ராஜிவை விட ராகுல் அதிபுத்திசாலி : குஷ்வந்த் சிங் எழுப்புகிறார் சர்ச்சை

புதுடில்லி : "ராஜிவ் உண்மையில் ஒரு தலைவர் அல்ல; அவரிடம் சில
திட்டங்கள் இருந்தன. அவை சாதாரணமானவை தான். ராகுல், தன் தந்தையை விட
அதிபுத்திசாலியாக உள்ளார்' என்று, பிரபல எழுத்தாளர் குஷ்வந்த் சிங்(95)
கூறியுள்ளார்.
இந்தியாவின் பிரபல மூத்த எழுத்தாளரான குஷ்வந்த் சிங், "அப்சொல்யூட்
குஷ்வந்த்: தி லோ டவுன் ஆப் லைப், டெத் அண்டு மோஸ்ட் திங்ஸ் இன் பிட்வீன்'
என்ற புத்தகம் எழுதியுள்ளார். அதில் இந்தியாவின் முக்கிய அரசியல்
தலைவர்கள், நிகழ்ச்சிகள் குறித்த தன் கருத்துக்களைப் பதிவு செய்துள்ளார்.
அதில் அவர் எழுதியிருப்பதாவது: ராகுலுக்கு என்று ஒரு தொலைநோக்கு
இருக்கிறது. மாயாவதி மற்றும் சிவசேனாவின் மண்ணிலேயே அவர்களை ராகுல்
எதிர்கொண்டிருக்கிறார். அமேதியில் தாழ்த்தப்பட்டோரின் வீடுகளில் தங்கி,
அவர் உணவு உண்டது சர்ச்சையைக் கிளப்பியது. எனினும், நாட்டின் வெட்கக்கேடான
நிலையை அவர் வெளிப்படுத்தினார். இந்த 21ம் நூற்றாண்டிலும் நம் நாட்டில்
தீண்டத்தகாதோர் உள்ளனர். அவர்கள் இன்னும் துன்பத்தில் உழல்கின்றனர்.
சிங்கத்தின் குகைக்குள்ளேயே சென்று, அதை எதிர்ப்பது போல், மும்பைக்குச்
சென்று, "மும்பை இந்தியர்கள் அனைவருக்கும் சொந்தம்' என்று சிவசேனாவை
எதிர்த்துப் பேசினார் . ராஜிவைப் பொருத்தவரை, அவரால் கையாள முடியாத
பதவியில் அவர் திணிக்கப்பட்டார். அவரிடம் சில நல்ல யோசனைகள் இருந்தன.
ஆனால் அவை ஒன்றும் அசாதாரணமானதல்ல. உண்மையில் அவர் தலைவரே அல்ல. ஆனாலும்
அவர் அரசியலுக்குப் பொருந்தாதவர் என்று நான் கருதவில்லை. அவர் தன் தாயைப்
பின்பற்றினார்; அவரைப் போலவே பல தவறுகளைச் செய்தார். அவர் ஊக்குவித்த
தொலைத் தொடர்பு மற்றும் கம்ப்யூட்டர் பற்றிய திட்டங்கள், அவரது தாயின்
ஆட்சிக் காலத்திலேயே துவக்கப்பட்டவை தான். இலங்கை பிரச்னையில் அவர் பெரும்
குழப்பத்தை ஏற்படுத்தினார். ஒரு பொதுக் கூட்டத்தில் ஓர் அமைச்சரைத்
திட்டினார். ஷாபானு வழக்கு மற்றும் பாபர் மசூதி சம்பவம் ஆகியவற்றில் அவர்
செய்த பெருந்தவறுகள், நீண்ட கால பாதிப்புகளை ஏற்படுத்தி விட்டன.
இந்திராவின் படுகொலையை ஒட்டி நடந்த, சீக்கியர்களுக்கு எதிரான கலவரத்தை
அவரால் எளிதில் அடக்கியிருக்க முடியும். ஆனால், "ஒரு பெரிய மரம்
விழும்போது, பூமி அதிரத்தான் செய்யும்' என்ற அவரது பேச்சின் மூலம்
கலவரத்தை நியாயப்படுத்தினார். அவரது தாத்தா நேரு இதுபோன்ற கலவரங்களை
அனுமதித்திருப்பாரா என்பதை என்னால் கற்பனை செய்ய முடியவில்லை. சஞ்சய்,
செயல் ஊக்கமுள்ளவர். 2014 லோக்சபா தேர்தலில் காங்கிரஸ் வெற்றி பெற்றால்,
ராகுல் பிரதமர் ஆவார். ராகுல் என் வீட்டுக்கு வந்த போது, "முகஸ்துதி
செய்பவர்களை விலக்கி வையுங்கள்' என்று சொன்னேன். இவ்வாறு குஷ்வந்த் சிங்
எழுதியுள்ளார். அதே சமயம் டில்லியில் இருந்து வெளிவரும் பிரபல நாளிதழுக்கு
தன்னை ஆசிரியராக நியமித்த சஞ்சய் உதவியையும் நூலில் பதிவு
செய்திருக்கிறார் குஷ்வந்த் சிங். அதே போல பிரதமர் மன்மோகன் மிகவும்
நல்லவர் என்றும் துதிபாடியிருக்கிறார்.