லைட்டர்' வைத்திருந்ததை கண்டுபிடித்ததால்; மாணவர் தீக்குளித்து தற்கொலை

கும்பகோணம்: "லைட்டர்' வைத்திருந்ததை ஆசிரியர் கண்டுபிடித்ததால்,
பிளஸ் 1 மாணவர் தீக்குளித்து தற்கொலை செய்து கொண்டார். தஞ்சை மாவட்டம்
கும்பகோணம் அருகே, பாலையூரை சேர்ந்த லோகநாதன் மகன் விஷ்ணுபிரியன்(15).
வில்லியவரம்பலில் உள்ள தாத்தா ராமச்சந்திரன் வீட்டில் தங்கி,
திருநாகேஸ்வரம் அரசு மேல்நிலைப் பள்ளியில் ப்ளஸ் 1 படிக்கிறார். சில
தினங்களுக்கு முன், மாணவர்கள் வகுப்புக்கு மொபைல் போன் கொண்டு வருவது
தெரிந்து, கடந்த 16ம் தேதி, ஆசிரியர்கள் சோதனை நடத்தினர். ஒரு சிலரிடம்
மொபைல் போன் இருப்பது கண்டுபிடிக்கப்பட்டது. மாணவர் விஷ்ணுபிரியனிடம்
லைட்டர் இருந்தது தெரிந்தது. எனவே, "நாளை பள்ளி வரும்போது பெற்றோரை
அழைத்து வா...' என்று ஆசிரியர் கூறினார். இதனால் மனம் உடைந்த
விஷ்ணுபிரியன், வீட்டுக்குச் சென்றதும் அன்றிரவு, மண்ணெண்ணெயை ஊற்றி தீ
வைத்துக் கொண்டார். வலி தாங்காமல் தெருவில் ஓடி வந்த அவரை,
அக்கம்பக்கத்தினர் தீயை அணைத்து, அரசு மருத்துவமனையில் சேர்த்தனர்.
சிகிச்சை பலனின்றி நேற்று காலை இறந்தார். மாணவர் இறந்ததையடுத்து,
திருநாகேஸ்வரம் அரசு மேல்நிலைப் பள்ளிக்கு விடுமுறை விடப்பட்டது. போலீசார்
வழக்கு பதிந்து விசாரிக்கின்றனர். கல்லூரி மீது தாக்குதல்: ஸ்ரீவி., அருகே
கல்லூரியில் விஷம் குடித்த மாணவரை காப்பாற்ற ஆம்புலன்ஸ் தர
காலதாமதப்படுத்திய துறைத் தலைவர் மீது நடவடிக்கை எடுக்கக் கோரி
வலியுறுத்தி, கல்லூரி மீது மாணவர்கள் தாக்குதல் நடத்தினர். மதுரை
கருப்பாயூரணியை சேர்ந்த முனீஸ்வரன்(20). இவர் கம்ப்யூட்டர் சயின்ஸ்
இன்ஜினியரிங் முன்றாமாண்டு படித்து வந்தார். சில நாட்களுக்கு முன்,
என்.எஸ். எஸ்., முகாமிற்கு சென்ற போது மது அருந்திய பிரச்னை தொடர்பாக அவரை
கல்லூரி நிர்வாகம் சஸ்பெண்ட் செய்தது. இதனால் பெற்றோர் அவரை திட்டினர்.
இந்த மன வருத்தத்தில் இருந்த அவர் நேற்று முன்தினம் கல்லூரிக்கு வந்து
விடுதியில் தங்கியிருந்தார். மாலை 4 மணியளவில் விஷம் குடித்து
மருத்துவமனைக்கு கொண்டு செல்லும் வழியில் இறந்தார்.
இவர் இறந்ததற்கு,
கம்ப்யூட்டர் சயின்ஸ் துறைத் தலைவர் ரவி, ஆம்புலன்ஸ் வழங்க
காலதாமதப்படுத்தியதுதான் காரணம் எனவும், அவர் மீது நடவடிக்கை எடுக்க
வலியுறுத்தி, கல்லூரி மாணவர்கள் நேற்று காலை 9 மணியளவில் போராட்டத்தில்
ஈடுபட்டனர். இதில் கல்லூரி அலுவலக கண்ணாடிகள் மீது கல்வீசி உடைக்கப்பட்டன.
பின், கல்லூரியிலிருந்து வெளியே வந்து வாசல் முன் திரண்டனர். இதையடுத்து,
கல்லூரி நிர்வாகம் கம்ப்யூட்டர் சயின்ஸ் துறை தலைவர் பதவி
பொறுப்பிலிருந்து ரவியை விடுவித்தது. மேலும், கல்லூரிக்கு வரும் 22ம் தேதி
வரை விடுமுறை அறிவித்தது. இதையடுத்து, எஸ்.பி., பிரபாகரன், கல்லூரி முன்
திரண்டிருந்த மாணவர்களை கலைந்து செல்ல உத்தரவிட்டதை தொடர்ந்து அவர்கள்
கலைந்து சென்றனர்.

ஏன்பா அவசரப்பட்ட. உன்ன பற்றி கனவுகள் வளர்த்த பெற்றோர்களை நினைத்து பார்த்தியா