தேன்
பல்லொளிர் வர்ணங்கள் பட்டாடை கொண்டுநற்
பாதையும் செய்துவைத்தேன்
சொல்லிலேபுகழ்தன்னை சூட்டியோர் வார்த்தைகள்
உள்ளமே நுழையும்போது
பல்லக்கில் வைத்ததை பணிவோடு கொண்டுசென்
றுள்ளே ஓர் உயர்வில் வைத்தேன்.

என்றும் காப்பேன்
கிரிகாசன்