வானில் தோன்றிய "சூரிய வட்டம்' ;ஆர்வத்துடன் பார்த்த பழநி மக்கள்

பழநி: பழநியில் தோன்றிய அதிசய சூரிய வட்டத்தை, நேற்று ஏராளமான மக்கள்
ஆர்வத்துடன் பார்த்தனர். சூரிய, சந்திர கிரகணம் போன்ற நாட்களில், சில
இடங்களில் சூரிய ஒளியின் தன்மையில் மாற்றம் காணப்படுவது வழக்கம். பகல்
நேரங்களில் மட்டுமே இதுபோன்ற நிகழ்வுகள் இருக்கும். சில மாதங்களாக பழநி
பகுதியில், பகலில் வெயிலின் தாக்கம் அதிகரித்துள்ளது. நேற்று சூரியனை
மேகமூட்டம் சூழ்ந்ததைப் போன்று, வெயிலின் தாக்கம் குறைவாக இருந்தது. இது
தவிர பெரும்பாலான பகுதிகளில், சூரியனைச் சுற்றிலும் வட்டம் போன்ற அமைப்பு
காணப்பட்டது. காலை 11 மணி முதல் மதியம் 1.45 மணி வரை நீடித்தது. சில
இடங்களில் வெவ்வேறு வண்ணங்கள் கலந்த நிலையில் இந்த வட்ட வடிவம்
காட்சியளித்தது. இதை, மக்கள் ஆர்வத்துடன் பார்த்தனர். இது குறித்து தேசிய
குழந்தைகள் அறிவியல் மாநாட்டு இயக்க மாநில கல்வி ஒருங்கிணைப்பாளர் மோகனா
கூறியதாவது: பொதுவாக இரவு நேரத்தில், நிலாவைச் சுற்றிலும் ஒளி வட்ட
அமைப்பு காணப்படுவது வழக்கம். அதைப்போன்றே சூரியனைச் சுற்றிலும் இந்த
வட்டம் காட்சியளிக்கிறது. அரிதாக காணக்கூடிய வானியல் நிகழ்வுகளில் இதுவும்
ஒன்று. இதனால் பாதிப்பு ஏதுமில்லை. முப்பட்டக அமைப்பின் வழியே வெள்ளை ஒளி
செல்லும்போது, நிறப்பிரிகை அடைந்து பல்வேறு வண்ணங்களில் காட்சியளிக்கும்.
மழைக்காலங்களில் சூரிய வெள்ளை ஒளி, மழைத்துளி மீது பட்டு நிறப்பிரிகை
அடையும். இதனால் காலை, மாலை வேளைகளில், வானவில் தோன்றும். சில நேரங்களில்
வானம், நான்கு வண்ணங்களில் காட்சியளிக்கும். இதைப்போன்று தற்போது
சூரியனைச் சுற்றியுள்ள மேகங்களின் மீதுள்ள மழைத்துளி நிறப்பிரிகை
அடைந்துள்ளது. எனவே சூரியனைச் சுற்றிலும், அரிதான சூரிய வட்டம்
உருவாகியுள்ளது. கடந்த ஜூலை 10ல் இதேபோன்ற வட்ட அமைப்பு, சென்னை,
கல்பாக்கம் பகுதிகளில் தெரிந்துள்ளது. இதனால் எந்த பாதிப்பும் இல்லை.
இவ்வாறு மோகனா தெரிவித்தார்.

இம்