இலங்கை மீனவர்களிடம் "கை'வரிசை காட்டிய தமிழக அதிகாரிகள்

ராமநாதபுரம் : எல்லை மீறி மீன்பிடித்ததாக கைதான இலங்கை மீனவர்களிடம்,
பறிமுதல் செய்த மீன்களை ஏலம் விட்ட 90 ஆயிரத்து 648 ரூபாயை, மண்டபம்
மீன்துறை அதிகாரிகள் வழங்காததால், மீனவர்கள் விரக்தியுடன் நாடு
திரும்பினர்.
கடந்த ஜூன் 16ல் காரைக்கால் கடற்பகுதியில் மீன்பிடித்து கொண்டிருந்த
இலங்கையை சேர்ந்த நான்கு படகுகளை பிடித்த கடலோர காவல்படையினர், அதிலிருந்த
21 மீனவர்களை கைது செய்தனர். இதுபோல் ஜூன் 5ம் தேதி இந்திய எல்லையில்
மீன்பிடித்து பிடிபட்ட மற்றொரு படகின் ஐந்து மீனவர்களுடன் 26 மீனவர்களை
மதுரை சிறையில் அடைத்தனர். தண்டனை முடிந்த நிலையில்,நேற்று (ஆக.,18)
இலங்கை செல்ல மத்திய, மாநில அரசுகள் ஒப்புதல் அளித்தன. இதற்காக கடந்த 20
நாட்களாக மண்டபத்தில் போலீஸ் பாதுகாப்பில் மீனவர்கள் தங்கியிருந்தனர்.
ஒவ்வொரு முறை மீனவர்கள் பிடிபடும் போதும், அவர்களிடம் கைப்பற்றப்படும்
பொருட்களை, விடுதலையாகும் போது ஒப்படைக்க வேண்டும்.
மீன்கள் அழுகும் பொருள் என்பதால், அவற்றை ஏலத்தில் விட்டு அதற்கான
பணத்தை விடுதலையாகும் மீனவர்களிடம் மீன்வளத்துறை அதிகாரிகள் ஒப்படைப்பது
வழக்கம். ஆனால் ஜூன் 5ம் தேதி பிடிபட்ட படகின் மீன்களை ஏலமிட்டு 62
ஆயிரத்தை ஒப்படைத்த மீன்வளத்துறை அதிகாரிகள், ஜூன் 16ல் பிடிபட்ட ஐந்து
படகுகளின் மீன்களுக்கான 90 ஆயிரத்து 648 ரூபாயை வழங்கவில்லை. இன்று, நாளை
என கடந்த 20 நாட்களாக ஆசை வார்த்தை கூறி, இலங்கை செல்ல படகு ஏறும் கடைசி
நிமிடம் வரை அவர்களுக்கான பணத்தை தரவில்லை. இதனால் விரக்தி அடைந்த
அப்படகின் மீனவர்கள் நொந்து போன மனதுடன் இலங்கை திரும்பினர்.
இலங்கை திரிகோணமலை மீனவர் குமார கர்ணரத்னா கூறியதாவது: போலீசார்
கைப்பற்றிய பொருட்கள், படகுகள் எல்லாம் கிடைத்துவிட்டன. கடைசி வரை
எங்களுக்கு சேர வேண்டிய மீன்கள் ஏலம் விட்ட பணத்தை மீன்வளத் துறை
அதிகாரிகள் தரவில்லை. சிரமப்பட்டு கடலில் இருந்து, சிறை தண்டனை
அனுபவித்தும் நஷ்டத்துடன் நாடு திரும்புகிறோம், என்றார். மீன்வளத்துறை
உதவி இயக்குனர் சிவராமனை போனில் பலமுறை தொடர்பு கொண்டும் அவர் பேசவில்லை.