இப்தார் விருந்தில் ஜெ., சொன்ன குட்டிக்கதை

சென்னை :
அ.தி.மு.க., சார்பில், இப்தார் நோன்பு திறக்கும் நிகழ்ச்சி சென்னையில் நேற்று நடந்தது.
அ.தி.மு.க., பொதுச்செயலர் ஜெயலலிதா பேசியதாவது: மதத்தின் மீது
மாறாப் பற்று வைத்தல், குர்ஆன் ஓதுதல், நோன்பு இருத்தல், தர்மம் செய்தல்,
ஹஜ் புனித யாத்திரை மேற்கொள்ளுதல் ஆகியவை இஸ்லாத்தின் ஐந்து தூண்கள்.
நோன்பிருத்தல் மூலம் இறைப்பற்று அதிகமாகிறது. அறிவியல் அடிப்படையில் மிகச்
சிறந்த பயன் அளிக்கிறது. பிறருக்கு உதவி செய்து வாழ்பவர்களை காலம் என்றும்
ஏற்றிப் புகழும் என்பதற்கு ஒரு சிறு கதையை சொல்ல ஆசைப்படுகிறேன். ஒருமுறை
கால்பந்து, இறைவனிடம் போய் முறையிட்டதாம். நானும், புல்லாங்குழலும் காற்றை
மையமாக வைத்துத் தான் இயங்குகிறோம். புல்லாங்குழலை எல்லாரும் உதட்டோடு
வைத்து கொஞ்சுகிறார்கள். ஆனால், என்னை மட்டும் எல்லாரும் எட்டி, எட்டி
உதைக்கிறார்கள். இறைவா உனது படைப்பில் ஏன் இந்த பாகுபாடு? என்று கால்பந்து
ஆதங்கத்தோடு கேட்டதாம்.
உடனே இறைவன் சொன்னாராம் "நீ சொல்வது உண்மைதான். புல்லாங்குழலும்,
நீயும் காற்றின் அடிப்படையில் தான் இயங்குகிறீர்கள். புல்லாங்குழல் தான்
உள்வாங்கும் காற்றை அழகிய இசையாக உடனே பிறருக்கு கொடுத்து விடுகிறது.
ஆனால், நீயோ, உள்வாங்கும் காற்றை யாருக்கும் கொடுக்காமல் உனக்குள்ளே
வைத்துக் கொள்கிறாய். அதனால் தான் உன்னை எல்லாரும் எட்டி எட்டி
உதைக்கிறார்கள். இந்தக் கதை சொல்கிற கருத்து என்னவென்றால், கருமிகளை காலம்
எட்டி உதைத்து விடும். ஆனால், கொடுத்து உதவுகிற ஈகை குணம் கொண்டவர்களை
வரலாறு தன் குறிப்பேட்டில் என்றும் பதிந்து வைத்துக் கொள்ளும். புகழ்ந்து
மகிழும் என்பது தான். இதை வலியுறுத்துவது போலவே இஸ்லாம் மதத்தின்
இணையில்லா தத்துவங்களில் ஒன்றாகவே பிறருக்கு உதவிடும் உன்னத நோக்கம் இந்த
ரமலான் மாதத்தில் அனைவருக்கும் வலியுறுத்தப்படுகிறது. இவ்வாறு ஜெயலலிதா
பேசினார்.
இந்நிகழ்ச்சியில் வைகோ, தா.பாண்டியன், வரதராஜன், ஜவாஹிருல்லாஹ்,
சேதுராமன், கிருஷ்ணசாமி, திண்டிவனம் ராமமூர்த்தி, செ.கு. தமிழரசன்,
சி.என். ராமமூர்த்தி, வீரைகறீம் உட்பட பலர் கலந்து கொண்டனர்.