காலாவதியான மருந்துகளை விற்ற வழக்கு மூன்று நிறுவனங்கள் சீலை அகற்ற உத்தரவு

நவீன் · நவீன் Thu Aug 19, 2010 7:58 am

சென்னை:

காலாவதி மருந்துகளை விற்றதாக தொடரப்பட்ட வழக்கில், மூன்று நிறுவனங்களுக்கு
வைத்த சீலை அகற்ற, சென்னை ஐகோர்ட் உத்தரவிட்டுள்ளது. வங்கிக் கணக்கு
முடக்கத்தை நீக்கவும் உத்தரவிடப்பட்டுள்ளது. காலாவதி மருந்துகளை விற்றதாக
மீனாட்சிசுந்தரம் என்பவர் மீது கொடுங்கையூர் போலீசார் வழக்கு பதிவு செய்து
கைது செய்தனர். பின், குண்டர் சட்டத்தின் கீழ் இவரை கைது செய்து சிறையில்
அடைத்தனர். இவரைப் போன்று வேறு சிலரும் கைது செய்யப்பட்டனர். சென்னை
சின்மயா நகரில் வசந்தா என்டர்பிரைசஸ், வசந்தமீனா என்டர்பிரைசஸ், மீனா
ஹெல்த் கேர் என்ற பெயரில் நிறுவனங்களை மீனாட்சிசுந்தரம் நடத்தி வந்தார்.
இந்த நிறுவனங்களுக்கு "சீல்' வைக்கப்பட்டது. வங்கிக் கணக்குகளும்
முடக்கப்பட்டன. மருந்து விற்பனைக்காக வழங்கப்பட்ட உரிமத்தை ஏன் ரத்து
செய்யக் கூடாது என, கேட்டு மருந்து கட்டுப்பாட்டு துறை நோட்டீசும்
அனுப்பியது. இதை எதிர்த்து சென்னை ஐகோர்ட்டில், மீனாட்சிசுந்தரம் தாக்கல்
செய்த மனுவில், "மருந்து சட்டத்தின் கீழ் உரிமம் பெற்று மொத்த வியாபாரம்
செய்து வருகிறோம். 470 பேர் இங்கு பணியாற்றுகின்றனர். வங்கி கணக்கு
முடக்கத்தால் பாதிக்கப்பட்டுள்ளோம். எனவே, அதை நீக்க வேண்டும்' என
கூறியுள்ளார். மருந்து கட்டுப்பாட்டுத் துறை அளித்த புகாரின் மீது
நடவடிக்கை எடுக்க போலீசாருக்கு அதிகாரமில்லை என்றும் எனவே, போலீசாருக்கு
தடை விதிக்க வேண்டும் என்றும் கோரி, ஐகோர்ட்டில் சாத்தம்மை என்பவர் மனு
தாக்கல் செய்தார். இந்த வழக்கை நீதிபதி என்.பால்வசந்தகுமார் விசாரித்தார்.
மனுதாரர்கள் சார்பில் வக்கீல் என்.ஜோதி வாதாடினார். நீதிபதி
என்.பால்வசந்தகுமார் பிறப்பித்த உத்தரவு: சீலிடப்பட்ட நிறுவனங்களை
திறந்து, அங்குள்ள மருந்துகளின் பட்டியல் விவரங்களை குறிப்பெடுத்து
தாக்கல் செய்ய வேண்டும் என்றும், இரண்டு கணக்குகளை செயல்படுத்த
அனுமதித்தும் ஏற்கனவே ஐகோர்ட் இடைக்கால உத்தரவிட்டுள்ளது. அதன்படி,
மருந்து பட்டியல் விவரங்கள் தாக்கல் செய்யப்பட்டது. அட்வகேட் ஜெனரல்
முன்வைத்த வாதம் பதிவு செய்யப்படுகிறது. அவரது கருத்துக்கு உடன்படுவதாக
மனுதாரர்களின் வக்கீலும் தெரிவித்துள்ளார். எனவே, கீழ்கண்ட உத்தரவு
பிறப்பிக்கப்படுகிறது.
* மனுதாரர்களின் பிரதிநிதிகள் முன்னிலையில், மூன்று நிறுவனங்களுக்கும்
வைக்கப்பட்ட சீலை அகற்ற வேண்டும். காலாவதி ஆகாத, போலி அல்லாத மருந்துகளை
விற்க மனுதாரர்களை அனுமதிக்க வேண்டும்.
*மருந்து ஆய்வாளரின் ஒப்புதல் பெற்று, ஆட்சேபனை அல்லாத மருந்துகளை விற்க மனுதாரர்களுக்கு அனுமதியளிக்கப்படுகிறது.
* ஆட்சேபனைக்குரிய மருந்துகளை மனுதாரர்களின் இடத்தில் தனியாக
வைக்கலாம். அல்லது போலீசார், மருந்து கட்டுப்பாட்டுத் துறை எடுத்துச்
சென்று தங்கள் பாதுகாப்பில் வைத்துக் கொள்ளலாம்.
* காலாவதியான, போலி அல்லாத மருந்துகளை மனுதாரர்கள் கேட்டால், அவற்றின்
மாதிரியை எடுத்துக் கொண்டு, மீதியை ஒப்படைக்கலாம். அப்போது தான், அவற்றை
தயாரிப்பாளர்களிடம் திருப்பிக் கொடுத்து, காலாவதியான மருந்துகளுக்கு உரிய
பணத்தை பெற முடியும்.
* கடந்த மார்ச் மாதம் முடக்கி வைக்கப்பட்ட வங்கிக் கணக்குகளை உடனடியாக
நீக்க வேண்டும். விளக்கம் கோரிய நோட்டீஸ் தொடர்பான ஆவணங்களை இரண்டு
வாரங்களுக்குள் மனுதாரர்களுக்கு மருந்து கட்டுப்பாட்டு உதவி இயக்குனர்
வழங்க வேண்டும். இதற்கு நான்கு வாரங்களுக்குள் மனுதாரர்கள் பதிலளிக்க
வேண்டும். சட்டப்படி உத்தரவு பிறப்பிக்க வேண்டியது, மருந்து
கட்டுப்பாட்டுத் துறையைப் பொறுத்தது. இவ்வாறு நீதிபதி என்.பால்வசந்தகுமார்
உத்தரவிட்டுள்ளார்.

காலாவதியான மருந்துகளை விற்ற வழக்கு மூன்று நிறுவனங்கள் சீலை அகற்ற உத்தரவு

காலாவதியான மருந்துகளை விற்ற வழக்கு மூன்று நிறுவனங்கள் சீலை அகற்ற உத்தரவு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக