ஓசூரில் டெங்கு காய்ச்சல்: ஒருவர் பலி

ஓசூர்: ஓசூரில் டெங்கு காய்ச்சல் பரவிய நிலையில், சிகிச்சை பலனின்றி
ஒருவர் பரிதாபமாக இறந்தது, மக்களை பீதியடைய செய்துள்ளது. கர்நாடகா மாநிலம்
பெங்களூரில், கடந்த ஒரு மாதமாக டெங்கு காய்ச்சல் தீவிரமடைந்து, நோய்
தாக்கி பலர் இறந்தனர். பெங்களூரிலிருந்து ஓசூர், தேன்கனிக்கோட்டை
தாலுகாவில் உள்ள பொதுமக்களுக்கு, டெங்கு காய்ச்சல் வேகமாக பரவி வருகிறது.
தமிழக சுகாதாரத்துறை நடவடிக்கை எடுக்காததால், ஓசூர், தேன்கனிக்கோட்டை,
கெலமங்கலம், சூளகிரி உள்ளிட்ட பகுதியில், 108 பேர் பாதிக்கப்பட்டுள்ளனர்.
அவர்கள், ஓசூர், பெங்களூரு தனியார் மருத்துவமனைகளில் சிகிச்சை
பெறுகின்றனர். குறிப்பாக, ஓசூரில் உள்ள லட்சுமி மருத்துவமனையில் கடந்த
மாதம், 13 பேரும், தற்போது எட்டு பேரும் அனுமதிக்கப்பட்டுள்ளனர். அவர்களை
பரிசோதித்த டாக்டர் ரங்கராஜன், டெங்கு காய்ச்சல் தாக்கி இருப்பதை உறுதி
செய்துள்ளார். ஓசூர் பழைய பெங்களூரு சாலை, தனியார் மருத்துவமனை ஆம்புலன்ஸ்
டிரைவர், டெங்கு காய்ச்சலால் பாதிக்கப்பட்டு, சிகிச்சை பலனளிக்காமல்
இறந்தார். இதனால் மக்கள், பீதி அடைந்துள்ளனர். "பிளேட்லெட்'
தட்டுப்பாட்டு: டெங்கு காய்ச்சல் பாதிக்கப்பட்டவர்களுக்கு, "பிளேட்லெட்'
அணுக்கள் குறைந்து, ரத்த அழுத்தம் சீர்குலைந்து ரத்தக் கசிவு ஏற்படும்.
இதனால், டெங்கு நோயாளிகளுக்கு உடனடியாக, "பிளேட்லெட்' அணுக்கள்
ஏற்றப்படும். ஒரு பேக் அணுக்கள் 750 ரூபாய் வீதம், நோய் பாதித்த
ஒருவருக்கு இரண்டு முதல் ஆறு பேக் அணுக்கள் ஏற்றப்படுகின்றன. தற்போது
கர்நாடகாவில் டெங்கு காய்ச்சல் தீவிரம் காரணமாக, பெங்களூரு மற்றும்
புறநகர் மருத்துவமனைகளில், "பிளேட்லெட்' அணுக்களுக்கு தட்டுப்பாடு
ஏற்பட்டுள்ளது. பெங்களூரில் இருந்து ஓசூர் மருத்துவமனைகளுக்கு,
"பிளேட்லெட்' அணுக்கள் வாங்கப்படுவதாலும் தட்டுப்பாடு நீடிக்கிறது.