வரிக்குதிரை

வரிக்குதிரை மிகவும் அழகான மிருகம். அதன் உடலிலுள்ள கருப்பு வெண்மைப் பகுதிகள் துல்லியமாக ஒத்திசைந்திருப்பதே இதன் அழகிற்குக் காரணம். கருப்பு நிறத்தில் வெண்ணிறக் கோடுகள் இருக்கின்றனவா அல்லது வெண்ணிறத்தின் மீது கருப்புக் கோடுகள் அமைந்திருக்கின்றனவா என்று நமக்குச் சந்தேகமாக இருக்கும். ஆப்பிரிக்காவை பூர்விகமாகக்கொண்ட இது தூய்மையும் அழகும் மிக்கது. குதிரை இனத்தைச் சேர்ந்தது.

* பொதுவாக, வரிக்குதிரையின் உடல் முழுதும் கோடுகள் இருக்கும் என்றாலும் வாலின் முனை கருப்பாக இருக்கும். வெப்பத்தை அதிகமாக ஈர்க்கக்கூடிய நிறம் கருப்பு. ஆனால் வெப்பத்தை வெளியேற்றக்கூடிய நிறம் வெண்மை. உடலின் வெப்பநிலையைச் சீராக வைத்திருப்பதற்கு இக்கோடுகள் வரிக்குதிரைகளுக்கு உதவுகின்றன என்று கருதப்படுகிறது. வரிக்குதிரையின் கருநிற மற்றும் வெண்ணிறக் கோடுகள், நம் கைகளில் உள்ள ரேகைகளைப் போலத்தான். கோடுகளின் இந்தக் கலவை ஒவ்வொரு குதிரைக்கும் ஒவ்வொரு விதமாக அமைந்திருக்கும்.

* உடலில் பாதிப் பகுதியில் மட்டும் கோடுகள் அமைந்திருந்த ஒரு வரிக்குதிரை இனம் இருந்தது. இது "க்வாகா' என்று அழைக்கப்பட்டது. இந்த இனம் 19-ஆம் நூற்றாண்டின் இறுதிவரை ஆப்பிரிக்காவில் வாழ்ந்திருந்தது. மனிதர்கள் வேட்டையாடி இந்த இனத்தை முற்றிலும் அழித்துவிட்டார்கள்.

* எதிரிகளுக்கு வரிக்குதிரையைக் கண்டுபிடிப்பதில் பெரிய சிரமமொன்றும் இருக்காது. எதிரிகளிடமிருந்து தப்புவதற்கான திறன் வரிக்குதிரைகளுக்கும் உண்டு. நீளமும், பலமும் உள்ள கால்களும், கூர்மையான சிறிய குளம்புகளும் விரைந்தோடுவதற்கு உதவி செய்கின்றன. வரிக்குதிரைகளுக்கு நல்ல பார்வைத்திறனும் இருக்கின்றன. இவற்றால் இரவு நேரத்திலும் எதிரிகளைக் காண முடியும்.

* பசுவும், எருமையும் இரட்டைக் குளம்பு உள்ள விலங்குகள். ஆனால், வரிக்குதிரைக்கு ஒற்றைக் குளம்புதான் இருக்கிறது. அதனால்தான் அது, குதிரையின் இனத்தைச் சேர்ந்ததாக இருக்கிறது. குதிரையும், வரிக்குதிரையும், கழுதையும் உள்ளிட்ட குடும்பத்திற்கு "இக்யூடெ' என்று பெயர். குதிரை இனத்தைச் சேர்ந்ததாயினும், வரிக்குதிரை காட்டுக் குதிரை வகையைச் சேர்ந்தது.

