சத்யம் ராஜுக்கு ஆந்திர ஐகோர்ட் ஜாமீன்

ஐதராபாத் :
நாட்டை உலுக்கிய சத்யம் கம்ப்யூட்டர்ஸ் மோசடி ராமலிங்க
ராஜுக்கு, அவரது உடல்நிலையைக் கருத்தில் கொண்டு, ஆந்திர மாநில ஐகோர்ட்,
ஜாமீன் வழங்கியுள்ளது.
ஐதராபாத்தில் உள்ள சத்யம் கம்ப்யூட்டர்ஸ் நிறுவனர் ராமலிங்க ராஜு
அந்நிறுவனத்தின் கோடிக் கணக்கான ரூபாயைச் சுருட்டி, பினாமிகளின்
பெயர்களில் பல்வேறு சொத்துக்களை வாங்கிக் குவித்தார். மொரீஷியஸ் போன்ற
நாடுகளில் உள்ள வங்கிகளில் பணத்தைப் போட்டு வைத்தார். இதனால் சத்யம்
நிறுவனம், 14 ஆயிரம் கோடி ரூபாய் அளவுக்கு பேரிழப்பைச் சந்தித்தது. இது
நாட்டில் பெரும் அதிர்ச்சியை உருவாக்கியது. 2009, ஜனவரி 7ம் தேதி தான்
செய்த குற்றத்தை ராஜு ஒப்புக் கொண்டதைத் தொடர்ந்து, 9ம் தேதி அவர் கைது
செய்யப்பட்டு, சன்சல்குடா மத்திய சிறையில் அடைக்கப்பட்டார். சத்யம் நிறுவன
ஊழல் வழக்கை சி.பி.ஐ., விசாரித்து வருகிறது. மேலும், ஏப்ரல் மற்றும்
நவம்பரில் ராஜு மீதான குற்றப்பத்திரிகைகளை சி.பி.ஐ., தாக்கல் செய்தது.
ஆந்திர மாநில ஐகோர்ட், கடந்த மாதம், இவ்வழக்கில் ராஜுவின் தம்பியும்,
சத்யம் நிறுவனத்தின் முன்னாள் நிர்வாக இயக்குனருமான ராம ராஜு,
அந்நிறுவனத்தின் முன்னாள் தலைமை நிதியதிகாரி வி.ஸ்ரீநிவாஸ் உள்ளிட்ட
முக்கிய குற்றவாளிகள் ஐந்து பேருக்கு ஜாமீன் வழங்கியது.
இந்நிலையில், கடந்த ஆண்டு செப்டம்பர் மாதம், ராஜுவுக்கு "ஹெபடிடஸ்-சி'
வைரஸ் தாக்கியது கண்டறியப்பட்டது. அதன் காரணமாக அவரது உடல்நிலை
பாதிக்கப்பட்டது. இதன் அடிப்படையில், ஆந்திர மாநில ஐகோர்ட் நேற்று
அவருக்கு 20 லட்ச ரூபாய் பிணையில் ஜாமீன் வழங்கியது. மேற்கொண்டு கோர்ட்
உத்தரவுகள் வரும் வரை ஐதராபாத் நகரை விட்டு அவர் வேறு எங்கும் செல்லக்
கூடாது; மருத்துவமனையிலிருந்து வெளிவந்தவுடன் தினசரி அவர் சி.பி.ஐ.,முன்
ஆஜராக வேண்டும்; விசாரணைக்கு ஒத்துழைப்பு அளிக்க வேண்டும் என்பது போன்ற
நிபந்தனைகளுடன் கோர்ட் ஜாமீன் வழங்கியுள்ளது. இருப்பினும் மருத்துவமனையை
விட்டு நகர முடியாத காரணத்தால் விசாரணைக் கோர்ட்டில் ஆஜராக முடியாது என்று
ராஜு மறுத்துள்ளார்.
இவ்வழக்கின் விசாரணை, ஆரம்பிக்கப்பட வேண்டிய நிலையில் ராஜுவுடன்,
இவ்வழக்கில் தொடர்புடைய 10 முக்கியக் குற்றவாளிகளும் ஜாமீனில்
வெளிவந்துவிட்டதால், விசாரணை தொடர்ந்து நடக்குமா என்று சந்தேகங்கள்
கிளம்பியுள்ளன. ஆனால் ராஜுக்கு ஜாமீன் அளித்ததை எதிர்த்து சி.பி.ஐ.,
மேல்முறையீடு செய்ய முடிவு செய்துள்ளது. ராஜு வெளியில் இருந்தால்,
சாட்சிகளை கலைக்கும் வாய்ப்பு இருப்பதாக சி.பி.ஐ., தரப்பில் கூறப்பட்டது.
தவிரவும் அவர் நோய் பாதிப்பு குறித்து சந்தேகம் கிளப்பிய சி.பி.ஐ., அவர்
மிக மோசமான நிலையில் இருந்து சிகிச்சை பெற்றாரா என்பதையும் அறிய
விரும்புகிறது.