கிளார்க் பணி குறித்து, புதிய சட்டம் கோரிய வழக்கு; தமிழக அரசுக்கு ஐகோர்ட் உத்தரவு

மதுரை:

தமிழகத்தில், ஊராட்சிகளில் பணிபுரியும் கிளார்க்குகளின் பணி
வரன்முறை குறித்து புதிய சட்டம் மற்றும் விதிகளை ஏற்படுத்தக் கோரிய மனுவை
மூன்று மாதங்களுக்குள் பரிசீலித்து, உரிய நடவடிக்கை எடுக்க ஊரக வளர்ச்சி
மற்றும் பஞ்சாயத்து ராஜ் செயலருக்கு, மதுரை ஐகோர்ட் கிளை உத்தரவிட்டது.
தூத்துக்குடி தெற்கு வீரபாண்டியபுரத்தைச் சேர்ந்த அழகுபெருமாள்சாமி
தாக்கல் செய்த பொது நல வழக்கு: தெற்கு வீரபாண்டியபுரம் ஊராட்சியில் 1996ல்
கிளார்க் ஆக நியமிக்கப்பட்டேன். 2001 வரை எந்த குற்றச்சாட்டுகளுக்கும்
உள்ளாகாமல் பணிபுரிந்தேன். 2001ல் உள்ளாட்சி தேர்தல் முடிந்து புதிய
ஊராட்சித் தலைவர் பொறுப்பு ஏற்றார். எந்த காரணமும் இன்றி என்னை அவர் பணி
நீக்கம் செய்தார். அதை எதிர்த்து, நிர்வாக தீர்ப்பாயத்தில் வழக்கு
தொடர்ந்தேன். என்னை மீண்டும் பணியில் அமர்த்த தீர்ப்பாயம் உத்தரவிட்டது.
இருந்தும், என்னை பணியில் தலைவர் அமர்த்தவில்லை. தீர்ப்பாய உத்தரவை
எதிர்த்து தலைவர், ஐகோர்ட் கிளையில் மேல்முறையீடு செய்தது, நிலுவையில்
உள்ளது. நான் மட்டுமில்லாமல், மாநிலம் முழுவதும் ஊராட்சி கிளார்க்குகள்,
தலைவர்களால் நீக்கப்பட்டு, வேலையின்றி உள்ளனர். ஊராட்சியில் ஏழு ஆண்டுகளாக
பணி முடித்த கிளார்க்குகளை, இளநிலை உதவியாளராக நியமிக்க வேண்டும் என அரசு
விதிகளில் உள்ளது. ஊராட்சித் தலைவர்களால், கிளார்க்குகள் பணி
நீக்கப்படுகின்றனர். எனவே, கிளார்க்குகள் நியமனம், நீக்கம் போன்ற பணி
வரன்முறை குறித்து புதிய சட்ட விதிகளை ஏற்படுத்தக் கோரி முதல்வர், ஊரக
வளர்ச்சித் துறை அதிகாரிகளுக்கு மனு கொடுத்தும், நடவடிக்கை இல்லை.
நடவடிக்கை எடுக்க உத்தரவிட வேண்டும். இவ்வாறு மனுவில் தெரிவிக்கப்பட்டது.
மனுதாரர் சார்பில் வக்கீல்கள் தாளைமுத்தரசு, வைகுந்த் ஆஜராயினர்.
நீதிபதிகள் முருகேசன், துரைசாமி கொண்ட பெஞ்ச், மனுதாரர் மனுவை பரிசீலித்து
மூன்று மாதங்களுக்குள் உரிய நடவடிக்கை எடுக்க வேண்டும் என, ஊரக வளர்ச்சித்
துறை செயலர், கமிஷனருக்கு உத்தரவிட்டது.