* எதிரிகள் எப்போதும் தங்களைப் பின்தொடரக்கூடும் என்று வரிக்குதிரைகளுக்கு நன்றாகத் தெரியும். அதனால் அவை எப்போதும் எச்சரிக்கையுடன் இருக்கின்றன. தலையைத் திருப்பாமல், காதுகளை மட்டும் திருப்பி ஓசை எங்கிருந்து வருகிறது என்று கண்டுபிடித்துவிடக்கூடிய பெரிய திறமை இவற்றுக்கு உண்டு. வரக்கூடிய ஆபத்தை, வரிக்குதிரைக் கூட்டத்தில் ஏதேனும் ஒன்று முன்னறிந்தாலும் போதும், உடனே எல்லாக் குதிரைகளும் ஓடத் தொடங்குகின்றன.

* எதிரிகள் பின்தொடர்கிறார்கள் என்று உறுதியாகத் தெரிந்தால், வளைந்து நெளிந்து ஓடுவது வரிக்குதிரைகளின் பழக்கம். பின்தொடரும் எதிரிகளைக் களைப்படையச் செய்ய இந்த ஓட்ட முறை உதவுகிறது. ஆனால், எப்படியும் எதிரியிடமிருந்து தப்பிக்கவே முடியாது என்று தெரியும்போது, இவை திருப்பித் தாக்கவும் தயங்குவதில்லை. குளம்புகளால் எதிரிகளைத் மிதித்துத் துவைக்கும்.

* வரிக்குதிரைக் கூட்டத்தின் தலைவன், ஒரு வலிமையான ஆண் வரிக்குதிரையாக இருக்கும். இது மேயும்போதும், தண்ணீர் குடிக்கும்போதும் எதிரிகள் வருகிறார்களா என்று கவனத்துடன் பார்த்துக்கொண்டிருக்கும்.
* வலிமையான ஆண் வரிக்குதிரைகள் ஒன்றோடொன்று சண்டையிடும். இறுதியாகச் சண்டையில் வெற்றி பெறுகிற வரிக்குதிரையே அக்கூட்டத்தின் தலைவனாக இருக்கும்.

* வரிக்குதிரை இனத்தில் மூன்று வகை இருக்கின்றன. இவற்றில் அதிக பருமனுடன் இருப்பவை "கிரவிஸ்'. மிகவும் சிறியது "மவுன்டண் ஸீப்ரா'. இவை எண்ணிக்கையில் மிகவும் குறைவானவை. அதிகமாகக் காணப்படுபவை "பிளைன் ஸீப்ரா' எனப்படும் சாதாரண வரிக்குதிரைகள்தான்.

* அழகு மிகுந்த தோலுக்காகத்தான் வரிக்குதிரைகள் வேட்டையாடப்படுகின்றன. இதில் "கிரவிஸ்' வகையைச் சேர்ந்த வரிக்குதிரைகள்தான் பெருமளவு அழிக்கப்படுகின்றன.

சிறுவர்மணி

அப்பா...குதிரைக்குத் தலைவன்.. கருப்பு வெள்ளைக்கு விளக்கம்.. அதன் வகை.. காதை மட்டும் திருப்பி ஒலியைக் கேட்கும் எல்லாம் புதிய செய்திகள்..பயனுள்ள பதிவுக்கு..நன்றி சிவா..

பயனுள்ள தகவல் பகிர்வுக்கு நன்றி

நல்லதொரு தகவலைப் பகிர்ந்த சிவா அண்ணாவிற்கு நன்றிகள் ஆயிரம்

அருமையான தகவல் ......... நன்றி சிவா

வரிக்குதிரையின் உண்மையான கலர் என்ன ?
1. வெள்ளை குதிரையின் மேல் கருப்பு கோடு உள்ளதா ?
அல்லது
2. கருப்பு குதிரையின் மேல் வெள்ளை கோடு உள்ளதா ?

Aathira wrote:அப்பா...குதிரைக்குத் தலைவன்.. கருப்பு வெள்ளைக்கு விளக்கம்.. அதன் வகை.. காதை மட்டும் திருப்பி ஒலியைக் கேட்கும் எல்லாம் புதிய செய்திகள்..பயனுள்ள பதிவுக்கு..நன்றி சிவா..