ஜெ., உத்தரவால் தி.மு.க.,வினர் பீதி

ராமநாதபுரம் : தமிழக காங்., முன்னாள் தலைவர் சோ.பாலகிருஷ்ணனின் மனைவி
இந்திரா மறைவுக்கு அஞ்சலி செலுத்த, ஜெயலலிதா உத்தரவுபடி பரமக்குடியில்
கோகுலஇந்திரா, மாவட்ட செயலாளர்கள் தலைமையில் அ.தி.மு.க.,வினர் குவிந்ததால்
தி.மு.க.,வினர் பீதியடைந்தனர்.

ராமநாதபுரம் மாவட்டம் பரமக்குடியை சேர்ந்த சோ.பாலகிருஷ்ணன்,
காங்., கட்சியின் முன்னாள் தலைவராகவும், சட்டசபை எதிர்கட்சி தலைவராகவும்
இருந்த வந்தார். இவர் இறந்த பின், இவரது மகன்களில் ரங்கநாதன் மாவட்ட துணை
தலைவராக வாசன் அணியிலும், ரவி என்பவர் சிதம்பரம் அணியிலும் உள்ளனர்.
சமீபத்தில் நடந்த இளைஞர் காங்., தேர்வில் ரவியின் மனைவி மீனாட்சிக்கு
முதுகுளத்தூர் சட்டசபை தொகுதி இளைஞர் காங்., தலைவர் பொறுப்பு தரப்பட்டது.
இந்நிலையில், உடல்நல பாதிப்பால் பாலகிருஷ்ணன் மனைவி இந்திரா நேற்று
முன்தினம் இரவு காலமானார். அது குறித்து, அ.தி.மு.க., நிர்வாகிகள்
ஜெ.,க்கு தகவல் தெரிவித்தனர். அவரது உத்தரவின்படி, மாநில மகளிரணி செயலாளர்
கோகுலஇந்திரா, மாவட்ட செயலாளர்கள் ஆணிமுத்து (ராமநாதபுரம்), உமாதேவன்
(சிவகங்கை) தலைமையில் முன்னாள் எம்.எல்.ஏ.,கள், ஒன்றிய செயலாளர்கள், பிற
பிரிவுகளின் மாவட்ட செயலாளர்கள், நிர்வாகிகள், தொண்டர்கள் என
பெருந்திரளானோர் பரமக்குடியில் இந்திரா உடலுக்கு அஞ்சலி செலுத்தினர். இது
தி.மு.க.,வினரை பீதியடைய செய்தது.

பாலகிருஷ்ணனின் மகன் ரவி கூறியதாவது:
ஜெ., வின் உடனடி உத்தரவு படி இங்கு வந்திருப்பதாக இரங்கலில் பங்கேற்ற
அ.தி.மு.க.,வினர் தெரிவித்தனர். எனக்கும், எங்கள் குடும்பத்தாரும் ஆறுதல்
கூறி சென்றனர். வெளியூரில் இருக்கும் அ.தி.மு.க., பிரபலங்களும் ஜெ.,
கூறியதாக கூறி இரங்கல் தெரிவித்துடன், புறப்பட்டு வருவதாகவும்
தெரிவித்தனர், என்றார்.
முருகவேல் எம்.எல்.ஏ.,தவிர உள்ளூர் அமைச்சரான தங்கவேலன்,
ரித்தீஷ்குமார் எம்.பி., உட்பட தி.மு.க., பிரபலங்கள் பலரும், நேற்று மாலை
வரை இதில் பங்கேற்கவில்லை. தேர்தல் கூட்டணி விவகாரங்கள் சூடுபிடித்து
வரும் நிலையில், ஜெ., வின் இந்த நடவடிக்கை பிறகட்சியினரையும் சிந்திக்க
வைத்துள்ளது.