வேலை வாங்கித் தருவதாக மோசடி வெளிநாட்டில் 20 பேர் தவிப்பு

by நவீன் Thu 19 Aug 2010 - 10:26

திண்டுக்கல்: வேலை வாங்கித் தருவதாகக் கூறி, டூரிஸ்ட் விசா கொடுத்து
ஏமாற்றியதால், தமிழகத்தைச் சேர்ந்த 20 பேர், குவைத்தில் தவித்து
வருகின்றனர். திண்டுக்கல் மாவட்டம் பாடியூர் புதுப்பட்டியைச் சேர்ந்தவர்
நாகேந்திரன்(22); டிப்ளமோ கேட்டரிங் முடித்துள்ளார். இவரிடம், தஞ்சாவூரைச்
சேர்ந்த சோமசுந்தரம், தாஸ், திருச்சியைச் சேர்ந்த அப்துல் அலீம் ஆகியோர்
சவுதியில் வேலை வாங்கித்தருவதாகக் கூறி, ஒரு லட்சத்து 46 ஆயிரம் ரூபாய்
பெற்றனர். கடந்த மே 6ம் தேதி குவைத்திற்கு அழைத்துச் சென்று, அங்குள்ள ஒரு
ஓட்டலில் தங்க வைத்து விட்டு இவர்கள் தலைமறைவாகி விட்டனர். பின்னர் தான்
நாகேந்திரனுக்கு டூரிஸ்ட் விசாவில் வந்துள்ள விவரம் தெரிந்துள்ளது. இந்த
விசா காலம் கடந்த ஜூன் 5ல் முடிந்தது. விசா இல்லாமல் குவைத்தில் தங்கினால்
ஒரு நாளைக்கு 2,000 ரூபாய் அபராதம் கட்ட வேண்டும். தற்போது வரை குவைத்
அரசுக்கு ஒரு லட்சத்து 20 ஆயிரம் கட்ட வேண்டும். பாதிக்கப்பட்ட
நாகேந்திரன், தமிழக முதல்வர், திண்டுக்கல் கலெக்டர் ஆகியோருக்கு கடிதம்
எழுதியுள்ளார். இதில் கூறியிருப்பதாவது: டூரிஸ்ட் விசா கொடுத்து என்னை
ஏமாற்றியது போன்று 20 பேர் ஏமாற்றப்பட்டுள்ளனர். நாங்கள் தற்போது
குவைத்தில் உள்ள தமிழ்நாடு முஸ்லிம் முன்னேற்றக்கழக அலுவலகத்தில்
தஞ்சமடைந்துள்ளோம். அவர்கள் எங்களுக்கு உணவு வழங்கி, பாதுகாப்பு கொடுத்து
வருகின்றனர். ஒவ்வொருவரும், குவைத் அரசுக்கு, விசா இல்லாமல் தங்கியதால்
ஒரு லட்சத்து 20 ஆயிரம் ரூபாய் கட்ட வேண்டும். எங்களை மீட்பதற்கு அரசு
நடவடிக்கை எடுக்க வேண்டும். இவ்வாறு அவர் கூறியுள்ளார். நாகேந்திரன்
உறவினர்கள், தமிழ்நாடு முஸ்லிம் முன்னேற்றக்கழக மாவட்ட தலைவர் ஹபிபுல்லா
ஆகியோர் திண்டுக்கல் கலெக்டரிடம், "இளைஞர்கள் பலரிடம் வேலை
வாங்கித்தருவதாகக் கூறி, பல லட்சம் ரூபாயை வாங்கி கொண்டு டூரிஸ்ட் விசா
கொடுத்துள்ள ஏஜன்ட்கள் மீது நடவடிக்கை எடுக்க வேண்டும். 20 இளைஞர்களையும்
மீட்க வேண்டும்' என கூறியுள்ளனர்.