தீர்ப்பில் ‘பன்றி’ என்ற சொல் எதிர்த்த வழக்கில் வெற்றி

மும்பை :

செக் மோசடி தொடர்பான வழக்கின் தீர்ப்பில் மனுதாரரை ‘பன்றி’ என்று கூறியிருந்தார் நீதிபதி. அதை எதிர்த்து தொடரப்பட்ட வழக்கில் அந்த சொல்லை நீக்க செஷன்ஸ் நீதிமன்றம் உத்தரவிட்டது. மும்பையின் அந்தேரி பகுதியை சேர்ந்தவர் வினய் கன்னா. வட்டிக்கு கடன் தரும் தொழில் செய்பவர். 10 ஆண்டுகளுக்கு முன் அதே பகுதியை சேர்ந்த வர்த்தகர் கோக்லிக்கு வினய் கன்னா ஸி 50,000 கடன் அளித்திருந்தார். 2001 மே மாதத்தில் கன்னாவுக்கு கோக்லி செக் அளித்தார். அது பணமின்றி திரும்பியது.மும்பை பெருநகர மாஜிஸ்டிரேட் நீதிமன்றத்தில் கோக்லி மீது செக் மோசடி வழக்கு தொடர்ந்தார் கன்னா. அதன் விசாரணை முடிந்து மாஜிஸ்டிரேட் ஜோட்ஜ், 2007ல் தீர்ப்பளித்தார். கடன் தொகையான ஸி50 ஆயிரத்தை அளிக்க கோக்லிக்கு உத்தரவிட்டதுடன் ஸி10,000 அபராதம் செலுத்த வேண்டும் என்றார்.மாஜிஸ்டிரேட் வாசித்த தீர்ப்பில் ‘வட்டிக்கு கடன் கொடுப்பவர்களுக்கு ஏஜென்டாக மனுதாரர் உள்ளார். அவர் வட்டி வசூலிப்பவர். அதிக வட்டிக்காக வர்த்தகர்களை குறிவைத்து கடன் தருபவர். அவர் ஒரு ரன்ட்டீர்’ என்றிருந்தது. கடைசி வார்த்தைக்கு பன்றி என்று பொருள். அதை பயன்படுத்தியதற்கு மாஜிஸ்டிரேட் எந்த விளக்கமும் அதில் தெரிவிக்கவில்லை.தன்னை அவதூறாக குறிப்பிட்டதுடன், கோக்லிக்கு தண்டனை அளிக்காதது கன்னாவை விரக்தி அடையச் செய்தது.2008ல் செஷன்ஸ் நீதிமன்றத்தில் மாஜிஸ்டிரேட் நீதிமன்ற தீர்ப்பை எதிர்த்து அப்பீல் செய்தார் கன்னா. அதை விசாரித்த நீதிபதி, அசல் தொகை ஸி50,000 தருவதுடன், இழப்பீடாக கன்னாவுக்கு கோக்லி ஸி15,000 தர உத்தரவிட்டார். மாஜிஸ்டிரேட் பயன்படுத்திய ‘பன்றி’ என்ற வார்த்தையை தீர்ப்பில் இருந்து நீக்கவும் உத்தரவிட்டார்.இதுபற்றி வினய் கன்னா கூறுகையில், ‘‘மாஜிஸ்டிரேட் தெரிவித்த வார்த்தையால் அதிர்ச்சி அடைந்தேன். கேவலமாக உணர்ந்தேன். எனது கவுரவத்தை மீட்க செஷன்ஸ் நீதிமன்றத்தில் மேல் முறையீடு செய்தேன்.ஆனால், அதன் தீர்ப்பும் நிம்மதி தரவில்லை. பன்றி என்ற வார்த்தையை நீக்கியது மட்டுமே மகிழ்ச்சி அளிக்கவில்லை. அதை பயன்படுத்திய மாஜிஸ்டிரேட்டுக்கு தண்டனை கிடைக்கும் என்று நம்பினேன். அது நடக்கவில்லை. நீதித்துறை நடைமுறைகள் விரக்தி அளிக்கின்றன’’ என்றார்.